جالعا بەرۋشى اگرەگاتورلار ساموكاتقا ۇلكەن ءنومىر ورناتۋعا مىندەتتەلۋى مۇمكىن

استانا. KAZINFORM - ىشكى ىستەر ءمينيسترىنىڭ ورىنباسارى يگور لەپەحا ءماجىلىس كۋلۋارىندا ساموكات تىزگىندەپ ءجۇرىپ ەرەجە بۇزعانداردى قالاي جازالاۋعا بولاتىنىن ايتتى.

- ساموكاتتاردىڭ بارىندە بىرىزدەندىرۋ ءنومىرى بار. وتە كىشكەنە، كوزگە ارەڭ كورىنەتىن بولسا دا بار. ول ءنومىردى ساموكاتتى جالعا ۇسىناتىن اگرەگاتورلار ورناتادى. بۇل دەپۋتاتتاردىڭ ۇسىنىسى - وسى ءنومىر كوزگە كورىنەتىندەي، ۇلكەن بولۋ كەرەك دەپ وتىرمىز. شارتتى تۇردە ايتساق، ساموكات تىزگىندەگەن جولاۋشى جاياۋ بالانى قاعىپ كەتكەن بولسا، قانداي ءنومىرى بار ساموكات ەكەنىن كورىنەتىندەي بولۋ كەرەك. ءبىز سول مالىمەت بويىنشا اگرەگاتوردان وقيعا بولعان ۋاقىتتا كىم تەپكەنىن سۇراتامىز. وسىلايشا جول ەرەجەسىن بۇزعان ادام جاۋاپقا تارتىلادى، - دەدى ول.

ءمينيستردىڭ ورىنباسارى رەسەيدە ءدال وسىنداي ءتاسىل بار ەكەنىن اتاپ ءوتتى.

- ءبىز دە ساموكاتتار ماسكەۋدەگى سياقتى كوزگە كورىنەتىن بولسىن دەپ وتىرمىز. ويتكەنى بىزدەگى نومىرلەر سىرىڭكەنىڭ قورابىنداي عانا. دەپۋتاتتارمەن وسى باعىتتا جۇمىس ىستەپ جاتىرمىز. قولداۋ تاپسا، وسىنداي مىندەتتەمە ەنگىزىلەدى. بۇل ساموكات تىزگىندەگەن كەزدە زاڭ بۇزاتىن ادامداردى انىقتاۋعا مۇمكىندىك بەرەر ەدى، - دەدى يگور لەپەحا.

رەسمي دەرەك بويىنشا، 2024 -جىلدىڭ باسىنان بەرى موپەد پەن ەلەكترلى ساموكاتتىڭ كەسىرىنەن 1,7 مىڭ ادام جاپا شەككەن.

اۆتور

ەسىمجان ناقتىباي