بالانى جالعىز تاربيەلەپ، سونىمەن قاتار تۇرعىن ءۇي ماسەلەسىن شەشۋ وڭاي ەمەس. الايدا قازاقستاندا 2026 -جىلى تولىق ەمەس وتباسىلار پايدالانا الاتىن مەملەكەتتىك قولداۋدىڭ بىرنەشە تەتىگى بار. بۇل رەتتە «جالعىزباستى انا» مارتەبەسى اۆتوماتتى تۇردە تەگىن پاتەر بەرىلەدى نەمەسە يپوتەكا ماقۇلدانادى دەگەندى بىلدىرمەيدى. قولداۋ ءتۇرى وتباسىنىڭ تابىسىنا، تۇرعىن ءۇيىنىڭ بار-جوعىنا، وتباسى قۇرامىنا جانە ناقتى باعدارلاما تالاپتارىنا بايلانىستى.
تۇرعىن ءۇي ماسەلەسىن نەدەن باستاۋ كەرەك؟
Homsters.kz مالىمەتىنشە، ءبىرىنشى كەزەكتە تۇرعىن ۇيگە مۇقتاجدار ەسەبىنە تۇرۋ مۇمكىندىگىن تەكسەرۋ قاجەت. قازىر تۇرعىن ءۇي ەسەبى ورتالىقتاندىرىلعان ەلەكتروندىق جۇيە ارقىلى جۇرگىزىلەدى.
تۇرعىن ءۇي كەزەگىنە تۇرۋدىڭ ءوزى بىردەن پاتەر بەرىلەدى دەگەن ءسوز ەمەس. بۇل - ازاماتقا مەملەكەتتىك تۇرعىن ءۇي قولداۋ شارالارىنا قاتىسۋعا مۇمكىندىك بەرەتىن العاشقى قادام.
سوندىقتان بالاسىن جالعىز تاربيەلەپ وتىرعان انا الدىمەن ءوزىنىڭ تۇرعىن ءۇي جاعدايىن، وتباسى قۇرامىن جانە تابىسىن ەسكەرىپ، قانداي قولداۋ تەتىگىنە سايكەس كەلەتىنىن انىقتاعانى دۇرىس.
تولىق ەمەس وتباسى قانداي قولداۋ الا الادى؟
نۇسقالاردىڭ ءبىرى - مەملەكەتتىك جالدامالى تۇرعىن ءۇي. مۇنداي باسپانا تۇرعىن ۇيگە مۇقتاج ازاماتتارعا ۇسىنىلادى. تۇرعىن ءۇيدى ءبولۋ كەزىندە بەلگىلەنگەن الەۋمەتتىك باسىمدىقتار مەن وتباسىنىڭ جاعدايى ەسكەرىلەدى.
تاعى ءبىر مۇمكىندىك - جەكە سەكتورداعى جالداۋ اقىسىن سۋبسيديالاۋ. بۇل جاعدايدا مەملەكەت جالداۋ اقىسىنىڭ ءبىر بولىگىن وتەۋگە كومەكتەسەدى. الايدا باعدارلاماعا قاتىسۋ ءۇشىن بەلگىلەنگەن ساناتقا جاتۋ، تۇرعىن ۇيگە مۇقتاج رەتىندە ەسەپتە تۇرۋ جانە تابىس بويىنشا تالاپتارعا سايكەس بولۋ قاجەت.
جەڭىلدەتىلگەن يپوتەكاعا قاتىسۋعا بولا ما؟
تولىق ەمەس وتباسى تۇرعىن ءۇي ساتىپ الۋ ءۇشىن وتباسى بانكتىڭ قولدانىستاعى باعدارلامالارىنا قاتىسا الادى. ءبىراق جالعىزباستى انا مارتەبەسىنىڭ بولۋى يپوتەكانىڭ اۆتوماتتى تۇردە ماقۇلدانۋىنا نەگىز بولمايدى.
بانك ءوتىنىش بەرۋشىنىڭ تابىسىن، تولەم قابىلەتىن، باستاپقى جارناسىن جانە ناقتى باعدارلامادا بەلگىلەنگەن باسقا تالاپتاردى قارايدى.
سوندىقتان يپوتەكاعا ءوتىنىش بەرمەس بۇرىن اي سايىنعى تابىستى، نەسيە تولەمىن وتەۋ مۇمكىندىگىن جانە باستاپقى جارنا كولەمىن الدىن الا ەسەپتەپ العان ءجون.
تۇرعىن ءۇي سەرتيفيكاتى باستاپقى جارناعا كومەكتەسۋى مۇمكىن
يپوتەكا راسىمدەۋ كەزىندە باستاپقى جارنا نەگىزگى كەدەرگىلەردىڭ بىرىنە اينالۋى مۇمكىن. مۇنداي جاعدايدا تۇرعىن ءۇي سەرتيفيكاتىن الۋ مۇمكىندىگىن تەكسەرگەن ءجون.
تۇرعىن ءۇي سەرتيفيكاتى تۇرعىن ءۇي زاەمى بويىنشا باستاپقى جارنانىڭ ءبىر بولىگىن جابۋعا ارنالعان. ونى الۋشىلاردىڭ ساناتتارى مەن تالاپتارىن جەرگىلىكتى اتقارۋشى ورگاندار بەلگىلەيدى. سوندىقتان شارتتار وڭىرگە قاراي وزگەشە بولۋى مۇمكىن.
ەگەر ماسەلە پاتەر ساتىپ الۋدا ەمەس، ونى ۇستاۋدا بولسا
مەملەكەتتىك قولداۋ تەك تۇرعىن ءۇي ساتىپ الۋمەن شەكتەلمەيدى. تابىسى تومەن وتباسىلار تۇرعىن ءۇي كومەگىن الۋ مۇمكىندىگىن دە قاراستىرا الادى.
تۇرعىن ءۇي كومەگى تۇرعىن ءۇيدى ۇستاۋعا جانە كوممۋنالدىق قىزمەتتەرگە جۇمسالاتىن شىعىنداردىڭ ءبىر بولىگىن وتەۋگە ارنالعان.
بۇل جەردە ماڭىزدى ايىرماشىلىق بار: تۇرعىن ءۇي كومەگى پاتەر بەرۋدى ەمەس، وتباسىنىڭ تۇرعىن ءۇي-كوممۋنالدىق شىعىندارىن وتەۋگە قارجىلاي قولداۋ كورسەتۋدى بىلدىرەدى.
جالعىزباستى انا نە ىستەۋى كەرەك؟
ەگەر مەنشىگىندە باسپاناسى بولماسا، الدىمەن تۇرعىن ۇيگە مۇقتاجدار ەسەبىنە تۇرۋعا قۇقىعى بار- جوعىن تەكسەرگەن ءجون.
ودان كەيىن:
1. تۇرعىن ءۇي ەسەبىنە تۇرۋعا ءوتىنىش بەرۋ؛
2. ءوز وڭىرىندەگى جالدامالى تۇرعىن ءۇي باعدارلامالارىن باقىلاۋ؛
3. جالداۋ اقىسىن سۋبسيديالاۋ مۇمكىندىگىن تەكسەرۋ؛
4. وتباسى بانكتىڭ قولدانىستاعى باعدارلامالارىنا تالاپتاردىڭ سايكەس كەلەتىنىن انىقتاۋ؛
5. باستاپقى جارنا جەتكىلىكسىز بولسا، تۇرعىن ءۇي سەرتيفيكاتىن الۋ مۇمكىندىگىن قاراستىرۋ؛
6. تابىس تومەن بولعان جاعدايدا تۇرعىن ءۇي كومەگىنە ءوتىنىش بەرۋ مۇمكىندىگىن تەكسەرۋ قاجەت.