جاساندى ينتەللەكت بەدەۋلىكپەن كۇرەسۋگە كومەكتەسەدى
الماتى. KAZINFORM - قازاقستاننىڭ رەپرودۋكتيۆتى مەديتسيناسى جاساندى ينتەللەكت ارقىلى بەدەۋلىكتى ەمدەۋدىڭ ەڭ زاماناۋي ادىستەرىن قولدانىپ جاتىر.
كلينيكالىق ەمبريولوگ داميرا مۇسۇراليەۆانىڭ ايتۋىنشا، قازىر رەپرودۋكتيۆتى مەديتسينادا زاماناۋي تەحنولوگيالار، ونىڭ ىشىندە جاساندى ينتەللەكت بەلسەندى قولدانىلىپ جاتىر. بۇل قازاقستاندىق دارىگەرلەردىڭ جۇمىسىن ايتارلىقتاي جەڭىلدەتەدى.
وسى جوعارى تەحنولوگيالىق قۇرىلعىلاردىڭ ءبىرى - جاساندى ينتەللەكتكە يە Embryoscope Plus ينكۋباتورى.
- بۇل ينكۋباتور بىرەگەي. ياعني، ونىڭ ىشىندە جاساندى ينتەللەكت ورناتىلعان جانە كامەرامەن جابدىقتالعان. ول ۇرىقتى ءار 15 مينۋت سايىن سۋرەتكە ءتۇسىرىپ، دارىگەرگە ءار وزگەرىس تۋرالى اقپارات بەرىپ تۇرادى. ۇرىقتىڭ دامۋ قابىلەتىن بۇعان دەيىن ەمبريولوگ مامان انىقتاپ كەلسە، ەندى جاساندى ينتەللەكت تاڭدايدى، - دەيدى دارىگەر.
سونداي-اق قازاقستان حالقىنىڭ رەپرودۋكتيۆتى دەنساۋلىعىن جاقسارتۋعا باعىتتالعان پرەزيدەنتتىك باعدارلامانىڭ قۇرمەتىنە الماتىدا «اڭساعان ءسابي» ءمۇسىنى ورناتىلدى.
- مەنىڭ ارمانىم - بەدەۋلىكتى تۇبەگەيلى جويۋ. ءار وتباسىدا نارەستەنىڭ ىڭگالاعان ءۇنى ەستىلسە ەكەن دەيمىن. بەدەۋلىكپەن كۇرەسىپ جۇرگەن جۇپتار ءۇشىن ەڭ ماڭىزدىسى - ەمپاتيا. سول سەبەپتى «اڭساعان ءسابي» ءمۇسىنى بالا ءسۇيۋدى ارماندايتىن ءار وتباسىعا ءۇمىت بەرەتىن بەلگى بولماق. قازىر قازاقستانداعى ءار التىنشى وتباسى بەدەۋلىك ماسەلەسىنە تاپ بولىپ جاتىر، رەسمي دەرەكتەر بويىنشا 21 مىڭنان استام ادامعا بەدەۋلىك دياگنوزى قويىلعان. سوندىقتان ءبىزدىڭ ماقساتىمىز وزگەرمەيدى - رەپرودۋكتيۆتىك مەديتسينانى قولداۋدىڭ جانە عىلىم مەن يننوۆاتسيانى دامىتۋدىڭ ماڭىزدىلىعىنا قوعام نازارىن اۋدارتۋ، - دەدى «ەكومەد» كلينيكالار توبىنىڭ نەگىزىن قالاۋشى ءارى عىلىمي جەتەكشىسى سالتانات بايقوشقاروۆا.
وسىعان دەيىن پرەزيدەنت 2021 -جىلى باستاماشىلىق ەتكەن «اڭساعان ءسابي» باعدارلاماسىنىڭ ناتيجەسىندە ەلدە ءتورت جىلدا 10000-نان استام ءسابي دۇنيەگە كەلگەنى تۋرالى جازعانبىز.
ەسكە سالايىق، بۇعان دەيىن «اڭساعان ءسابي» باعدارلاماسى 2030 -جىلعا دەيىن جالعاساتىنى تۋرالى جازعان بولاتىنبىز.