جان-جاقتان قارىز الا بەرمەي، ءتيىستى تالداۋ جاسايمىز - مينيستر

  استانا. KAZINFORM - بۇگىن ءماجىلىستىڭ جالپى وتىرىسىندا پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ مەملەكەتتىك قارىزعا قاتىستى تۇسىنىك بەردى.

«جالپى، مەملەكەتتىڭ بورىشى جالپى ىشكى ونىمگە شاققاندا 23 پايىزدان ءسال ارتىق. بىزدە ەكى شەكتەۋ بار. بىرىنشىدەن، مەملەكەتتىڭ قارىزى ج ى ءو- گە شاققاندا 32 پايىزىنان اسپاۋ كەرەك. ەكىنشىدەن، بورىشتى قايتارۋدىڭ جىلدىق مولشەرى جالپى كىرىستەردىڭ 10 پايىزىنان اسپاۋ كەرەك دەگەن شەكتەۋ ەسكەرىلگەن. ەلىمىزدىڭ 2025 - 2029 -جىلدارعا ارنالعان الەۋمەتتىك- ەكونوميكالىق دامۋ بولجامىنا توقتالساق، 2027 -جىلعا قاراي بيۋدجەت تاپشىلىعىن جالپى ىشكى ونىمگە شاققاندا 1,9 پايىزعا دەيىن تومەندەتۋ مىندەتىن الىپ وتىرمىز. بۇل ءوز كەزەگىندە مەملەكەتتىڭ كىرىس بولىگىنىڭ ارتۋى ەسەبىنەن جۇزەگە اسىرىلادى»، - دەدى ن. بايبازاروۆ.

ونىڭ ايتۋىنشا، الداعى جىلدارى ەكونوميكانىڭ ءوسۋى ارقىلى بيۋدجەتتىڭ كىرىس بولىگى ارتادى.

«ەكىنشىدەن، جان-جاقتان قارىز الا بەرمەي، ءتيىستى تالداۋ جاساپ، ونىڭ ءتيىمدى جولدارىن ىزدەيمىز»، - دەدى مينيستر.

بيىل قىركۇيەك ايىندا قارجى مينيسترلىگى مەملەكەتتىك قارىز قاۋىپسىز دەڭگەيدە ەكەنىن مالىمدەگەن ەدى.