جاندوس ومىراليەۆ ءورت حوستەلدىڭ جەرتولەسىندە بولعانى تۋرالى: بۇل زاڭعا سايكەس كەلمەيدى

باس پروكۋروردىڭ ورىنباسارى جاندوس ومىراليەۆ الماتىداعى ءورت شىققان حوستەلدىڭ جەرتولەدە بولعانى تۋرالى اقپاراتقا پىكىر ءبىلدىردى، دەپ حابارلايدى Kazinform.

«عيماراتتىڭ ءبىرىنشى قاباتىندا جانە استىڭعى قاباتىندا ادامدار تۇرعان دەگەن اقپارات تاراپ جاتىر. ارينە، بۇل زاڭعا سايكەس كەلمەيدى. سەبەبى زاڭدا تۇرعىن ءۇي جانە تۇرعىن ءۇي ەمەس دەگەن نورما بار. تۇرعىن ءۇي ەمەس عيماراتتاردىڭ قولدانۋ ماقساتىن اۋىستىرۋ كەرەك. ءبىراق ءبىزدىڭ اقپاراتىمىزشا، عيمارات اكىمشىلىگى تاراپىنان اۋىستىرىلماعان. سوندىقتان عيماراتتىڭ استىنداعى قاباتتاعى ادامداردىڭ تۇرۋى مەنىڭ ويىمشا زاڭعا قايشى كەلەدى»، - دەدى جاندوس ومىراليەۆ.

سونداي-اق ول ورتتەن قايتىس بولعان مارقۇمداردىڭ جاقىندارىنا كوڭىل ايتتى.

«الماتىدا بولعان ءورت - وتە اۋىر جاعداي. بىرىنشىدەن، مەن (ورتتەن) قازا بولعان ازاماتتاردىڭ جاقىندارى مەن تۋىسقاندارىنا كوڭىل ايتقىم كەلەدى. وزدەرىڭىز بىلەسىزدەر، بۇگىن تۇنگى ساعات 5.45-تە (الماتى قالاسى ت ج د-عا) ءورت تۋرالى حابارلاما ءتۇستى. ءبىر ساعاتتىڭ ىشىندە ءورت سوندىرۋشىلەر (حوستەلدەگى) ءورتتى ءسوندىردى. دەگەنمەن 13 ادام قايتىس بولدى. بۇل دەرەك بويىنشا ىشكى ىستەر ورگاندارى قىلمىستىق ءىس قوزعادى. بۇل قىلمىستىق ءىستىڭ ساپالى، جان-جاقتى تەرگەلۋى قامتاماسىز ەتۋ ءۇشىن باس پروكۋرور ءتيىستى ۇكىم شىعاردى. ونىڭ تاپسىرماسىنا سايكەس باس پروكۋراتۋرانىڭ بىلىكتى قىزمەتكەرلەرى، سونداي-اق الماتى قالاسىنىڭ پروكۋراتۋراسىنىڭ قىزمەتكەرلەرى تەرگەۋ توبىمەن بىرگە بارلىق كۇش-جىگەرىمىزدى سالىپ، قىسقا ۋاقىتتا جاۋاپكەرشىلىكپەن قاراۋ ماسەلەسىن قاراستىرامىز»، - دەدى باس پروكۋروردىڭ ورىنباسارى.

اۆتور

ەسىمجان ناقتىباي