جانىبەك ءالىمحان ۇلى كەلەسى ايقاسىنىڭ ۋاقىتىن ايتتى

استانا. KAZINFORM - ورتا سالماقتا IBF جانە WBO چەمپيونى جانىبەك ءالىمحان ۇلى (16-0، 11 ك و) الەۋمەتتىك جەلىدەگى پوست ارقىلى كەلەسى جەكپە-جەگى قاشان وتەتىنىن حابارلادى.

4-قازان سيدنەيدە جانىبەك جاڭازەلانديالىق اندرەي ءميحايلوۆيچتى (21-1، 13 ك و) نوكاۋتپەن جەڭدى. وسىدان كەيىن WBO قازاقستاندىققا مىندەتتى قارسىلاس رەتىندە بريتانيالىق حامزا شيرازدى (21-0، 17 ك و) بەلگىلەدى.

«كەز كەلگەن جەردە، كەز كەلگەن بوكسشىمەن جۇدىرىقتاسۋعا ءبىز ءارقاشان دايىن بولعانبىز، قازىر دە دايىنبىز!

قازاق ستيلىن تاريحقا قاشاپ جازامىز، بۇيىرتسا!

مەن ءۇشىن ۇلكەن جەكپە-جەكتەر تەك چەمپيوندىق جەكپە-جەك!

بىزگە چەمپيوندار كەرەك! ءتورت تيتۋل كەرەك! چەمپيوندار قاشسا، قورىقسا، ولار چەمپيوندار ەمەس! ال اقشا ءۇشىن بوكستاسسا، ول - سپورتشى ەمەس، بيزنەسمەن! مەن ءالى دە كەلەسى جەكپە-جەگىم ادامەس نە لارامەن بولادى دەپ ۇمىتتەنەمىن! كوماندام قازىر ۇلكەن كەلىسسوزدەر جۇرگىزۋدە. ەگەر چەمپيوندار كەلىسپەسە، ەكى تيتۋلدى قايتا قورعايمىز!

بۇيىرتسا، كەلەسى جەكپە-جەگىم اقپان ايىندا وتەدى دەپ جوسپارلانۋدا! چەمپيوندىق جەكپە-جەك بولادى نەمەسە WBO مىندەتتەگەن قارسىلاسپەن ونەر كورسەتەمىز!

ماعان سەنىم ارتىپ، جانكۇيەرلىك جاساپ جۇرگەن بارشا اعايىنعا كوپ راقمەت. ەكى تيتۋل قولدا، ەكەۋى جولدا! قۇداي قالاسا، ەرتەلى-كەش 4 تيتۋلدى ەلگە الىپ كەلەمىن!»، - دەپ جازىپتى جانىبەك.