جامبىل وبلىسىندا ءبىر ءۇيىر جىلقى ۇرلاعان تۇرعىن ۇستالدى

استانا. KAZINFORM - جامبىل وبلىسىندا 16 باس جىلقىنى ايداپ اكەتكەن 44 جاستاعى تۇرعىن ۇستالدى.

Фото: ДП Жамбылской области

تەرگەۋ بارىسىندا ونىڭ ۇرلانعان مالدىڭ جەتەۋىن سويىپ، ەتىن ساتىپ جىبەرگەنى بەلگىلى بولدى.

وقيعا ت. رىسقۇلوۆ اۋدانىنىڭ قۇمدى القابىنداعى جايىلىمدا بولعان. ەر ادام جايىلىمدا قاراۋسىز جۇرگەن جىلقىلاردى بايقاپ، ولاردى يەمدەنۋدى ۇيعارعان.

ول وزىنە تيەسىلى اتقا ءمىنىپ، جىلقىلاردى ۇيىرىمەن بىرگە ايداپ اكەتكەن. سالدارىنان مال يەسىنە 24 ميلليون تەڭگە كولەمىندە ماتەريالدىق شىعىن كەلتىرىلگەن.

كۇدىكتى ۇستالىپ، ۋاقىتشا ۇستاۋ يزولياتورىنا قامالدى. اتالعان دەرەك بويىنشا اسا ءىرى مولشەردەگى مال ۇرلىعى بابىمەن سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.

پوليسيا ازاماتتاردى مال-مۇلكىنىڭ ساقتالۋىنا جاۋاپكەرشىلىكپەن قاراۋعا، ءتورت تۇلىكتى قاراۋسىز قالدىرماۋعا شاقىردى.