جانىبەك ءالىمحان ۇلىنىڭ قارسىلاسى انىقتالاتىن جەكپە-جەك كۇنى جاريالاندى

استانا. قازاقپارات - ورتا سالماقتا WBO تۇجىرىمى بويىنشا ۋاقىتشا الەم چەمپيونى اتاعى ساراپقا سالىناتىن جەكپە-جەك كۇنى انىقتالدى.

بريتانيالىق دەنزەل بەنتلي (21-3-1، 17 ك و) مەن ۆەنەسۋەلالىق ەندري سااۆەدرا (17-1-1، 14 ك و) اراسىنداعى ايقاس 4-ءساۋىر كۇنى لوندونداعى ايگىلى O2 Arena ارەناسىندا وتەدى. قازىرگى تاڭدا WBO رەيتينگىندە بەنتلي -ءبىرىنشى، ال سااۆەدرا ەكىنشى ورىندا تۇر.

ال وسى كەزدەسۋ جەڭىمپازى كەيىن ورتا سالماقتاعى WBO نۇسقاسى بويىنشا تولىققاندى الەم چەمپيونى جانىبەك الىمحان ۇلىمەن (17-0، 12 ك و) جۇدىرىقتاسۋى ءتيىس.

ەسكە سالا كەتەيىك، دوپينگ-سىناماسىنان مەلدوني تابىلعان جانىبەك ءبىر جىلعا جارىستاردان شەتتەتىلگەن بولاتىن. ونىڭ ديسكۆاليفيكاتسيا مەرزىمى 2026-جىلدىڭ 2-جەلتوقسانىنا دەيىن جالعاسادى. وسى مەرزىم اياقتالعان سوڭ ءالىمحان ۇلى ۋاقىتشا چەمپيون اتانعان بوكسشىمەن مىندەتتى تۇردە جەكپە-جەك وتكىزۋگە ءتيىس.

ايتا كەتەيىك، ءالىمحان ۇلى مەن بەنتلي بۇعان دەيىن 2022-جىلى شارشى الاڭدا كەزدەسكەن. ول كەزدە «قازاق ستيلى» 12 راۋند قورىتىندىسى بويىنشا جەڭىسكە جەتكەن ەدى.