جاس ءوسپىرىمنىڭ ولىمىنە قاتىستى قىلمىسكەرلەردىڭ سوتى اشىق ءوتۋى كەرەك - مارات قوجايەۆ

استانا. KAZINFORM - ىشكى ىستەر ءمينيسترىنىڭ بۇرىنعى ءبىرىنشى ورىنباسارى جانە جاقىندا سەناتور بولعان مارات قوجايەۆ تالعار اۋدانىندا 16 جاستاعى جاس ءوسپىرىمدى ولتىرگەن قىلمىسكەرلەر سوتىنا قاتىستى پىكىر ايتتى.

بۇگىن سەناتتىڭ جالپى وتىرىسىنان كەيىن تىلشىلەر دەپۋتاتتان اتالعان ءىس بويىنشا سوت وتىرىسىن اشىق ءارى ونلاين وتكىزۋ تۋرالى قوعام تالابىنا قاتىستى پىكىرىن سۇرادى.

ءوز كەزەگىندە م. قوجايەۆ اشىق تالقىلاۋ سوت شەشىمىنە سايكەس بولاتىنىن ايتتى.

«قوعام اشىق سوت بولۋىن تالاپ ەتىپ وتىر. مەنىڭ ويىمشا، قوعامداعى كۇردەلى ماسەلەلەردى اشىق تۇردە تالقىلاۋ كەرەك»، - دەدى سەناتور.

ايتا كەتەيىك، بيىل 4-قازان كۇنى قازاقستان سۋديالارىنىڭ سەزىندە ق ر پرەزيدەنتى قاسىم-جومارت توقايەۆ سوتتى ونلاين وتكىزۋدىڭ ۇتىمدى جاقتارىن ايتتى.

مەملەكەت باسشىسى بيىل سوت وتىرىستارى العاش رەت ونلاين كورسەتىلە باستاعانىن، وسىنداي تاسىلمەن بىرنەشە سوت پروتسەسى وتكەنىن ەسكە سالدى.

بۇدان بۇرىن حابارلانعانداي، تاياۋدا پرەزيدەنت جارلىعىمەن مارات قوجايەۆ قازاقستان پارلامەنتى سەناتىنىڭ دەپۋتاتى بولىپ تاعايىندالدى. ول ىشكى ىستەر ءمينيسترىنىڭ ءبىرىنشى ورىنباسارى لاۋازىمىنان بوساتىلدى.

ەسكە سالايىق، بۇعان دەيىن 4-قازان كۇنى تالعار قالاسىنداعى توبەلەستەن جاس ءوسپىرىم قايتىس بولعانىن جازعانبىز.

الماتى وبلىسىنىڭ پوليتسيا دەپارتامەنتى تالعار قالاسىندا 16 جاستاعى جاس ءوسپىرىمنىڭ ولىمىنە قاتىسى بار كۇدىكتىلەردىڭ قونايەۆ قالاسىنا جەتكىزىلگەنىن حابارلادى.

ىشكى ىستەر ءمينيسترى تالعارداعى جاس ءوسپىرىمنىڭ ولىمىنە قاتىستى ءىستى باقىلاۋعا الدى.

اۆتور
رۋسلان عابباسوۆ