جاس وسپىرىمدەر وليمپياداسى: قورجىنىمىزدا قانشا جۇلدە بار

وڭتۇستىك كورەيانىڭ كانۆون قالاسىندا وتەتىن IV قىسقى جاس وسپىرىمدەر وليمپياداسىنا وراي، قازاقستان قۇراماسى وسىعان دەيىنگى ويىنداردا قانشا مەدال جەڭىپ العانىن ەسكە تۇسىرە كەتۋدى ءجون سانادىق، دەپ حابارلايدى Kazinform.

2012-جىل: ينسبرۋك (اۋستريا) وليمپياداسى

قازاقستان قۇراماسى قىسقى جاس وسپىرىمدەر وليمپياداسىنا العاش 2012-جىلى ينسبرۋكتە وتكەن ويىنداردا ءوز ونەرىن ورتاعا سالدى. قازىرگە دەيىنگى ەڭ ۇلكەن جەتىستىگىمىز دە سول العاشقى اۋستريا جەرىندە تىركەلگەن بولاتىن.

اتاپ ايتساق، ۇلتتىق قۇراما مۇشەلەرى 2012-جىلى ينسبرۋكتە 1 كۇمىس جانە 2 قولا مەدالعا قول جەتكىزدى. ناتيجەسىندە جالپى كوماندالىق ەسەپتە 23-ورىنعا تابان تىرەگەن ەدى. اتالعان باستى دودادا گالينا ۆيشنيەۆسكايا-شەپورەنكو سپرينتتە كۇمىس جۇلدە، سوسىن ءىز كەسۋ سايىسىندا قولا مەدالعا قول جەتكىزدى.

ال سەرگەي مالىشيەۆ كلاسسيكالىق جۇرىسپەن 10 شاقىرىم جارىستا مارە سىزىعىن ءۇشىنشى بولىپ كەسىپ، قولا جۇلدەمەن ماراپاتتالىپ قايتتى.

2016-جىل: ليللەحاممەر (نورۆەگيا) وليمپياداسى

قازاقستان جاس وسپىرىمدەرى ەكىنشى رەت 2016-جىلى ليللەحاممەردە (نورۆەگيا) وتكەن وليمپيادا ويىندارىندا باق سىنادى. ناتيجەسىندە جەرلەستەرىمىز ءباسى بيىك باسەكەنى 2 قولا مەدالمەن اياقتادى. وسىلايشا جالپى كوماندالىق ەسەپتە 26-ورىندى مىسە تۇتتى.

نورۆەگيا تورىندە ءبىر قولا جۇلدەنى بياتلونشى ارينا پانتوۆا سپرينتتە جەڭىپ السا، ەكىنشى جۇلدەنى ەل قورجىنىنا ەليزابەت تۇرسىنبايەۆا مانەرلەپ سىرعاناۋ سپورتىنان سالدى.

2020-جىل: لوزاننا (شۆەيتساريا) وليمپياداسى

قازاق سپورتشىلارى ءۇشىنشى رەت 2020-جىلى لوزاننادا (شۆەيتساريا) وتكەن قىسقى ويىندارعا قاتىستى. وكىنىشكە قاراي، ەل نامىسىن قورعاۋعا بارعان 26 اتلەتىمىزدىڭ بىردە-ءبىرى جەڭىس تۇعىرىنان كورىنە المادى.

ايتا كەتەيىك، وڭتۇستىك كورەيانىڭ كانۆون قالاسىندا وتەتىن IV قىسقى جاس وسپىرىمدەر وليمپياداسىنىڭ باستالۋىنا ساناۋلى كۇندەر عانا قالدى.

كانۆون قالاسىندا ەل نامىسىن قورعاۋعا 42 اتلەتىمىز اتتانادى.

بۇگىن وليمپياداعا باراتىن سپورتشىلارىمىزدىڭ ەسىمى انىقتالدى.

اۆتوركۇنسۇلتان وتارباي