جاقسىبەك قۇلەكەيەۆ جولداۋ تۋرالى: قارجى تاپشىلىعى بار ەكەنى راس
استانا. KAZINFORM - بەلگىلى ەكونوميست، مەملەكەت قايراتكەرى جاقسىبەك قۇلەكەيەۆ پرەزيدەنت جولداۋىنىڭ نەگىزگى تەزيستەرى تۋرالى پىكىر ءبىلدىردى.
«بۇل بيۋدجەتتى تالقىلاۋدىڭ الدىنداعى ءداستۇرلى جولداۋ عوي. سوندىقتان، كوتەرىلىپ وتىرعان تاقىرىپتىڭ كوبى نەگىزىنەن الەۋمەتتىك-ەكونوميكالىق پروبلەمالاردى شەشۋگە ارنالعان. اياعىندا قاۋىپسىزدىك ماسەلەسىنە ءبىراز توقتالدى.
پرەزيدەنت بۇل جولداۋىن قارجىنىڭ تاپشىلىعىنان باستاعانىن كوردىڭىزدەر. ونداي پروبلەما بار ەكەنى راس. وسى پروبلەمانى قالاي شەشۋگە بولاتىنىن كوتەردى. ونى شەشۋدىڭ بىردەن- ءبىر جولىن ءوزى دە اتاپ ءوتتى. ول - شەتەلدىك، وتاندىق ينۆەستورلاردى ىنتالاندىرۋ. پرەزيدەنت سول ارقىلى عانا ەكونوميكامىزدى كوتەرۋگە بولاتىنىن ايتتى. قۇقىق قورعاۋ سالاسىنداعى ازاماتتارعا دا ناقتى تاپسىرمالار بەرىپ جاتىر. سونىڭ ىشىندە ينۆەستورلاردىڭ كەلۋىنە توسقاۋىل قويىلماۋ كەرەكتىگىن باسا ايتتى. ونداي توسقاۋىل قويۋدى مەملەكەت جاسالعان زيان، قىلمىس دەپ قاراۋ كەرەكتىگىن ايتىپ جاتىر. سوندىقتان بۇگىن كوتەرىلىپ وتىرعان ماسەلەنىڭ ءبارى ەكونوميكالىق، الەۋمەتتىك تاقىرىپتاردى قامتىدى»، - دەدى ول Kazinform ءتىلشىسىنىڭ ساۋالىنا بەرگەن جاۋابىندا
ەكونوميست كاپيتال زاڭداستىرۋ باعىتىنداعى جۇمىستار كۇشەيە تۇسەدى دەگەندى ايتتى.
«كاپيتالدى زاڭداستىرۋ باعىتىن ايتا كەلىپ، ينۆەستورلاردىڭ «التىن ءتىزىمى» تۋرالى ايتتى. بۇل دا وسىعان دەيىنگى جۇمىستاردىڭ زاڭدى جالعاسى دەۋگە بولادى. قازاقستاندا قارجى تاۋىپ، ونى شەتەلگە اكەتەتىن زامان اياقتالدى دەگەندى پرەزيدەنت ۇنەمى ايتىپ ءجۇر. ەگەر وتاندىق ينۆەستورلار تاپقان قارجىسىن ەل ەكونوميكاسىن دامىتۋعا، جۇمىس ورىندارىن اشۋعا سالاتىن بولسا، سالىققا ءتيىستى تولەمدەرىن تۇگەل اۋدارسا، ونداي ينۆەستورلار قازاقستاننىڭ دوسى دەگەن ۇستانىم بار. سول ۇستانىمنان مەملەكەت اينىمايتىنى وسى جولداۋدا دا ايتىلدى»، - دەدى ساراپشى.