جاڭاوزەندىك فوتوگراف قاراقۇتانداردىڭ ۇيا سالعانىن تاسپالادى
اقتاۋ. KAZINFORM - قاراقۇتان (باكلان) ماڭعىستاۋدا مەكەندەيدى. ولاردىڭ ەرەكشەلىگى - ۇياسىن اشىق اسپان استىندا، قاز- قاتار ءتىزىپ، ءبىر جەرگە شوعىرلاندىرىپ سالادى. وسى كورىنىستى بەينەجازباعا تۇسىرگەن فوتوگراف باقىتجان جۇماعالي ۇلى Kazinform تىلشىسىمەن كاسىبىنىڭ قىر- سىرىمەن ءبولىستى.
باقىتجان جۇماعالي ۇلى - اۋەسقوي فوتوگراف. جاڭاوزەن قالاسىنىڭ تۇرعىنى. 15 جىلدان بەرى وسى سالادا جۇمىس ىستەپ كەلەدى. ال ماڭعىستاۋدىڭ كوركەم تابيعاتىن، اڭ- قۇستارىن فوتو- ۆيدەوعا ءتۇسىرىپ، الەۋمەتتىك جەلىگە جۇكتەي باستاعانا 1 جىلداي بولعان.
- بۇل تۇسىرىلىمدەر ارقىلى ماڭعىستاۋدىڭ تابيعاتى مەن جان- جانۋارلارىن ناسيحاتتاپ قانا قويماي، حالىقتى تابيعاتتى قورعاۋعا، قورشاعان ورتاعا جاناشىرلىقپەن قاراپ، قۇرمەتتەۋگە شاقىرعىم كەلەدى، - دەيدى فوتوگراف.
ول قاراقۇتاندار مەكەندەيتىن اۋماققا جەتۋ ءۇشىن ۇزاق جول جۇرگەنىن ايتادى. جەتكەن سوڭ قاناتتىلاردى ۇركىتىپ الماۋ ءۇشىن الىستان عانا ءتۇسىرىپتى.
- قاراقۇتانداردى ءتۇسىرۋ ءۇشىن اقتاۋ قالاسىنان تاڭعى 05:00 شىعىپ، كەندىرلى دەمالىس ورنىنا ساعات 08:00 جەتتىك. ارى قاراي قايىقپەن قاراقۇتان مەكەندەيتىن جەرگە جەتتىك. تۇسىرىلىمگە 1 ساعاتتاي ۋاقىت جۇمسادىم. قۇستاردى ۇركىتپەۋ ماقساتىندا قاشىقتان ءتۇسىرىپ كەرى قايتتىق، - دەيدى فوتوگراف.
باقىتجان جۇماعالي ۇلى بۇعان دەيىن تاۋ- تاسقا ۇيا سالعان قاراقۇتانداردى بەينەجازباعا تۇسىرگەن. بۇل جولى جەردە قاز- قاتار تىزىلگەن ۇيالاردى كورىپ قاتتى تاڭعالعان. ياعني، قاراقۇتانداي ەكى ءتۇرلى ۇيا سالادى.
- ماڭعىستاۋ وبلىسىندا قاراقۇتاندار جاپپاي ۇيا سالىپ، بالاپان ورگىزۋ كەزەڭىنە كىرىستى. بۇل قۇستاردىڭ ەرەكشەلىگى - ۇيالارىن اشىق دالادا، ءشوپتىڭ ۇستىنە قاز- قاتار ءتىزىپ، ەرەكشە شوعىرلانعان تۇردە ورنالاستىرادى. قاراقۇتانداردىڭ ۇيا سالۋ ۇلگىسى قولدان قويعانداي كورىنەدى. ياعني، بىردەي اراقاشىقتىق پەن رەتتەلگەن ءتارتىپ بار. مۇنداي كورىنىس قازاقستاندا وتە سيرەك كەزدەسەدى. مامانداردىڭ ايتۋىنشا، ماڭعىستاۋ - باكلان قۇستارىنىڭ ەڭ كوپ شوعىرلانعان ايماقتارىنىڭ ءبىرى، - دەيدى باقىتجان جۇماعالي ۇلى.
فوتوگرافتىڭ قاراقۇتاندار تۋرالى بەينەجازباسى الەۋمەتتىك جەلىلەردە كەڭىنەن تارالىپ جاتىر.
اۋەسقوي فوتوگراف بۇعان دەيىن بايعىز، قارامويناق فەليپ، قۇتان، اققۋ قۇستارىن تاسپالاعان. ماڭعاز ماڭعىستاۋدىڭ ءتورت تۇلىگىن دە ەرەكشە قىرىنان ءتۇسىرىپ ءجۇر.
- وسى كاسىبىمنىڭ ارقاسىندا ماڭعىستاۋدىڭ ەرەكشە جەرلەرىن كوردىم. سۇلۋ تابيعاتى ءاردايىم تاڭعالدىرادى. ونىڭ تاۋ- تاسىن، اڭ-قۇسىن ەرەكشە قۇرمەتتەيمىن، - دەيدى باقىتجان جۇماعالي ۇلى.