جانۋارلاردى قورعاۋ شارالارىن قاتاڭداتتى

استانا. KAZINFORM - ەۋرووداقتىڭ بارلىق ەلىندە ءۇي جانۋارلارىن ۇستاۋ، ءوسىرۋ جانە ساتۋ بويىنشا ءبىرىڭعاي ەرەجەلەر ەنگىزىلەدى، دەپ حابارلايدى DW.

مۇنداي زاڭدى ەۋروپا پارلامەنتىنىڭ دەپۋتاتتارى قابىلدادى، ەندى ونى ە و كەڭەسى ماقۇلداۋى ءتيىس.

نەگىزگى جاڭالىقتاردىڭ ءبىرى - بارلىق يتتەر مەن مىسىقتاردى مىندەتتى تۇردە چيپتەۋ جانە ۇلتتىق دەرەكتەر بازاسىنا تىركەۋ. سونىمەن قاتار جانۋارلاردى دەنساۋلىعىنا زيان كەلتىرەتىن بەلگىلەرمەن كوبەيتۋگە جانە جاقىن تۋىستارىن ءبىر-بىرىمەن شاعىلىستىرۋعا تىيىم سالىنادى.

بۇدان بولەك، قاتىگەز ارەكەتتەرگە شەكتەۋ ەنگىزىلەدى: جانۋارلارعا كورمە ءۇشىن زاقىم كەلتىرۋگە، قاۋىپتى قارعىباۋلاردى قولدانۋعا جانە ە و-دان تىس جەرلەردەن زاڭسىز اكەلۋگە بولمايدى.

ەۋرووداققا ءۇي جانۋارلارىن اكەلەتىندەردىڭ بارلىعى ولاردى كەمىندە بەس جۇمىس كۇن بۇرىن چيپتەپ، ۇلتتىق دەرەكتەر بازاسىنا تىركەۋى ءتيىس. بۇل تالاپ كوممەرتسيالىق ەمەس تاسىمالدارعا دا قاتىستى.

- ءۇي جانۋارى - بۇل وتباسىنىڭ مۇشەسى، زات نەمەسە ويىنشىق ەمەس، - دەدى اۋىل شارۋاشىلىعى جانە اۋىلدىق اۋماقتاردى دامىتۋ كوميتەتىنىڭ باسشىسى ۆەرونيكا ۆرەچيونوۆا.