جانىبەك ءالىمحان ۇلى تيتۋلىنان ايىرىلا ما: وتپەي قالعان جەكپە-جەكتەن كەيىنگى بولاشاعى قانداي بولماق

استانا. KAZINFORM - بوكس شولۋشىسى جانە ينسايدەر بۋگ ۋيليامس WBO/IBF تۇجىرىمدارى بويىنشا ورتا سالماقتاعى الەم چەمپيونى قازاقستاندىق جانىبەك ءالىمحان ۇلىنىڭ جاڭازەلانديالىق بوكسشى اندرەي ميحايلوۆيچپەن جەكپە-جەگى وتپەي قالعاننان كەيىن، تيتۋلدارىنان نەگە ايىرىلماعانىن ءتۇسىندىردى، دەپ حابارلايدى Sports.kz.

ءالىمحان ۇلى مەن ميحايلوۆيچ 14-شىلدەدە لاس-ۆەگاستا جەكپە-جەككە شىعۋى ءتيىس ەدى، ءبىراق جانىبەك جەكپە-جەك قارساڭىندا سالماق قۋۋ بارىسىندا قاتتى السىرەپ، اۋرۋحاناعا تۇسكەن. وسىدان كەيىن قارسىلاس تاراپ «قازاق ءستيلىن» بەلدىگىنەن ايىرىپ، جانىبەكتەن تارتىپ الىنعان بوس تيتۋلدى يەمدەنۋگە تىرىساتىنىن مالىمدەدى.

- IBF/WBO- نىڭ جانىبەكتى اتاعىنان ايىرماۋىنىڭ نەمەسە جوعارى ساناتقا وتۋگە ماجبۇرلەۋىنىڭ سەبەپتەرى بار ما؟

«بۇل جەردە مەديتسينالىق سەبەپتەر بويىنشا بوساتىلىپ وتىر. سونىمەن قاتار، ول رەسمي تۇردە سالماق ولشەۋ راسىمىنەن وتكەن جوق، سوندىقتان ولار ونى تيتۋلدارىنان ايىرا المايدى. ول سپورتتىق جولىن جالعاستىرماس بۇرىن ورتا سالماقتا بولۋ ءۇشىن مەديتسينالىق تەكسەرۋدەن ءوتۋى ءتيىس»، - دەپ جاۋاپ بەردى ۋيليامس.

ايتا كەتەيىك، جانىبەك ءالىمحان ۇلى اۋرۋحاناعا تۇسكەننەن كەيىن الداعى ۋاقىتتا دا ورتا ديۆيزيونداعى جارىستى جالعاستىرۋعا نيەتتى ەكەنىن مالىمدەگەن بولاتىن. ونىڭ مەنەدجەرى ەگيس كليماس بوكسشىنىڭ ەندى ديەتولوگ جالداپ، سالماق جوعالتۋعا جاۋاپكەرشىلىكپەن قارايتىنىن قوسا ايتتى.

ەسكە سالا كەتەيىك، جانىبەك اندرەي ميحايلوۆيچكە قارسى وتەتىن جەكپە-جەك الدىندا ەسىنەن تانىپ قالعان بولاتىن.

ارتىنشا پروموۋتەر جانىبەك ءالىمحان ۇلىنىڭ اۋرۋحاناعا ءتۇسىپ قالۋىنا قاتىستى مالىمدەمە جاسادى.

كەيىن جانىبەك ءوزى جاعدايى تۋرالى جازبا جاريالادى.

جانىبەك ءالىمحان ۇلىنىڭ قارسىلاسى ميحايلوۆيچ وتپەي قالعان جەكپە-جەك تۋرالى رەنىشىن بىلدىرگەن ەدى.

شەتەلدىك جانكۇيەرلەر جانىبەك ءالىمحان ۇلىن جازالاۋدى تالاپ ەتكەنىن دە جازعان بولاتىنبىز.