جانىبەك ءالىمحان ۇلىنىڭ كەزەكتى جەكپە-جەگى قازاقستاندا ۇيىمداستىرىلادى - سپورت ءمينيسترى
استانا. KAZINFORM - قازاقستان بوكسشى جانىبەك ءالىمحان ۇلىنىڭ كەزەكتى جەكپە-جەگى ەلىمىزدىڭ اۋماعىندا ۇيىمداستىرىلۋى مۇمكىن. بۇل تۋرالى ق ر تۋريزم جانە سپورت ءمينيسترى ەربول مىرزابوسىنوۆ ءمالىم ەتتى.
بۇگىن ءماجىلىستىڭ جالپى وتىرىسىندا دەپۋتات رينات زايىتوۆ الەمگە تانىمال قازاقستان سپورتشىلارىنىڭ جەكپە-جەكتەرىن ەلدىڭ وڭىرلەرىندە ۇيىمداستىرۋ ماسەلەسىن كوتەردى.
«الەمدىك دەڭگەيدە ەلدىڭ نازارى اۋىپ وتىرعان سپورت تۇرلەرىندە ەكى كوكجالىمىز بار. بىرەۋى - شاۆكات راحمونوۆ، ال ەكىنشىسى - جانىبەك ءالىمحان ۇلى. كەزىندە گەننادي گولوۆكيننىڭ ءبىر جەكپە-جەگىن قازاقستاندا كورۋدى ارمانداپ ەدىك. تۋريزمدى دامىتۋ ماقساتىندا شاۆكات پەن جانىبەك سياقتى سپورتشىلاردىڭ ءوز قارسىلاستارىمەن جەكپە-جەگىن ەلىمىزدىڭ وڭىرلەرىندە وتكىزەتىن مۇمكىندىك بار ما؟ ياعني، استانا مەن الماتىدان باسقا قالالاردا»، - دەپ سۇرادى دەپۋتات.
ءوز كەزەگىندە ەربول مىرزابوسىنوۆ UFC 310 تۋرنيرىندە شاۆكات ورتا سالماقتاعى UFC چەمپيونى بەلال مۋحاممادپەن جۇدىرىقتاسۋى جوسپارلانعانىن، الايدا امەريكالىق-پالەستينالىق جەكپە-جەك شەبەرى دەنساۋلىعىنا بايلانىستى جارىسقا قاتىسا الماي قالعانىن ەسكە سالدى.
«شاۆكات راحمونوۆ ءتيىستى دايىندىقتان وتكەن بولاتىن. وكىنىشكە قاراي، ونىڭ قارسىلاسىنىڭ دەنساۋلىعىنا بايلانىستى بۇل جەكپە-جەك كەيىنگە شەگەرىلدى. ال جانىبەك ءالىمحان ۇلىنا توقتالساق، سپورتشىعا مەملەكەت تاراپىنان جانە ازاماتتاردىڭ قولداۋىمەن كەلەشەكتە ەلىمىزدە ءبىر جەكپە-جەگىن ۇيىمداسترۋدى ويلاستىرىپ جاتىرمىز»، - دەدى مينيستر.
ايتا كەتەيىك، UFC-دە الەمگە تانىلعان قازاقستاندىق ارالاس جەكپە-جەك شەبەرى شاۆكات راحمونوۆ كەزەكتى كەزدەسۋىن جارتىلاي ورتا سالماقتا (77 كەلىگە دەيىن) UFC چەمپيونى تيتۋلىنىڭ بۇرىنعى يەگەرى نيگەريالىق كامارۋ ۋسمانعا قارسى وتكىزەدى.
جەكپە-جەك لاس-ۆەگاستا (ا ق ش) 8-جەلتوقساندا وتەتىن UFC 310 تۋرنيرىندە ۇيىمداستارىلادى