جانىبەك ءالىمحان ۇلى سيدنەيدەگى بوكس كەشىندە اندرەي ميحايلوۆيچتەن باسىم ءتۇستى

استانا. KAZINFORM - ورتا سالماقتا WBO جانە IBF تۇجىرىمدارى بويىنشا الەم چەمپيونى جانىبەك ءالىمحان ۇلى (15-0، 10 ك و) بۇگىن جاڭازەلانديالىق اندرەي ميحايلوۆيچتەن باسىم ءتۇستى. قازاقستاندىق بىلعارى قولعاپ شەبەرى قارسىلاسىمەن تارتىستى جەكپە-جەك وتكىزدى.

12 راۋندقا جوسپارلانعان كەزدەسۋدە وتانداسىمىز ايقىن باسىمدىلىق تانىتتى. ءبىرىنشى راۋندتا اندرەي ءميحايلوۆيچتى نوكداۋنعا ءتۇسىردى. ال، توعىزىنشى راۋندتا تورەشى جەكپە-جەكتى توقتاتتى. وسىلايشا جانىبەك قارسىلاسىن سيدنەيدە سان سوقتىرىپ، چەمپيوندىق بەلبەۋىن ساقتاپ قالدى.

ايتا كەتسەك، بۇل جەكپە-جەك شىلدە ايىندا ءوتۋى ءتيىس بولاتىن. ول ۋاقىتتا جانىبەك ءالىمحان ۇلى اۋرۋحاناعا ءتۇستى. بۇل جونىندە بوكسشى كەيىننەن تۆيتتەر پاراقشاسىندا بىلاي دەپ جازدى:

«قولداۋلارىڭىزعا راقمەت! مەندە قازىر بارلىعى دۇرىس. بىرنەشە اپتا سالىپ اراعا قايتا قوسىلامىن. باستىسى مەن ورتا سالماقتا ونەر كورسەتە بەرەمىن. مەنىڭ بۇل جاقتا بىتپەگەن شارۋالارىم بار»، - دەپ جازدى ءالىمحان ۇلى.

بۇگىنگى بوكس كەشى اۋستراليانىڭ سيدنەي قالاسىنداعى The Star ارەناسىندا ءوتتى. 25 جاستاعى اندرەي ميحايلوۆيچ كاسىپقوي رينگتە 21 جەكپە-جەك وتكىزىپ، بىردە-ءبىر رەت جەڭىلمەگەن. 13 كەزدەسۋىن نوكاۋتپەن اياقتاعان 21-0، 13 KO. قازىردە حالىقارالىق بوكس فەدەراتسياسى (IBF) رەيتينگىندە 3-ورىندا تۇر.