جالعان اقشا جاساعانى ءۇشىن قازاقستان ازاماتى گرۋزيادان ەكستراديتسيالاندى
استانا. KAZINFORM - ول 2024 -جىلى تۇركيا رەسپۋبليكاسىنان جالعان بانكنوتتاردى اكەلىپ، قازاقستان اۋماعىندا وتكىزگەن دەگەن كۇدىككە ىلىنگەن. بۇل تۋرالى باس پروكۋراتۋرانىڭ باسپا ءسوز قىزمەتى حابارلادى.
باس پروكۋراتۋرا مەن قارجىلىق مونيتورينگ اگەنتتىگىنىڭ قىزمەتكەرلەرى، قازاقستان رەسپۋبليكاسىنىڭ گرۋزياداعى ەلشىلىگىنىڭ كومەگىمەن قازاقستاننىڭ مەملەكەتتىك شەكاراسى ارقىلى وتكىزە وتىرىپ، جالعان بانكنوتتاردى ساقتاعانى جانە وتكىزگەنى ءۇشىن قىلمىستىق جاۋاپتىلىققا تارتۋ ماقساتىندا قازاقستان ازاماتىن گرۋزيادان ەكستراديتسيالادى.
- ول 2024 -جىلى تۇركيا رەسپۋبليكاسىنان جالعان بانكنوتتاردى اكەلىپ، قازاقستان اۋماعىندا وتكىزگەن دەگەن كۇدىككە ىلىنگەن. قىلمىس جاساعاننان كەيىن كۇدىكتى جاسىرىنىپ، وعان حالىقارالىق ىزدەۋ جاريالانعان. وسى جىلدىڭ مامىرىندا ول گرۋزيا اۋماعىندا ۇستالىپ، قازاقستان رەسپۋبليكاسى باس پروكۋراتۋراسىنىڭ سۇراۋى بويىنشا وتانىنا ەكستراديتسيالاندى، - دەلىنگەن حابارلامادا.
قازىرگى ۋاقىتتا كۇدىكتى تەرگەۋ يزولياتورىنا قامالدى.
ايىپتالعان قىلمىستى جاساعانى ءۇشىن مۇلكىن تاركىلەپ، بەس جىلدان ون جىلعا دەيىن باس بوستاندىعىنان ايىرۋ تۇرىندەگى جازا كوزدەلگەن.
ەسكە سالا كەتەيىك، بۇعان دەيىن باس پروكۋراتۋرا ۇقساس قىلمىستى جاساعانى ءۇشىن شۆەتسيادان قازاقستان ازاماتشاسىن ەكستراديتسيالاپ، قازىرگى تاڭدا ول سوتتالدى.
ايتا كەتەلىك الاياقتىق جاساپ، ىزدەۋدە بولعان قازاقستان ازاماتى ساۋد ارابياسىنان ەكستراديسيالانعان ەدى.