جانىبەك ءالىمحان ۇلى: سيدنەيدە كوك تۋىمىزدى تاعى ءبىر جەلبىرەتكىم كەلەدى

استانا. KAZINFORM - ورتا سالماقتا WBO جانە IBF تيتۋلدارىنىڭ يەگەرى، قازاقستاندىق كاسىپقوي بوكسشى جانىبەك ءالىمحان ۇلى (15-0، 10 ك و) چەمپيوندىق اتاعىن قورعاۋ ءۇشىن سيدنەي (اۆستراليا) قالاسىنا كەلدى.

جەكپە-جەك الدىنداعى باسپا ءسوز ءماسليحاتىندا جانىبەك قازاق بوكسشىلارىنىڭ سيدنەيدە اتوي سالعان جارقىن ساتتەرىن ەسكە الدى.

- سيدنەيدە وتكەن وليمپيادا ويىندارىندا ەكى قازاق بوكسشىسى التىن جەڭىپ الدى. بەكزات ساتتارحانوۆ پەن ەرماحان يبراگيموۆ تالاي قازاقتى شابىتتاندىردى. مەن دە سولار سياقتى ەلىمنىڭ ابىرويىن اسقاقتاتۋدى ارمانداپ ءوستىم. سيدنەيدە بوكستاساتىنىما وتە قۋانىشتىمىن. مەن 2000 -جىلعى وليمپيادا چەمپيوندارى سياقتى سيدنەيدە ءوز تۋىمدى الەمگە تاعى ءبىر رەت كورسەتكىم كەلەدى، - دەدى قازاق بوكسشىسى.

وتانداسىمىز قارسىلاسىن جەڭەتىنىنە سەنىمدى ەكەنىن ايتتى.

- اندرەيمەن جەكپە-جەك مەن ءۇشىن وتە ماڭىزدى. ويتكەنى ول مەنىڭ اتاعىما رەسمي ۇمىتكەر. ول قازىر مەن ءۇشىن بۇلت سياقتى. كۇندى كورۋ ءۇشىن تەز بۇلتتان قۇتىلۋىم كەرەك. ونىڭ مەن ءۇشىن وڭاي جۇمىس ەكەنىن ءبارى بىلەدى جانە تۇسىنەدى. مەن ونى تەز نوكاۋتقا تۇسىرەمىن، - دەدى جانىبەك.

ايتا كەتەيىك، جانىبەك - اندرەي جەكپە- جەكگى No Limit Boxing پروموۋتەرلىك كومپانياسىنىڭ ۇيىمداستىرۋىمەن 4-قازان كۇنى اۆستراليانىڭ سيدنەي قالاسىنداعى The Star ارەناسىندا وتەدى.

بوكسشىلار IBF الەم چەمپيونى اتاعى ءۇشىن جۇدىرىقتاسادى.

ەسكە سالا كەتسەك، ەكى بوكسشى اراسىنداعى ايقاس 13-شىلدە كۇنى لاس- ۆەگاستە (ا ق ش) ءوتۋى ءتيىس ەدى. الايدا، وتانداسىمىز سالماق قۋۋ سالدارىنان ەسىنەن تانىپ قالعان بولاتىن.