وقيعا وسىدان 15 كۇن بۇرىن ورىن السا دا، جابىرلەنۋشىگە كۇنى بۇگىنگە دەيىن ەشقانداي پسيحولوگيالىق كومەك كورسەتىلمەگەن. 26-ماۋسىمدا بولعان وقيعانىڭ گەنەتيكالىق زەرتتەۋ ناتيجەسى دايىن بولماي، ءىس قوزعاۋسىز تۇر. ءوز كىنالارىن مويىنداپ، بولعان ىسكە كۋالىك ەتكەن كۇدىكتىلەر بولسا دا، ولار قاماۋعا الىنباعان. قۇزىرلى ورگاندار دا ءالى ءتيىستى نازار اۋدارماي كەلەدى.
جۋرناليستەر مەن قۇزىرلى ورگانداردان كومەك سۇراعان جابىرلەنۋشى تاراپتىڭ سوزىنە سۇيەنسەك، كۇدىكتىلەر قىزدى «اناڭ ۇيىقتاپ قالعان كەزدە سىرتقا شىق، قىدىرىپ كەلەمىز، تاعى ەكى قىز شىعادى» دەپ الداپ، تىسقا شىعارعان. ءسويتىپ، كولىك جۇرگىزگەن جانە سويلەسكەن جىگىتتەن باسقا تاعى ءبىر جىگىت بار، ءبارى اۋدان ورتالىعى قوردايعا بارعان. جارتى ساعاتتان اسا بەلگىسىز قىزداردى كۇتكەن ولار دۇكەنگە كىرگەن. سول جەردەن جىگىتتەردىڭ ءبىرى كولا سۋسىنىن الىپ، كولىككە كەلىپ قىزعا قۇيىپ بەرگەن. سۋسىننىڭ ەكى ستاكانىن ىشكەن سوڭ قىز ەسىن جوعالتقان. سول كەزدە جىگىتتەر جامان ويىن جۇزەگە اسىرعان.
قورداي اۋداندىق ىشكى ىستەر ءبولىمى مەن پروكۋراتۋرا وكىلدەرى جابىرلەنۋشىدەن الىنعان تالدامانىڭ ناتيجەسى دايىن بولماي، كۇدىكتىلەر قاماققا الىنبايتىنىن ايتادى.
«قىزدى ەس-ءتۇسسىز كۇيدە بەلگىسىز ۋاقىتتا ءۇيىمىزدىڭ اۋلاسىنا اكەلىپ تاستاعان. مەن تاڭەرتەڭ قوقىس تاستاۋعا شىققان ساتتە قىزىمنىڭ ەس-ءتۇسسىز جاتقانىن، كيىمدەرىنىڭ ءبارى بۇلىنگەنىن كوردىم.
تەرگەۋ بارىسىندا «قىزىڭىز سىزدەن ۇيالىپ تۇر» دەپ مەنى تىسقا شىعارىپ جىبەرىپ، قىزىما قىسىم جاسالدى. وقيعا ورىن العاننان بەرى ەشبىر پسيحولوگ نەمەسە باسقا دا ماماندار كومەكتەسپەدى. مەكتەپ اكىمشىلىگىنەن دە قايىرىلعان ەشبىر ادام بولمادى. مەن بۇل ءىس وسىلاي جىلى جابىلىپ قالا ما دەپ قورقامىن. سول سەبەپتى پرەزيدەنتكە، باس پروكۋراتۋرا مەن سوتقا ۇندەۋ جاسادىم. قىزىمنىڭ ءومىرىن تاس-تالقان ەتكەندەر ءتيىستى جازاسىن الۋلارى كەرەك»، - دەيدى قىزدىڭ اناسى.
قازىرگى تاڭدا بۇل ءىس الەۋمەتتىك جەلىدە دە كەڭىنەن تالقىلانىپ، ءماجىلىس دەپۋتاتتارىنىڭ دا نازارىن اۋداردى.
«جامبىل وبلىسى اكىمدىگىنىڭ ءبىلىم باسقارماسى قورداي اۋدانى ءبىلىم ءبولىمىنىڭ ق. ساتپايەۆ اتىنداعى ورتا مەكتەبىنىڭ وقۋشىسىنا قاتىستى جاسالعان زورلىق-زومبىلىق فاكتىسى بويىنشا قۇزىرلى ورگاندار تاراپىنان ساراپتاما تاعايىندالىپ، سوتقا دەيىنگى تەرگەپ-تەكسەرۋ امالدارى جۇرگىزىلۋدە. قازاقستان رەسپۋبليكاسىنىڭ قىلمىستىق-پروتسەستىك كودەكسىنىڭ 201-بابىنا سايكەس جابىرلەنۋشى كامەلەت جاسقا تولماعانعا قاتىستى دەرەكتەر جاريا ەتىلمەيدى»، - دەلىنگەن قورداي اۋداندىق ءبىلىم ءبولىمى تاراتقان رەسمي اقپاراتتا.
ال اۋدان اكىمىنىڭ باسپا ءسوز قىزمەتى قازىرگى ۋاقىتتا جاس وسپىرىممەن اۋداندىق اۋرۋحانانىڭ پسيحولوگتارى جۇمىس ىستەپ جاتقانىن، كۇدىكتىلەردىڭ ۇستىنەن قىلمىستىق ءىس قوزعالعانىن مالىمدەدى.
بۇعان دەيىن جامبىل وبلىسىندا سارباز جانساقتاۋ بولىمىنە تۇسكەنىن جازعان بولاتىنبىز.