جاقىن ارالاسقان ەمەسپىن - سەنات ءتوراعاسى پەريزات قايراتقا قاتىستى پىكىر ءبىلدىردى

استانا. KAZINFORM - سەنات ءتوراعاسى ماۋلەن اشىمبايەۆ جۋىردا عانا قايىرىمدىلىققا اۋدارعان قازاقستاندىقتاردىڭ قارجىسىن جىمقىردى دەپ ۇستالعان Biz birgemiz قورىنىڭ باسشىسى پەريزات قايراتپەن قارىم-قاتىناسى تۋرالى ايتتى.

«تەرگەۋ قورىتىندىسى بويىنشا بارلىق اقپارات جۇرتشىلىققا حابارلانادى. ول بويىنشا ادامداردىڭ كىناسى دالەلدەنسە، سوت ءارى قاراي شەشىم شىعارادى، زاڭ بويىنشا قاتاڭ جازالانادى. تەرگەۋ ءادىل ءارى تياناقتى وتەتىنىنە ەشكىمنىڭ كۇمانى بولماۋى كەرەك. ول تۇلعالار قاجەتتى جازاسىن الادى»، - دەپ پىكىر ءبىلدىردى اشىمبايەۆ سەنات كۋلۋارىندا.

سونداي-اق سەنات ءتوراعاسى پەريزات قايراتپەن جاقىن تانىس بولماعانىن العا تارتتى.

«مەن ونىمەن جاقىن تانىس بولعان ەمەسپىن. مەن كوپتەگەن ءىس-شارالارعا بارامىن. اپتا سايىن ءبىرقاتار شارا وتەدى. كەيبىر ءىس-شارالاردا ول بولعان شىعار. ال ونىمەن جاقىن ارالاساتىن دەڭگەيدە بولعان ەمەسپىن»، - دەيدى ماۋلەن اشىمبايەۆ.

پەريزات قايرات جايلى

ايتا كەتەيىك، پەريزات قايرات - Biz Birgemiz Qazaqstan قايىرىمدىلىق قورىنىڭ ءتورايىمى، قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ، گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ، قوعامدا بەدەلگە يە بولدى.

كەيىن قارجى مونيتورينگىنىڭ اگەنتتىگى ونىڭ قايىرىمدىلىق قورىنان 1,5 ميلليارد جىمقىردى دەگەن كۇدىككە ىلىنگەنىن حابارلادى. قايىرىمدىلىقتىڭ نەگىزگى بولىگى قىمبات ءسان بۇيىمدارى مەن جىلجىمايتىن مۇلىكتى ساتىپ الۋ ماقساتىنا پايدالانىلدى. بيىل كوكتەمدە ول ەلورداداعى اۆتوسالونداردا 88 ميلليون تەڭگەگە Mercedes-Benz S450 ،80 ميلليون تەڭگەگە Lexus LX-600 جانە 39 ميلليون تەڭگەگە Haval اۆتوكولىكتەرىن ساتىپ الدى.

سونىمەن قاتار قازاقستاندىقتاردىڭ قايىرىمدىلىققا جىبەرگەن قاراجات ەسەبىنەن پەريزات قايرات دۋباي، دوحا، لوندون جانە ىستامبۇلداعى St. Regis ،Shangri-La ،Palazzo Versace جانە Kempinski سياقتى بەس جۇلدىزدى قوناقۇيلەردە دەمالعان.