جامبى اتۋ فەدەراتسياسى 2024-جىلعا ارنالعان جوسپارىن جاريالادى
جامبى اتۋ فەدەراتسياسىنىڭ پرەزيدەنتى ەركەبۇلان ءىلياسوۆ وسى سپورتتى دامىتۋ جوسپارىن جاريالادى، دەپ حابارلايدى Kazinform.
«جامبى اتۋ سپورتشىلارى 2023 -جىلدى جاقسى جەتىستىكتەرمەن اياقتاپ جاتىر. ەل ىشىندە چەمپيوناتتار ۇيىمداستىرىلدى، سونداي- اق فرانسيا، ۆەنگريا، موڭعوليادا ءبىزدىڭ سپورتشىلار التىن، كۇمىس الىپ، جۇلدەلى ورىنداردان كورىندى. اتاپ ايتقاندا، ۇلتتىق قۇرامانى سپورتتىق كيىممەن، زاماناۋي ۇلگىدەگى قۇرال- جابدىقتارمەن قامتاماسىز ەتتىك»، - دەدى ە. ءىلياسوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
ونىڭ ايتۋىنشا، جامبى اتۋدان وتەتىن جارىستاردىڭ ساپاسىن ارتتىرۋ ماقساتىندا 2023 -جىلى فەدەراتسيا ءبىرقاتار ءىس- شارالاردى جۇزەگە اسىردى. وسى ورايدا جارىسقا ارنالعان لازەرلىك تايمەر، ناتيجەلەردى تىركەۋگە ارنالعان بەينەباقىلاۋ جۇيەسى، جارىس الاڭىندا قاۋىپسىزدىكتى قامتاماسىز ەتۋگە ارنالعان جول بەلگىلەرى، زاماناۋي نىسانالار، راتسيالار، وق قاعاتىن قورعانىش تورى ساتىپ الىندى.
«الداعى جوسپارعا توقتالساق، جارىستاردىڭ سانىن ارتتىرۋ ماقساتىندا 2024 -جىلعا 12 رەسپۋبليكالىق، 6 حالىقارالىق جارىس بەلگىلەندى»، - دەدى ول.
ودان بولەك، ەركەبۇلان ءىلياسوۆ ۇلتتىق سپورتتى جاستار اراسىندا دارىپتەۋ ماقساتىندا جامبى اتۋ تاريحى كەڭىنەن تارقاتىلىپ باياندالاتىن، سپورتتىڭ قىر- سىرى اڭگىمەلەنگەن كىتاپ دايىندالىپ جاتقانىن ايتتى. وعان قوسا بالالارعا ارنالعان كوميكستەر باسىلىپ شىعارىلماق. كەلەر جىلى سپورتتىڭ وسى ءتۇرى بويىنشا سمارتفوندارعا ارنالعان قوسىمشا ىسكە قوسىلماق.
«وسى ۋاقىتقا دەيىن جامبى اتۋ جارىستارىندا قىزدار ەرلەرمەن بىرگە جارىسىپ جۇرگەن بولاتىن. ەندى قىزدار اراسىندا ەڭ جاقسى ناتيجە كورسەتكەندەرگە «توميريس» جۇلدەسى بەرەتىن بولدىق»، - دەدى ول.
فەدەراتسيا باسشىسى كەلەر جىلدارى شىمكەنت قالاسىندا جامبى اتۋ سپورتىنىڭ ۇلكەن اكادەمياسىن اشۋ جوسپارلانعانىن جەتكىزدى.
«ۇلتتىق سپورت تۇرلەرىن ناسيحاتتاۋ باعىتىندا فيلم ءتۇسىرۋ باستاماسىن كوتەرىپ جاتىرمىز. ءبىزدىڭ قوعام ۇلتتىق ءداستۇرىمىز، سپورتىمىز جايىن كەڭىنەن مالىمەت الۋى كەرەك سانايمىن»، - دەدى ە. ءىلياسوۆ.
تاراتىلعان مالىمەتكە قاراعاندا، ساۋد ارابياسىنىڭ ءال- ۋلا قالاسىندا الەم كۋبوگىنىڭ فينالىنا ەلىمىزدىڭ نامىسىن قورعاۋعا 3 سپورتشى مەن 1 جاتتىقتىرۋشى بارادى. ءدۇبىرلى دوداعا الەمنىڭ تۇكپىر- تۇكپىرىنەن ەڭ مىقتى سپورتشىلار قاتىسادى.
7-10 جەلتوقسان ارالىعىندا شىمكەنتتە، ياعني قىسقى ماۋسىمدا ۇيىمداستىرىلىپ وتىرعان العاشقى تۋرنيرگە قازاقستاننىڭ بارلىق وڭىرىنەن 100 گە جۋىق سپورتشى قاتىسپاق.