جامبىلدا جايىلىمنان جىلقى ۇرلاعاندار ۇستالدى

 تاراز. KAZINFORM -جامبىل وبلىسى پوليتسيا قىزمەتكەرلەرى «مال ۇرىسى» جەدەل- پروفيلاكتيكالىق ءىس- شاراسىن جۇرگىزۋ بارىسىندا قىلمىستىق توپتىڭ ءىس-ارەكەتتەرىن اشكەرەلەدى.

كۇدىكتىلەر الدىن الا ءسوز بايلاسۋ ارقىلى بايزاق، جامبىل اۋداندارىنىڭ اۋماعىنداعى جايىلىمداردان بىرنەشە رەت جىلقى مالدارىن ۇرلاپ، سودان كەيىن ولاردى سويىپ، ساتۋمەن اينالىسقان.

«ۇستالعان ازاماتتار ۋاقىتشا ۇستاۋ يزولياتورىنا قاماققا الىندى. سونداي-اق ولاردىڭ بۇدان باسقا 4 رەت مال ۇرلاۋ دەرەگىنە قاتىستى بارى جانە ۇرلانعان 5 جىلقى مالىن سويىپ ساتقانى انىقتالدى. قازىرگى تاڭدا اتالعان دەرەككە قاتىستى سوتقا دەيىنگى تەرگەۋ امالدارى جۇرگىزىلۋدە»، - دەلىنگەن وبلىستىق پوليتسيا دەپارتامەنتى باسپا ءسوز قىزمەتى تاراتقان اقپاراتتا.

ايتا كەتەيىك، «مال ۇرىسى» رەسپۋبليكالىق ىس-شاراسى وبلىس اۋماعىندا 23-اقپانعا دەيىن جالعاساتىن بولادى.