ءتيىستى قاۋلىنى ۇكىمەت 2026-جىلعى 5-قازاندا قابىلدادى. قۇجات 2027-جىلعى 1-قاڭتاردان باستاپ كۇشىنە ەنەدى.
ۇكىمەتتىڭ 870-قاۋلىسىمەن مەملەكەتتىك جاردەماقىلاردىڭ ءتىزىمى جانە ولاردى تاعايىنداۋ، تولەۋدى توقتاتۋ، قايتا باستاۋ جانە توقتاتۋ شارتتارى بەكىتىلدى.
قانداي جاردەماقىلار قامتىلادى؟
جاڭا قاۋلى مىناداي 10 جاردەماقى تۇرىنە قاتىستى:
بالا تۋعان كەزدە بەرىلەتىن ءبىرجولعى مەملەكەتتىك جاردەماقى؛
بالا 1,5 جاسقا تولعانعا دەيىن ونىڭ كۇتىمىنە بايلانىستى اي سايىنعى مەملەكەتتىك جاردەماقى؛
ءتورت جانە ودان دا كوپ بىرگە تۇراتىن كامەلەتكە تولماعان بالاسى بار كوپبالالى وتباسىلارعا بەرىلەتىن اي سايىنعى مەملەكەتتىك جاردەماقى؛
«التىن القا»، «كۇمىس القا» يەگەرلەرىنە، سونداي-اق «باتىر انا» اتاعىن العان جانە «انا داڭقى» وردەندەرىمەن ماراپاتتالعان كوپبالالى انالارعا بەرىلەتىن اي سايىنعى جاردەماقى؛
مۇگەدەكتىك بويىنشا مەملەكەتتىك الەۋمەتتىك جاردەماقى؛
اسىراۋشىسىنان ايىرىلعان جاعدايدا بەرىلەتىن مەملەكەتتىك الەۋمەتتىك جاردەماقى؛
ارناۋلى مەملەكەتتىك جاردەماقى؛
ءبىرىنشى توپتاعى مۇگەدەكتىگى بار ادامعا كۇتىم جاسايتىن ادامدارعا بەرىلەتىن مەملەكەتتىك جاردەماقى؛
مۇگەدەكتىگى بار بالانى تاربيەلەپ وتىرعان اتا-اناعا، اسىراپ الۋشىعا نەمەسە قامقورشىعا بەرىلەتىن مەملەكەتتىك جاردەماقى؛
ارناۋلى كاسىپتىك مەملەكەتتىك جاردەماقى.
جاردەماقى الۋعا وتباسىنىڭ الەۋمەتتىك جاعدايى دا ەسكەرىلەدى
قاۋلىعا سايكەس، وسى جاردەماقىلاردىڭ باسىم بولىگى جانە جەرلەۋگە بەرىلەتىن ءبىرجولعى تولەم مۇقتاجدىق قاعيداتى نەگىزىندە تاعايىندالادى. ياعني وتباسىنىڭ نەمەسە ادامنىڭ الەۋمەتتىك جاعدايى وبەكتيۆتى تۇردە باعالانادى.
الايدا بۇل تالاپ بارلىق جاردەماقىعا بىردەي قولدانىلمايدى.
مىسالى، «التىن القا»، «كۇمىس القا» يەگەرلەرىنە جانە «باتىر انا» اتاعىن العان ايەلدەرگە بەرىلەتىن جاردەماقىعا، بەلگىلى ءبىر ساناتتاعى مۇگەدەكتىگى بار ادامدارعا بەرىلەتىن الەۋمەتتىك جاردەماقىلارعا، اتا-اناسىنىڭ ەكەۋىنەن دە ايىرىلعان بالالارعا بەرىلەتىن اسىراۋشىسىنان ايىرىلۋ جاردەماقىسىنا، سونداي-اق ارناۋلى جانە ارناۋلى كاسىپتىك مەملەكەتتىك جاردەماقىلارعا الەۋمەتتىك جاعدايدى باعالاۋ قولدانىلمايدى.
الەۋمەتتىك جاعدايدى باعالاۋ ءۇشىن نە قاجەت؟
جاردەماقى تاعايىنداۋ كەزىندە كامەلەتكە تولعان وتباسى مۇشەلەرى وزدەرىنىڭ دەربەس دەرەكتەرىن جيناۋعا، وڭدەۋگە، تەكسەرۋگە، جاڭارتۋعا جانە بەرۋگە كەلىسىم بەرۋى كەرەك.
بۇل رەتتە وتباسىنىڭ الەۋمەتتىك جاعدايىن باعالاۋ ءۇشىن بانك جانە زاڭمەن قورعالاتىن باسقا دا قۇپيا مالىمەتتەر، سونداي-اق كرەديتتەر بويىنشا بەرەشەك، اي سايىنعى تولەم جانە مەرزىمى وتكەن نەمەسە قالعان قارىز تۋرالى اقپارات الىنۋى مۇمكىن.
قانداي جاعدايدا جاردەماقى ۋاقىتشا توقتاتىلادى؟
قاۋلىدا جاردەماقى تولەمىن ۋاقىتشا توقتاتۋعا نەگىز بولاتىن جاعدايلار دا ناقتى كورسەتىلگەن.
ولاردىڭ قاتارىندا ءۇش اي نەمەسە ودان دا كوپ ۋاقىت بويى بانك شوتىندا شىعىس وپەراتسيالارىنىڭ بولماۋى، جاردەماقى الۋشىنىڭ قازاقستاننان تۇراقتى تۇرۋعا كەتۋى، سوت شەشىمىمەن باس بوستاندىعىنان ايىرىلۋى جانە تولىق مەملەكەتتىك قامسىزداندىرىلاتىن ارنايى الەۋمەتتىك قىزمەت كورسەتۋ ورتالىعىندا تۇرۋى بار.
سونىمەن قاتار كەيبىر جاردەماقىلار الۋشىنىڭ قۇجاتتارىنىڭ قولدانىلۋ مەرزىمى اياقتالعان جاعدايدا، ءىز-ءتۇزسىز جوعالعان دەپ تانىلعان كەزدە نەمەسە ازاماتتىعى توقتاتىلعان جاعدايدا دا ۋاقىتشا توقتاتىلۋى مۇمكىن.
مىسالى، بالا كۇتىمىنە بايلانىستى جاردەماقى الۋشىنىڭ بانك شوتىندا ءۇش اي نەمەسە ودان دا كوپ ۋاقىت بويى شىعىس وپەراتسيالارى بولماسا، تولەم ۋاقىتشا توقتاتىلادى.
جاردەماقى قاشان قايتا تولەنەدى؟
تولەمدى توقتاتۋعا سەبەپ بولعان جاعداي جويىلعاننان كەيىن جاردەماقىنى قايتا باستاۋعا بولادى.
ول ءۇشىن ازامات ءوتىنىش بەرەدى. قاجەتتى جاعدايدىڭ جويىلعانىن راستايتىن قۇجاتتار نەمەسە سيفرلىق جۇيەلەردەگى مالىمەتتەر نەگىزگە الىنادى.
مىسالى، كوپبالالى وتباسىعا بەرىلەتىن جاردەماقى بالا 18 جاسقا تولعان كەزدە ۋاقىتشا توقتاتىلۋى مۇمكىن. ەگەر بالا وقۋىن جالعاستىرسا، تولەم قايتا باستالادى. بۇل رەتتە ول كۇندىزگى وقۋ نىسانىندا جالپى ورتا، تەحنيكالىق جانە كاسىپتىك، ورتا بىلىمنەن كەيىنگى، جوعارى نەمەسە جوعارى وقۋ ورنىنان كەيىنگى ءبىلىم الۋى كەرەك. تولەم بالا 23 جاسقا تولعانعا دەيىن جالعاسۋى مۇمكىن.
قانداي جاعدايدا جاردەماقى تولىق توقتاتىلادى؟
جاردەماقى تولەۋ توقتاتىلاتىن جاعدايلاردىڭ ءبىرى - الۋشىنىڭ نەمەسە بالاعا بايلانىستى تولەم تاعايىندالعان جاعدايدا بالانىڭ قايتىس بولۋى.
سونداي-اق بالانىڭ تولىق مەملەكەتتىك قامسىزداندىرۋعا الىنۋى، جاردەماقى الۋ ءۇشىن جالعان مالىمەتتەردىڭ بەرىلۋى، اتا-انا قۇقىعىنان ايىرىلۋ نەمەسە شەكتەلۋ، بالا اسىراپ الۋدىڭ كۇشىن جويۋ، قازاقستان ازاماتتىعىنىڭ توقتاتىلۋى سياقتى جاعدايلار تولەمنىڭ توقتاتىلۋىنا نەگىز بولادى.
بالا كۇتىمىنە بايلانىستى جاردەماقى بالا 1,5 جاسقا تولعانعا دەيىن تولەنەدى. سونىمەن قاتار بالا قايتىس بولعان جاعدايدا، تولىق مەملەكەتتىك قامسىزداندىرۋعا الىنعاندا نەمەسە جاردەماقى زاڭسىز تاعايىندالعانى انىقتالعاندا تولەم توقتاتىلادى.
مۇگەدەكتىك بويىنشا جاردەماقىعا قاتىستى نە وزگەرەدى؟
مۇگەدەكتىك بويىنشا مەملەكەتتىك الەۋمەتتىك جاردەماقى تاعايىنداۋ ءۇشىن ازاماتتىڭ وعان زاڭناماعا سايكەس قۇقىعى بولۋى كەرەك.
تولەم بانك شوتىندا ءۇش ايدان استام شىعىس وپەراتسيالارى بولماعان جاعدايدا، قۇجاتتاردىڭ قولدانىلۋ مەرزىمى اياقتالعاندا، الۋشى قازاقستاننان تۇراقتى تۇرۋعا كەتكەندە نەمەسە جاردەماقىنى زاڭسىز تاعايىنداۋعا سەبەپ بولعان جالعان مالىمەتتەر انىقتالعاندا توقتاتىلۋى مۇمكىن.
سونىمەن قاتار شەتەلدە مۇگەدەكتىك بويىنشا زەينەتاقى الىپ وتىرعانى انىقتالعان جاعدايدا دا تولەم توقتاتىلادى.
كۇتىم جاسايتىن ادامدارعا بەرىلەتىن جاردەماقى
ءبىرىنشى توپتاعى مۇگەدەكتىگى بار ادامعا كۇتىم جاسايتىن ادامدارعا بەرىلەتىن جاردەماقى دا جاڭا قاۋلىدا قاراستىرىلعان.
ونى تولەۋ بانك شوتىندا ءۇش اي نەمەسە ودان دا كوپ ۋاقىت بويى وپەراتسيا بولماعان جاعدايدا، كۇتىم جاساۋشى ادامنىڭ قۇجاتتارىنىڭ مەرزىمى اياقتالعاندا، ونىڭ نەمەسە مۇگەدەكتىگى بار ادامنىڭ باسقا ەلگە تۇراقتى تۇرۋعا كەتكەنىندە ۋاقىتشا توقتاتىلۋى مۇمكىن.
ال مۇگەدەكتىگى بار ادامنىڭ نەمەسە كۇتىم جاساۋشى ادامنىڭ قايتىس بولۋى، ازاماتتاردىڭ باسقا ەلگە تۇراقتى تۇرۋعا كەتۋى، مۇگەدەكتىك توبىنىڭ وزگەرۋى نەمەسە الۋشىنىڭ ءوتىنىشى تولەمدى توقتاتۋعا نەگىز بولادى.
مۇگەدەكتىگى بار بالانى تاربيەلەپ وتىرعاندارعا تولەم
مۇگەدەكتىگى بار بالانى تاربيەلەپ وتىرعان اتا-اناعا، اسىراپ الۋشىعا نەمەسە قامقورشىعا بەرىلەتىن جاردەماقى دا وسى قاۋلىدا قامتىلعان.
تولەم بانك شوتىندا ءۇش ايدان استام وپەراتسيا بولماعان جاعدايدا، الۋشى شەتەلگە تۇراقتى تۇرۋعا كەتكەندە، باس بوستاندىعىنان ايىرىلعاندا، تولىق مەملەكەتتىك قامسىزداندىرۋ جاعدايىندا بولعاندا نەمەسە قاجەتتى قۇجاتتاردىڭ مەرزىمى اياقتالعاندا ۋاقىتشا توقتاتىلۋى مۇمكىن.
بالا قايتىس بولعاندا، تولىق مەملەكەتتىك قامسىزداندىرۋعا الىنعاندا، جالعان مالىمەت بەرىلگەنى انىقتالعاندا نەمەسە الۋشىنىڭ قازاقستان ازاماتتىعى توقتاعاندا تولەم توقتاتىلادى.
كوپبالالى وتباسىلارعا قاتىستى قانداي تالاپتار بار؟
كوپبالالى وتباسىلارعا بەرىلەتىن جاردەماقىنى الۋ ءۇشىن وتباسىندا ءتورت جانە ودان دا كوپ بىرگە تۇراتىن كامەلەتكە تولماعان بالا بولۋى كەرەك.
18 جاسقا تولعان بالا كۇندىزگى بولىمدە وقۋىن جالعاستىرسا، جاردەماقى تولەۋ قايتا باستالۋى مۇمكىن. بۇل جاعدايدا تولەم بالا 23 جاسقا تولعانعا دەيىن جالعاسادى.
ال بالا وقۋ ورنىنان شىعارىلسا، تولىق مەملەكەتتىك قامسىزداندىرۋعا الىنسا، اتا-انا قۇقىعىنان ايىرىلسا نەمەسە قازاقستان ازاماتتىعىن توقتاتسا، جاردەماقى تولەۋ توقتاتىلۋى مۇمكىن.
«التىن القا» جانە «كۇمىس القا» يەگەرلەرىنە بەرىلەتىن جاردەماقى
«التىن القا»، «كۇمىس القا» يەگەرلەرى مەن «باتىر انا» اتاعىن العان، سونداي-اق «انا داڭقى» وردەندەرىمەن ماراپاتتالعان ايەلدەرگە بەرىلەتىن جاردەماقى دا جاڭا تارتىپپەن رەتتەلەدى.
تولەم ءۇش اي نەمەسە ودان دا كوپ ۋاقىت بويى بانك شوتىندا وپەراتسيا بولماعان جاعدايدا، الۋشى شەتەلگە تۇراقتى تۇرۋعا كەتكەندە، باس بوستاندىعىنان ايىرىلعاندا نەمەسە قۇجاتتارىنىڭ مەرزىمى اياقتالعاندا ۋاقىتشا توقتاتىلۋى مۇمكىن.
ال مەملەكەتتىك ناگرادادان ايىرىلعان جاعدايدا، جالعان مالىمەت بەرگەنى انىقتالسا، قازاقستان ازاماتتىعى توقتاتىلسا نەمەسە الۋشى قايتىس بولسا، تولەم تولىق توقتاتىلادى.
جەرلەۋگە بەرىلەتىن تولەم قانشا بولادى؟
قاۋلىدا جەرلەۋگە بەرىلەتىن ءبىرجولعى تولەمنىڭ مولشەرى دە كورسەتىلگەن.
جاسىنا بايلانىستى زەينەتاقى تولەمدەرىن نەمەسە مەملەكەتتىك بازالىق زەينەتاقى تولەمىن الۋشى قايتىس بولعان جاعدايدا، ونىڭ وتباسىنا نەمەسە جەرلەۋدى ۇيىمداستىرعان ادامعا رەسپۋبليكالىق بيۋجەتتەن ءبىرجولعى جەرلەۋ تولەمى بەرىلەدى.
ونىڭ مولشەرى ءتيىستى قارجى جىلىنا ارنالعان رەسپۋبليكالىق بيۋجەت تۋرالى زاڭدا بەلگىلەنگەن ايلىق ەسەپتىك كورسەتكىشتىڭ 35 ەسەلەنگەن مولشەرىنە تەڭ.
ەگەر قايتىس بولعان زەينەتكەر ۇلى وتان سوعىسىنىڭ ارداگەرى بولسا، جەرلەۋگە بەرىلەتىن ءبىرجولعى تولەم 36,6 ا ە ك مولشەرىندە تولەنەدى.
قاۋلى قاشان كۇشىنە ەنەدى؟
ۇكىمەتتىڭ 2026-جىلعى 5-قازانداعى 870-قاۋلىسى 2027-جىلعى 1-قاڭتاردان باستاپ كۇشىنە ەنەدى جانە رەسمي جاريالانۋعا ءتيىس.