جانبوتا الدابەرگەنوۆا اكروباتيكادان الەم كۋبوگى كەزەڭىندە ۇزدىك ۇشتىككە ەندى

قازاقستان ۇلتتىق قۇراماسىنىڭ مۇشەسى جانبوتا الدابەرگەنوۆا فينليانديانىڭ رۋكا قالاسىندا فريستايل-اكروباتيكا مەن موگۋلدان وتكەن الەم كۋبوگىنىڭ العاشقى كەزەڭىندە ۇزدىك ۇشتىكتەن كورىندى، دەپ حابارلايدى Kazinform.

سپورتتى دامىتۋ ديرەكتسياسىنىڭ باسپا ءسوز قىزمەتىنەن ءمالىم ەتكەنىندەي، اكروباتيكادان ونەر كورسەتكەن جانبوتا فينالدا 77.43 بال جيناپ، قولا جۇلدەگەر اتاندى.

التىندى بەيجىڭ وليمپياداسىنىڭ (ارالاس كوماندالىق سىن) قولا جۇلدەگەرى ماريون تەنو (كانادا) جەڭىپ السا، كۇمىس اۋستراليالىق دانيەل سكوتتىڭ ەنشىسىندە كەتتى. د. سكوت بۇعان دەيىن الەم چەمپيوناتىندا 2 مارتە كۇمىسكە يە بولعان.

ءبىر قىزىعى، قازاق سپورتشىسى تۋرا ءبىر جىل بۇرىن وسىندا وتكەن 2022-2023-جىلعى ماۋسىمداعى الەم كۋبوگىنىڭ بەتاشار كەزەڭىندە دە قولا العان ەدى. ول كەزدە ج. الدابەرگەنوۆاعا 80,04 ۇپاي جەتكىلىكتى بولعان. جالپى، رۋكا قالاسى بيىل FIS- تىڭ فريستايل ماۋسىمىن قاتارىنان 14-رەت باستاپ بەردى.

فريستايل-موگۋلدا ۇلتتىق قۇراما سپورتشىلارىنان ەڭ جوعارعى ساتىعا پاۆەل كولماكوۆ تۇراقتادى. ول جەكەلەي سىندا بەسىنشى ورىنعا تابان تىرەدى.