جارتى جىلدا 592 جوعارى لاۋازىمدى تۇلعا ءىستى بولدى - انتيكور
استانا. KAZINFORM - جارتى جىلدا 876 قىلمىستىق قۇقىق بۇزۋشىلىق تىركەلدى. ونىڭ ەداۋىر بولىگى پاراقورلىقپەن، اقشا جىمقىرۋمەن جانە لاۋازىمدىق وكىلەتتىكتەردى تەرىس پايدالانۋمەن بايلانىستى، دەپ حابارلايدى سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى.
اكىمدىكتەردىڭ، كۆازيمەملەكەتتىك سەكتوردىڭ جانە قۇقىق قورعاۋ ورگاندارىنىڭ قىزمەتكەرلەرى جەمقورلىققا بارىنشا بەيىم. جەمقورلىق تاۋەكەلدەرى جوعارى سالالارعا ءبىلىم بەرۋ، اۋىل شارۋاشىلىعى، دەنساۋلىق ساقتاۋ جانە الەۋمەتتىك قامسىزداندىرۋ سالالارى جاتادى.
ۆەدومستۆو باسشىسى ا. جۇماعالي اتاپ وتكەندەي، اگەنتتىك جوعارى لاۋازىمدى تۇلعالاردىڭ قاتىسۋىمەن قىلمىستىق سحەمالاردى اشكەرەلەۋگە بايلانىستى ساندىق ەمەس، ساپالىق كورسەتكىشتەرگە باعدارلانعان.
انىقتالعان قىلمىستاردى جاساۋدا 592 ادام اشكەرەلەندى، ونىڭ ىشىندە 107 ءسى - باسشى.
ولاردىڭ ىشىندە بۇرىنعى مينيسترلەر، ۆيتسە-مينيسترلەر، كوميتەت ءتوراعالارى، وبلىستىق باسشىلار بار.
سىبايلاس جەمقورلىققا قارسى قىزمەت ادىلەت ەكس-مينيسترىنە جانە باسقا دا ادامدارعا قاتىستى سوتقا دەيىنگى تەرگەپ-تەكسەرۋدى اياقتادى.
ول جەكە كومپانيانىڭ باسشىلىعىمەن بىرگە بيۋجەت قاراجاتىن اسا ءىرى مولشەردە جىمقىردى، الاياقتىق جاسادى جانە كاسىپكەرلىك قىزمەتكە زاڭسىز قاتىستى دەپ كۇدىكتەنەدى.
سونداي-اق، اگەنتتىك بۇرىنعى مادەنيەت جانە سپورت ۆيتسە-ءمينيسترى مەن مەردىگەر ۇيىمنىڭ باسشىلىعىنا قاتىستى لاۋازىمدىق وكىلەتتىكتەرىن اسىرا پايدالاندى جانە بيۋجەت قاراجاتىن جىمقىردى دەگەن كۇدىك بويىنشا قىلمىستىق ءىستى تەرگەۋدى اياقتادى.
اتالعان ىستەردىڭ ءارقايسىسى بويىنشا زالال 1 ميلليارد تەڭگەدەن اسادى.
قاراعاندى وبلىسى بويىنشا سىبايلاس جەمقورلىققا قارسى قىزمەت قىزمەتتىك وكىلەتتىكتەرىن اسىرا پايدالاندى دەگەن كۇدىك بويىنشا ق ر ت ج جونىندەگى بۇرىنعى ءبىرىنشى ۆيتسە-مينيسترىنە قاتىستى سوتقا دەيىنگى تەرگەپ-تەكسەرۋدى اياقتادى.
ول ق ر ت ج م اسكەري ءبولىمىنىڭ قولباسشىلىعىنا جانە قاراعاندى وبلىسى ت ج دەپارتامەنتىنىڭ لاۋازىمدى تۇلعالارىنا جەكە ءۇي سالۋ ءۇشىن اسكەري قىزمەتشىلەر مەن ارنايى تەحنيكانى تارتۋ تۋرالى زاڭسىز نۇسقاۋلار بەردى دەپ كۇدىكتەلۋدە.
زەرتتەۋ ناتيجەلەرى بويىنشا باس اسكەري پروكۋراتۋرا قىلمىستىق ءىستى ءمانى بويىنشا قاراۋ ءۇشىن اقمولا گارنيزونىنىڭ اسكەري سوتىنا جىبەردى.
استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ ۇكىمىمەن ق ر ا ش م بالىق شارۋاشىلىعى كوميتەتىنىڭ ءتوراعاسى ن. ت. ءجۇنىسوۆ جانە ونىڭ قاراماعىنداعىلار - بالىق رەسۋرستارىن قورعاۋ جانە بالىق اۋلاۋدى رەتتەۋ باسقارماسىنىڭ باسشىسى ە. ك. سۋىقبايەۆ سوتتالدى.
سوت ۇكىمىمەن ولارعا 6 جىلعا باس بوستاندىعىنان ايىرۋ جازاسى تاعايىندالدى.
سونىمەن قاتار، اتالعان ادامدار مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلدى.
ولار جالپى قامقورلىعى ءۇشىن 2021-جىلدان 2024-جىلدىڭ اقپانىنا دەيىن شاعىن جانە ورتا بيزنەس وكىلدەرىنەن جۇيەلى تۇردە پارا الدى دەپ ايىپتالدى.
ۇكىم زاڭدى كۇشىنە ەنگەن جوق.
سولتۇستىك قازاقستان وبلىسىندا وبلىستىق قىلمىستىق-اتقارۋ جۇيەسى دەپارتامەنتىنىڭ باستىعى اشكەرەلەندى.
ول س ق و قىلمىستىق-اتقارۋ جۇيەسى مەكەمەلەرىنە ۇن جەتكىزۋ بويىنشا قىزمەتتەردى مەملەكەتتىك ساتىپ الۋ شارتىن جاساسۋعا جاردەمدەسكەنى ءۇشىن كاسىپكەرلىك سۋبەكتىسىنەن 1 ميلليون تەڭگە كولەمىندە پارا الدى دەپ كۇدىكتەلۋدە.
سوتتىڭ سانكتسياسىمەن كۇدىكتى ءۇي قاماعىنا الىندى.
وسكەمەن قالاسىنىڭ 2-سوتى ق ا ج د باستىعىنىڭ ش ق و بويىنشا ورىنباسارى ق. ا. زيانوۆقا قاتىستى ۇكىم شىعاردى.
ول سوتتالعان - «وپەراتور روپ» ج ش س بۇرىنعى باسشىسى م. قۇمارعاليەۆ ءۇشىن جازاسىن وتەۋدىڭ قولايلى جانە ارتىقشىلىقتى جاعدايلارىن جاساۋ جولىمەن لاۋازىمدىق وكىلەتتىكتەرىن تەرىس پايدالانعانى ءۇشىن كىنالى دەپ تانىلدى.
سوت ۇكىمىمەن زيانوۆقا 1 جىل مەرزىمگە باس بوستاندىعىنان ايىرۋ، مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرۋ جانە «ادىلەت پودپولكوۆنيگى» ارناۋلى اتاعىنان ايىرۋ تۇرىندەگى جازا تاعايىندالدى.
ۇكىم زاڭدى كۇشىنە ەنگەن جوق.
كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.