جاس تۇلەكتەرگە اتتەستات تاپسىرۋ ءراسىمى قاي كۇنگە بەلگىلەندى

استانا. KAZINFORM - بيىل 3,8 ميلليوننان استام وقۋشى وقۋ جىلىن اياقتايدى، ونىڭ 186 مىڭى - مەكتەپ تۇلەگى. وقۋ- اعارتۋ مينيسترلىگىنىڭ باسپا ءسوز قىزمەتى سوڭعى قوڭىراۋ سالتاناتتى ءىس-شاراسىنا قاتىستى تۇسىنىكتەمە بەردى.

«وڭىرلەردەگى سۋ تاسقىنى جاعدايىنا جانە 25-مامىردىڭ دەمالىس كۇنىنە سايكەس كەلۋىنە بايلانىستى 24-مامىر كۇنى بارلىق مەكتەپتە 2023-2024 وقۋ جىلىنىڭ اياقتالۋىنا ارنالعان سىنىپ ساعاتى ۇيىمداستىرىلادى. وندا سىنىپ جەتەكشىلەرى وقۋشىلارمەن بىرگە وتكەن وقۋ جىلىن قورىتىندىلايدى» - دەدى وقۋ-اعارتۋ مينيسترلىگى تاربيە جۇمىسى جانە قوسىمشا ءبىلىم بەرۋ دەپارتامەنتى ديرەكتورىنىڭ ورىنباسارى قارلىعاش قۇرمانبەكوۆا.

حابارلامادا ايتىلعانداي، بيىل وقۋ جىلى 34 اپتا، وقۋ 25-مامىردا اياقتالادى. سونداي-اق، مينيسترلىكتەن 11 (12)-سىنىپ تۇلەكتەرىنە اتتەستات تاپسىرۋ جانە «التىن بەلگىمەن» ماراپاتتاۋ ءراسىمى بارلىق ەمتيحان اياقتالعاننان كەيىن (12-15-ماۋسىم) وتەتىنى ايتىلدى.

«9-11-سىنىپ تۇلەكتەرىنىڭ قاۋىپسىزدىگىن جانە ەمتيحاندارعا ساپالى دايىندىعىن قامتاماسىز ەتۋ ماقساتىندا اقشا جيناۋعا، سالتاناتتى ءىس-شارالار، بانكەتتەر ۇيىمداستىرۋعا جانە اۆتوموبيلدەرمەن كوشە ارالاۋعا تىيىم سالىنادى»، - دەدى ۆەدومستۆودان.

اۆتور
داۋلەت ىزتىلەۋ