جامبىل وبلىسىنىڭ بۇرىنعى اكىمى كارىم كوكىرەكبايەۆ سوت زالىندا قاماۋعا الىندى

الماتى. KAZINFORM - جامبىل وبلىسىنىڭ بۇرىنعى اكىمى، «قازسەلدەن قورعاۋدىڭ» بۇرىنعى باسشىسى كارىم كوكىرەكبايەۆ سوت زالىندا قاماۋعا الىندى.

سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە، 25 -شىلدەدە الماتى وبلىستىق سوتى توتەنشە جاعداي مينيسترلىگى «قازسەلدەن قورعاۋ» م م باسشىسى كارىم كوكرەكبايەۆقا قاتىستى اقتاۋ ۇكىمىنىڭ كۇشىن جويدى.

«قىلمىستىق ءىس ءبىرىنشى ساتىداعى سوتتىڭ جاڭا قاراۋىنا جولداندى. سونىمەن قاتار، كارىم كوكىرەكبايەۆ سوت زالىندا قاماۋعا الىندى»، - دەلىنگەن حابارلامادا.

«قازسەلدەن قورعاۋ» مەملەكەتتىك مەكەمەسىنىڭ بۇرىنعى باسشىسى كارىم كوكىرەكبايەۆ پەن ونىڭ ورىنباسارى وزدەرىنىڭ قىزمەتتىك وكىلەتتىكتەرىنە كىرەتىن ارەكەتتەرى مەن ارەكەتسىزدىگى ءۇشىن الدىن الا ءسوز بايلاسۋ ارقىلى ادامدار توبىمەن اسا ءىرى مولشەردە پارا العانى ءۇشىن، سونداي-اق جالپى قامقورلىعى ءۇشىن ايىپتالدى.

بۇعان دەيىن 7 -ماۋسىمدا الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا القابيلەر «قازسەلدەن قورعاۋ» مەكەمەسىنىڭ لاۋازىمدى تۇلعالارىنا قاتىستى قىلمىستىق ءىستى قاراعان بولاتىن.

كەيىن القابيلەر القاسىنىڭ شەشىمى بويىنشا (كوپشىلىك داۋىسپەن) كوكىرەكبايەۆ وزىنە تاعىلعان ايىپ بويىنشا اقتالدى.

ال ونىڭ بۇرىنعى ورىنباسارى 11 جىلعا باس بوستاندىعىنان ايىرىلدى.

كارىم كوكىرەكبايەۆ 1957 -جىلى 28-شىلدەدە جامبىل وبلىسىندا دۇنيەگە كەلگەن. ول الماتى تەمىر جول كولىگى ينستيتۋتىن تەمىر جول ينجەنەرى ماماندىعى بويىنشا بىتىرگەن. ەكونوميكا عىلىمدارىنىڭ كانديداتى.

ەڭبەك جولىن شۋ ستانتسياسىنىڭ لوكوموتيۆ دەپوسىندا ماشينيست كومەكشىسى بولىپ باستاعان. وسى جىلدار ىشىندە الماتى تەمىر جولىنىڭ باستىعى، استانا حالىقارالىق اۋەجايى ر م ك باس ديرەكتورى قىزمەتتەرىن اتقاردى. 2000 -جىلى قازاقستان رەسپۋبليكاسى تابيعي رەسۋرستار جانە قورشاعان ورتانى قورعاۋ ۆيتسە- ءمينيسترى بولىپ تاعايىندالعان. ال 2002-2008 -جىلدارى - «قازاقستان تەمىر جولى» ۇ ك» ا ق ۆيتسە- پرەزيدەنتى، باسقارۋشى ديرەكتورى، باس ينجەنەرى ماماندىقتارىن اتقارعان.

2013 -جىلدىڭ جەلتوقسانىنان 2018 -جىلدىڭ قاڭتارىنا دەيىن جامبىل وبلىسىنىڭ اكىمى بولعان. 2018 -جىلى قىرعىزستانداعى ەلشى قىزمەتىن اتقارعان. 2019 -جىلدىڭ تامىزىندا «قازسەلدەن قورعاۋ» م م باسشىسى بولىپ تاعايىندالعان.

اۆتور

الما مۇقانوۆا