كۋۆەيتتە بەلگىسىز دەرتكە شالدىعىپ، اۋرۋحاناعا تۇسكەن 25 جاستاعى قازاقستاندىق بورتسەرىككە ەلىمىزدىڭ ديپلوماتتارى كونسۋلدىق-قۇقىقتىق كومەك كورسەتىپ جاتىر. بۇل تۋرالى قازاقستان سىرتقى ىستەر مينيسترلىگى رەداكتسيانىڭ رەسمي ساۋالىنا بەرگەن جاۋابىندا مالىمدەدى، دەپ حابارلايدى Sn.kz اقپارات پورتالى.
ۆەدومستۆونىڭ حابارلاۋىنشا، قازاقستاندىق ديپلوماتتار ناۋقاستىڭ تۋىستارىمەن جانە ونى ەمدەپ جاتقان دارىگەرلەرمەن تۇراقتى بايلانىس ورناتقان. ازاماتشانىڭ جاعدايى مينيسترلىكتىڭ باقىلاۋىندا.
قازاقستاندىق ديپلوماتتار ازاماتشانىڭ تۋىستارىمەن جانە ەمدەۋشى مەديتسينالىق ماماندارمەن تۇراقتى بايلانىستا. ءتيىستى كونسۋلدىق-قۇقىقتىق كومەك كورسەتىلۋدە. بۇل جاعداي ق ر س ءى م-نىڭ باقىلاۋىندا، - دەپ جازىلعان مينيسترلىك جاۋابىندا.
ەسكە سالايىق، كۋۆەيتتە 25 جاستاعى قازاقستاندىق ستيۋاردەسسانىڭ دەنساۋلىعى كۇرت ناشارلاعان. ول نەپالدان كۋۆەيتكە باعىت العان رەيستەن كەيىن ءوزىن جايسىز سەزىنگەن.
الەۋمەتتىك جەلى قولدانۋشىسى قايرات بەرمۇحانوۆتىڭ مالىمەتىنشە، وسى رەيستەن سوڭ ەكيپاجدىڭ وزگە مۇشەلەرىنىڭ دە دەنە قىزۋى كوتەرىلىپ، باستارى اۋىرعان.
باستاپقىدا ەكى كۇن جانساقتاۋ بولىمىندە ەم قابىلداعان بورتسەرىكتىڭ جاعدايى جاقسارعانى حابارلانعان. الايدا بىرنەشە كۇننەن كەيىن دەنساۋلىعى قايتا سىر بەرىپ، اينالاسىندا بولىپ جاتقان جاعدايدى تۇسىنبەي، ءتىپتى جاقىندارىن دا تاني الماي قالعان.
وسىدان كەيىن قازاقستان ديپلوماتتارى ىسكە ارالاسىپ، ازاماتشانى كۋۆەيتتەگى مەديتسينالىق مەكەمەگە قايتا جاتقىزۋعا جاردەمدەسكەن.
قازىرگى ۋاقىتتا دارىگەرلەر ناۋقاستىڭ جاعدايىنا قاتىستى بىرنەشە بولجامدى قاراستىرىپ جاتىر. الايدا ونىڭ قانداي دەرتكە شالدىققانى ازىرگە ناقتى انىقتالعان جوق.