جاس دومبىراشىلار «ورتەكە» كۇيىن شەرتىپ، گيننەستىڭ رەكوردتار كىتابىنا ەندى
پاۆلودار. KAZINFORM - دۇنيەجۇزىلىك كوشپەندىلەر ويىنى قارساڭىندا پاۆلودارلىق وقۋشىلار ۇلتتىق «ورتەكە» بيىنەن قازاقستاننىڭ رەكوردىن ورناتتى. ءبىر مەزەتتە 100 دومبىراشى ورتەكەلەردى بيلەتىپ، ەرتىس جاعاسىن كۇمبىرلەگەن كۇيگە بولەدى.
«ورتەكە» ارنايى جاسالعان تۇعىرعا ورناتىلىپ، دومبىراشىنىڭ ساۋساعىنا جىپپەن بايلانادى. كۇيشى اسپاپتا ويناي باستاعاندا، دومبىرا شەرتكەن ساۋساقتاردىڭ قوزعالىسىمەن قۋىرشاق تا تىقىلداپ بيلەي جونەلەدى.
بىلتىر قازاقتىڭ «ورتەكە» ءبيى يۋنەسكو- نىڭ ماتەريالدىق ەمەس قۇندىلىقتار تىزىمىنە قوسىلعان بولاتىن. بۇل دا ۇلتتىق مادەنيەتىمىزدىڭ مايەكتەرىن الەم مويىنداي باستاعانىنىڭ كورىنىسى. «ورتەكە» بيىنەن قازاقستان رەكوردىن ورناتۋ يدەياسىن پاۆلودار قالاسىنىڭ اكىمدىگى ۇسىنعان.
- «ورتەكە» ءبيىن جاستار اراسىندا، سونىڭ ىشىندە وقۋشىلارعا تانىتۋ ماقساتىندا كونستيتۋتسيا كۇنىنە وراي ءارى دۇنيەجۇزىلىك كوشپەندىلەر ويىنى قارساڭىندا 100 جاس دومبىراشىنى شاقىرىپ، وسىنداي يگى مادەني شارانى ۇيىمداستىرۋدىڭ ءساتى ءتۇستى. بۇل جەردە كاسىبي دومبىراشىلاردى دا تارتۋعا بولار ەدى. دەيتۇرعانمەن، تاڭداۋىمىز ونەردە جولىن ەندى باستاپ جاتقان جاس ورەندەرگە ءتۇستى. اكىمدىكتىڭ تاپسىرىس بەرۋىمەن شەبەرلەر 100 ورتەكەنى ارنايى جاساپ بەردى. بۇل بۇيىمدار كەيىن جەرگىلىكتى مۋزىكالىق مەكتەپتەر مەن مۋزىكالىق كوللەدجگە، وزگە مەكتەپتەر مەن بالالار كلۋبتارىنداعى دومبىرا ۇيىرمەلەرىنە تاراتىپ بەرىلەدى، - دەيدى پاۆلودار قالاسى اكىمىنىڭ كەڭەسشىسى دانيار ءجۇمادىلوۆ.
جاس دومبىراشىلاردىڭ ونەرىن جەرگىلىكتى كورەرمەن ەرتىس وزەنى جاعالاۋىندا ورنالاسقان «Ertis Promenade» ساحناسىندا تاماشالادى. قازاقستان رەكوردىن ورناتۋعا پاۆلودار قالاسىنداعى قۇرمانعازى اتىنداعى بالالار مۋزىكا مەكتەبى، مۋزىكالىق كوللەدج -دارىندى بالالارعا ارنالعان مۋزىكالىق-مەكتەپ ينتەرنات كەشەنى، «جىگەر» بالالار- جاسوسپىرىمدەر كلۋبىنىڭ ونەرپازدارى قاتىستى.
مۋزىكالىق كوللەدج - دارىندى بالالارعا ارنالعان مۋزىكالىق- مەكتەپ ينتەرنات كەشەنىنىڭ باسشىسى سەرىك سىزدىقوۆتىڭ سوزىنشە، «ورتەكە» - كۇيشىلىك ونەردەگى تارتىمدىلىق ءارى كورنەكىلىك ءۇشىن قولدانىلاتىن جانر.
- كۇيشىلىك ونەردە جۇرگەن شەبەر دومبىراشىلار «ورتەكەنى» كونەدەن بەرى شەبەر بيلەتە بىلگەن. ەكىنشى جاعىنان بالالارعا ارنالعان شىعارمالاردى دارىپتەۋ ءۇشىن تاپتىرماس ونەر ءتۇرى. حالقىمىزدىڭ تابيعاتقا جاقىندىعىن، جابايى جانۋارلارعا دەگەن قامقورلىعىن تانىتاتىن ەرەكشەلىگى دە بار. ءبىلىم بەرۋ ۇيىمدارى ونەرلى بالالاردىڭ باسىن قوسىپ، ورتەكەلەردى بيلەتە وتىرىپ، «قاراجورعا» ، «سالكۇرەڭ»، «سەكىرتپە» كۇيلەرىن ساحنادا ءساتتى ورىنداپ شىقتى. مۇنداي رەكوردقا كوشپەندىلەر ويىنى قارساڭىندا قول جەتكىزىپ وتىرعانىمىزعا قۋانىشتىمىز. ەرتىستىڭ پاۆلودار ءوڭىرى ءۇشىن بۇل - تاريحي ءىس-شارا، - دەيدى سەرىك قاسىمحان ۇلى.
(كينەس) قازاقستان رەكوردتار كىتابىنىڭ رەسمي وكىلى قۋاندىق قۇدايبەرگەنوۆ پاۆلودارلىقتاردى جاڭا رەكوردپەن قۇتتىقتاپ، اتالعان مەكتەپتەردىڭ وكىلدەرىنە سەرتيفيكاتتار تابىس ەتتى.
اۆتور
مۇرات اياعان