جاس ءوسپىرىمدى اسكەرگە كوشەدەن ەرىكسىز الىپ كەتۋ زاڭدى ما - مينيسترلىك جاۋابى
استانا. KAZINFORM - قورعانىس مينيسترلىگى جاستاردى اسكەرگە كوشەدەن نەمەسە جۇمىس ورنىنان سۇيرەپ الىپ كەتۋگە قاتىستى تۇسىنىك بەردى.
ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا تومەندەگى ساۋال قويىلدى: «قازىر كامەلەت جاسىنا تولعان جاستاردى وقۋ ورنىندا وقىماسا، كوشەدە، جۇمىس نەمەسە دەمالىس ورنىنان اسكەرگە كۇشتەپ الىپ كەتىپ جاتىر. ءتىپتى اتا-اناسىمەن دە سويلەستىرمەي الىپ كەتكەن جاعدايلار بار. جاستاردى كوشەدەن ۇستاپ الىپ، اسكەرگە اكەتۋ قانشالىقتى زاڭدى؟».
«جالپى بۇل ارەكەت كوكتەمگى شاقىرىلىمدا بولدى، كۇزگى شاقىرىلىمدا ول ارەكەتكە بارعان جوقپىز، سەبەبى ماسەلەنىڭ وڭتايلى شەشىمى تابىلدى. قازىرگى تاڭدا اكىمنىڭ يدەولوگيا جونىندەگى ورىنباسارلارى جاستاردى تاربيەلەۋ باعىتىندا جۇمىس جۇرگىزىپ جاتىر. سول سياقتى العاشقى اسكەري دايىندىق ءپانى مۇعالىمدەرىمەن دە تىعىز جۇمىس قولعا الىندى. ودان قالدى زەينەتتەگى اسكەري ارداگەرلەردىڭ ۇگىت-ناسيحات شارالارىنىڭ ارقاسىندا ءبىز قازىر كوشەدەن ۇستاۋ نەمەسە كۇشتەپ اكەتۋگە جول بەرىپ جاتقان جوقپىز»، - دەپ جاۋاپ بەردى ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىسى دەپارتامەنتى باستىعىنىڭ ورىنباسارى فارحات ايداربەكوۆ و ك ق- دە وتكەن بريفينگىدە.
سونىمەن قاتار اتالعان ماسەلەگە قاتىستى قورعانىس مينيسترلىگىنىڭ رەسمي وكىلى رۋسلان جانگۋلين پىكىر ءبىلدىردى.
«وسىنداي فاكتىلەر كوبىنەسە باق جانە الەۋمەتتىك جەلىلەردە تاراپ جاتادى، ءبىراق ولاردىڭ سانى كوپ ەمەس. اسكەر قاتارىنا جىلىنا 40 مىڭعا تارتا ازاماتتى شاقىرساق، ولاردىڭ اراسىندا كوشەدەن الىپ كەتكەن بىرەر جاعداي بولىپ قالۋى مۇمكىن. ىشكى ىستەر ورگاندارى اسكەرگە كەلمەي جۇرگەندەردى ىزدەستىرۋ شارالارىن قامتاماسىز ەتەدى، بۇل جەردە ىشكى ىستەر ورگاندارىنىڭ ارەكەتتەرى زاڭدى. ال ازامات نەلىكتەن ءوزى كەلمەيدى؟ ونىڭ ءارتۇرلى سەبەپتەرى بار، مىسالى، ول ءبىر جەردە تىركەۋدە تۇرىپ، ءوزى باسقا قالادا ءجۇرۋى مۇمكىن»، - دەيدى ول.