جاس قازاقستاندىق فۋتبولشىلار سەربياداعى حالىقارالىق ءتۋرنيردىڭ جۇلدەگەرى اتاندى
بەلگراد. KAZINFORM - شىمكەنت قالاسىنداعى «ورداباسى» ف ك جانە «وڭتۇستىك» اكادەمياسىنىڭ تاربيەلەنۋشىلەرى العاش رەت Dragan Mance Cup (سەربيا) بالالارعا ارنالعان فۋتبولدان حالىقارالىق تۋرنيرگە قاتىستى.
11-17-ماۋسىم ارالىعىندا وتكەن تۋرنيرگە ەۋروپانىڭ 16 ەلىنەن 288 كوماندا بارعان.
قازاقستاننىڭ سەربيا رەسپۋبليكاسىنداعى ەلشىلىگى ءمالىم ەتكەندەي، «ورداباسى» ف ك اكادەمياسىنىڭ فۋتبولشىلارى U12 جاس ساناتىندا ءۇشىنشى ورىن الدى. ولار جارتىلاي فينالدا گرەتسيادان كەلگەن كوماندادان جەڭىلدى. جاس قازاقستاندىق سپورتشىلار ءۇشىن بەلگراد بويىنشا تانىمدىق ەكسكۋرسيالار ۇيىمداستىرىلدى. سونىمەن قاتار بالالار سەربيا فۋتبولىنىڭ فلاگماندارى مەن ەۋروكۋبوكتاردىڭ تۇراقتى قاتىسۋشىلارى - «سرۆەنا زۆەزدا» ف ك مەن «پارتيزان» ف ك ستاديوندارىنا باردى.
جىل سايىن سەربيا استاناسى بەلگراد ايگىلى سەربيالىق فۋتبولشىنى، پارتيزان ف ك مەن يۋگوسلاۆيا قۇراماسى دراگان مانزەنى ەسكە الۋعا ارنالعان Dragan Mance Cup حالىقارالىق تۋرنيرىندە ەۋروپانىڭ تۇكپىر-تۇكپىرىنەن جاس فۋتبولشىلاردى قابىلدايدى. بيىل قازاقستاندىق كوماندالاردىڭ جارىسقا قاتىسۋى سەربيالىق فۋتبول فۋنكتسيونەرلەرى ۆلاديمير رىبيچ پەن گوران ستانويەۆيچتىڭ بەلسەندى سپورتتىق ديپلوماتياسىنىڭ ارقاسىندا مۇمكىن بولدى.