جاپپاي توبەلەس كەزىندە تانىسىن ابايسىزدا ءولتىرىپ العان اقتوبەلىككە سوت ۇكىمى شىقتى

اقتوبە. قازاقپارات - №2-اقتوبە قالالىق سوتىندا جاپپاي توبەلەس كەزىندە تانىسىنا پىشاق سۇعىپ العان 20 جاستاعى جىگىت سوتتالدى. ول 1 جىل 6 ايعا باس بوستاندىعىنان ايىرىلدى.

وقيعا بيىل اقتوبە قالاسى قىزىلجار تۇرعىن الابىندا بولدى. ءىس ماتەريالىنا سۇيەنسەك، جاپپاي توبەلەس كەزىندە سوتتالۋشى جارالانىپ، قورعانباققا جانىندا جاتقان پىشاقتى العان. سول كەزدە ءوز تانىسىنا سۇعىپ الدى. قىلمىستىق ءىس «ابايسىزدا قازاعا ۇشىراتۋ» بابىمەن قارالىپ، ۇكىم شىقتى.

- سوتتالۋشى 2024 -جىلدىڭ قاڭتار ايىنىڭ باسىندا ءوزىنىڭ تانىستارىمەن بىرگە توپ بولىپ باسقا ەلدىمەكەننىڭ بالالارىمەن سويلەسۋگە بارىپ، ارتى توبەلەسكە ۇلاسقان. توبەلەس بارىسىندا سوتتالۋشى جارالانىپ، جەردە جاتقان پىشاقتى الادى. قورعانۋ ماقساتىندا سەرمەگەن كەزدە وزىمەن بىرگە بارعان تانىسىنا سۇعىپ الدى. سوتتالۋشى كىناسىن تولىق مويىنداپ، ىستەگەن ىسىنە وكىنىپ، جابىرلەنۋشىلەردەن كەشىرىم سۇرادى. سوتتىڭ ۇكىمىمەن سوتتالۋشى قىلمىستىق كودەكستىڭ «ابايسىزدا قازاعا ۇشىراتۋ» بابىمەن كانىلى دەپ تانىلىپ، وعان 1 جىل 6 ايعا باس بوستاندىعىنان ايىرۋ جازاسى تاعايىندالدى. جابىرلەنۋشىلەردىڭ پايداسىنا 6 ميلليون تەڭگە مورالدىق زيان جانە 800 مىڭ تەڭگە شىعىن ءوندىرىلدى. سوت ۇكىمى زاڭدى كۇشىنە ەنگەن جوق، - دەپ حابارلادى اقتوبە قالاسىنىڭ №2-سوتىنىڭ باسپا ءسوز قىزمەتى.

ەسكە سالساق، بيىل قىستا اقتوبەدە الەۋمەتتىك جەلىدەگى جازبادان سوڭ ەكى جىگىت سوزگە كەلىپ، ولار دوستارى مەن تانىستارىن ەرتىپ، كەزدەسۋگە باردى. سول جەردە جاپپاي توبەلەس بولىپ، ەكى ادام كوز جۇمدى.

بۇل توبەلەستەن سوڭ ءىس ەكىگە ءبولىنىپ، ءبىر قىلمىستىق ءىس بويىنشا قازىر 6 سوتتالۋشى سوت الدىندا جاۋاپ بەرىپ جاتىر.

اۆتور
التىناي ساعىندىقوۆا