«جامبىلدىڭ جۇمباق الەمى» اتتى كىتاپ جارىق كوردى

استانا. قازاقپارات - جۋىردا ۇلى جىراۋ جامبىل جابايەۆتىڭ كوپشىلىككە بەيمالىم بولىپ كەلگەن قابىلەتتەرى جايىندا ۇزاق جىلدار بويى زەرتتەۋ جۇرگىزىپ، اقىننىڭ كوزىن كورگەن اقساقالداردان دايەكتى دەرەكتەردى قاعازعا ءتۇسىرىپ، ول مالىمەتتەردى عىلىمي تۇرعىدا ساراپتاپ، تەرەڭ زەردەلەگەن عالىم، فيزيكا-ماتەماتيكا عىلىمدارىنىڭ كانديداتى، دوتسەنت ماعريپا شوجەعۇل قىزى جىلقىبايەۆانىڭ (1945-2019) «جامبىلدىڭ جۇمباق الەمى» دەپ اتالاتىن ەڭبەگى «Evo Press» باسپاسىنان جارىق كوردى.

عالىمنىڭ قولجازباسىن جۇيەلەپ باسپاعا ۇسىنعان شارافات جىلقىبايەۆانىڭ ايتۋىنشا، الماتى وبلىسى اكىمدىگىنىڭ قولداۋىمەن جارىق كورگەن بۇل كىتاپ جامبىل جىراۋدىڭ جالپىعا ايتىلماي كەلگەن بەلگىسىز قىرلارىن كورسەتۋگە ارنالعان. ء ومىرىنىڭ بار بولعانى كەيىنگى 10 جىلىندا عانا مەملەكەتتىك قامقورلىققا الىنعان اقىننىڭ ودان بۇرىنعى سەكسەن- توقسان جىلدىق ءومىرى جۇرتشىلىققا بەلگىسىز بوپ كەلگەنى ءمالىم. كىتاپ اۆتورى كەزىندە جامبىل ومىرىمەن بايلانىستى قۇندى مالىمەتتەردى ونىڭ كوزىن كورىپ، دامدەس بولعان قاريالاردان جازىپ الىپ، قازان توڭكەرىسىنە دەيىن جامبىل اقىنمەن ءجيى ارالاسقان كىسىلەردىڭ ايتقاندارىن قاعازعا تۇسىرگەن. 

عالىمنىڭ ماقساتى - جامبىلمەن زامانداس اقساقالداردىڭ ايتقاندارىن سارالاپ، ۇلى جىراۋدىڭ وسى كەزگە دەيىن تانىلماي كەلگەن قىرلارىنان وقىرماندى حاباردار ەتۋ. جامبىل جىراۋدىڭ ومىرىنە كوڭىل اۋدارىپ، 50 جىل بويى زەرتتەۋ بارىسىندا قورشاعان دۇنيەدەگى تىلسىم كۇشتەردىڭ وسى كەزگە دەيىن اشىلماي كەلگەن سىرلارىن ۇعۋعا مۇمكىندىك تۋعانىن جەتكىزگەن كىتاپ اۆتورى اقىن ومىرگە كەلگەن ايماق پەن ونىڭ ءجۇرىپ وتكەن جولدارى، ۇلكەن ورتاسى ادامزات ومىرىندەگى دۇنيە تاريحىمەن بايلانىستى ەكەنىن تۇسىندىرەدى. بۇل سالادا اۆتورعا التىن ادام جازۋى كومەكتەسكەن. 

 E-history.kz