تولەمنىڭ ناقتى كۇنى ەڭبەك نەمەسە ۇجىمدىق شارتتا بەلگىلەنەدى. ەگەر بەلگىلەنگەن تولەم كۇنى دەمالىس نە مەرەكە كۇنىنە سايكەس كەلسە، جالاقى ودان بۇرىنعى كۇندەردە تولەنەدى.
جالاقى كەشىكتىرىلسە، نە ىستەۋ كەرەك؟
الدىمەن جۇمىسكەر جۇمىس بەرۋشىگە جۇگىنىپ، كەشىكتىرۋ سەبەبىن انىقتاپ، بەرەشەكتى وتەۋدى تالاپ ەتە الادى.
ماسەلە شەشىلمەسە، جۇمىسكەر جۇمىس بەرۋشىنىڭ تۇرعان جەرىندەگى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ەڭبەك ينسپەكتسياسى كوميتەتىنىڭ اۋماقتىق دەپارتامەنتىنە جۇگىنۋگە قۇقىلى. ءوتىنىشتى eOtinish جۇيەسى ارقىلى ەلەكتروندىق فورماتتا دا جىبەرۋگە بولادى.
وتىنىشكە ەڭبەك قاتىناستارىن جانە جالاقى بويىنشا بەرەشەكتى راستايتىن قولدا بار قۇجاتتاردى قوسا تاپسىرۋ كەرەك. ول جەردە ەڭبەك شارتى، ەسەپ ايىرىسۋ پاراقتارى، بانك كوشىرمەلەرى، بۇيرىقتار جانە وزگە دە راستايتىن ماتەريالدار بولۋى مۇمكىن.
ءوتىنىش قارالعاننان كەيىن قانداي ءىس-شارالار جۇرگىزىلەدى؟
قاجەت بولعان جاعدايدا مەملەكەتتىك ەڭبەك ينسپەكتورلارى زاڭنامادا بەلگىلەنگەن تارتىپپەن باقىلاۋ ءىس-شارالارىن جۇرگىزەدى.
بەرەشەك فاكتىسى راستالسا، جۇمىس بەرۋشىگە بۇزۋشىلىقتى جويۋعا، ونىڭ ىشىندە جالاقى بويىنشا بەرەشەكتى وتەۋگە مىندەتتى ورىندالۋعا ءتيىس نۇسقاما بەرىلەدى. نۇسقامانىڭ ورىندالۋىن مەملەكەتتىك ەڭبەك ينسپەكتورلارى باقىلاۋعا الادى.
- سونىمەن قاتار جۇمىس بەرۋشى جۇمىسكەرگە جالاقى بەرەشەگىن عانا ەمەس، كەشىكتىرىلگەن ءاربىر كۇنتىزبەلىك كۇن ءۇشىن تۇراقسىزدىق ايىبىن دا تولەۋگە مىندەتتى. ونىڭ مولشەرى جالاقى تولەۋ مىندەتتەمەسى ورىندالعان كۇنى قولدانىستا بولعان ق ر ۇلتتىق بانكى بازالىق مولشەرلەمەسىنىڭ 1,25 ەسەلەنگەن مولشەرى بويىنشا ەسەپتەلەدى، - دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ تۇسىنىكتەمەسىندە.
جۇمىس بەرۋشىگە قانداي جاۋاپكەرشىلىك كوزدەلگەن؟
جالاقىنى تولىق كولەمدە، بەلگىلەنگەن مەرزىمدە تولەمەگەنى ءۇشىن، سونداي-اق جۇمىس بەرۋشىنىڭ كىناسىنەن تۇراقسىزدىق ايىبىن ەسەپتەمەگەنى جانە تولەمەگەنى ءۇشىن قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 87-بابىندا اكىمشىلىك جاۋاپكەرشىلىك كوزدەلگەن.
ايىپپۇل مولشەرى:
لاۋازىمدى ادامدارعا - 30 ا ە ك؛
شاعىن كاسىپكەرلىك سۋبەكتىلەرىنە نەمەسە كوممەرتسيالىق ەمەس ۇيىمدارعا - 60 ا ە ك؛
ورتا كاسىپكەرلىك سۋبەكتىلەرىنە - 100 ا ە ك؛
ءىرى كاسىپكەرلىك سۋبەكتىلەرىنە - 150 ا ە ك مولشەتىن قۇرايدى.
- جالاقىنىڭ كەشىكتىرىلۋى جۇمىسكەردىڭ ەڭبەك قۇقىقتارىنىڭ بۇزىلۋى بولىپ سانالاتىنىن ەسكە سالامىز. ەگەر جۇمىس بەرۋشى جالاقىنى بەلگىلەنگەن مەرزىمدە تولەمەسە، جۇمىسكەر زاڭنامادا كوزدەلگەن شارالاردى قابىلداپ، ءوز قۇقىقتارىن قالپىنا كەلتىرۋ ءۇشىن مەملەكەتتىك ەڭبەك ينسپەكتسياسى ورگاندارىنا جۇگىنە الادى، - دەلىنگەن حابارلامادا.