بۇگىن Qazaq Ai Research University ۋنيۆەرسيتەتىندە جوعارى ءبىلىم قىزمەتكەرلەرى كۇنىنە ارنالعان فورۋم ءوتتى. ءىس-شارا بارىسىندا ۇلتتىق تەستىلەۋ ورتالىعىنىڭ ديرەكتورى نۇرسەيىت بايجانوۆ «ۇ ب ت- نىڭ جاڭا فورماتى ءبىلىم الۋشىلاردىڭ ءبىلىمىن باعالاۋدىڭ زاماناۋي قۇرالى رەتىندە» تاقىرىبىندا بايانداما جاسادى.
فورۋمعا ق ر عىلىم جانە جوعارى ءبىلىم مينيسترلىگىنىڭ، جوعارى وقۋ ورىندارىنىڭ جانە ۆەدومستۆولىق باعىنىستى ۇيىمداردىڭ باسشىلارى مەن وكىلدەرى قاتىستى.
ءوز بايانداماسىندا نۇرسەيىت بايجانوۆ ۇ ت و حالىقارالىق ETS ۇيىمىمەن بىرلەسىپ جۇزەگە اسىرىپ جاتقان Admission Insight Test (AIT) جوباسى تۋرالى باياندادى. جوبا 2026-جىلعى اقپاندا باستالىپ، 2030-جىلعا دەيىن جالعاسادى. ونىڭ ماقساتى - ءبىلىم بەرۋ جۇيەسىندەگى وزگەرىستەر مەن زاماناۋي الەمنىڭ تالاپتارىن ەسكەرە وتىرىپ، قابىلداۋ ەمتيحاندارىن وتكىزۋ جانە باعالاۋ تاسىلدەرىن جاڭارتۋ.
- ءبىلىم ەندى تاپشى رەسۋرس ەمەس. تاپشى رەسۋرسقا اينالعانى - پايىمداۋ قابىلەتى. ءبىلىمدى قايتا جاڭعىرتۋدى تەكسەرەتىن ەمتيحان بۇگىندە جاساندى ينتەللەكت تالاپكەرگە قاراعاندا الدەقايدا جىلدام ورىندايتىن ارەكەتتى باعالايدى. سوندىقتان قابىلداۋ جۇيەسىن رەفورمالاۋ - بۇكىل ءبىلىم بەرۋ جۇيەسىن وزگەرتۋدىڭ ەڭ پارمەندى تەتىكتەرىنىڭ ءبىرى. قابىلداۋ مودەلى وزگەرگەن كەزدە ونىمەن بىرگە بۇكىل جۇيە دە وزگەرە باستايدى، - دەپ اتاپ ءوتتى نۇرسەيىت بايجانوۆ.
ۇسىنىلىپ وتىرعان AIT ەمتيحانىنىڭ قۇرىلىمى ەكى نەگىزگى بولىكتەن تۇرادى:
1. پاندىك تەستىلەر. 14 بەيىندىك ءپان بويىنشا وتكىزىلەدى. تاپسىرمالار مەملەكەتتىك ستاندارتقا سايكەس جاڭارتىلىپ، اقپاراتتى جاي عانا ەستە ساقتاۋ مەن قايتالاۋدان گورى وقۋ ماتەريالىن تەرەڭ تۇسىنۋگە باسىمدىق بەرىلەدى.
2. داعدىلاردى باعالاۋ تەستى. سىني ويلاۋ، اكادەميالىق جازىلىم جانە زەرتتەۋ داعدىلارى، كوممۋنيكاتسيالىق قابىلەتتەر، جاساندى ينتەللەكتىنى پايدالانۋ ساۋاتتىلىعى، ساندىق جانە سيفرلىق ساۋاتتىلىق، سونداي-اق كرەاتيۆتى جانە ديزايندىق ويلاۋ داعدىلارىن باعالاۋعا باعىتتالعان بەس مودۋلدى قامتيدى. سوڭعى مودۋل ازىرلەنۋ ۇستىندە.
ۇ ت و ديرەكتورى پاندىك ءبىلىمنىڭ ماڭىزى بۇرىنعىداي جوعارى ەكەنىن ەرەكشە اتاپ ءوتتى. داعدىلاردى باعالاۋ بولىگى پاندىك ءبىلىمدى الماستىرۋعا ەمەس، ونى باعالاۋدى تولىقتىرۋعا باعىتتالعان. ەمتيحاننىڭ ۇسىنىلىپ وتىرعان قۇرىلىمى ءبىلىم بەرۋ ساياساتى مەن زەرتتەۋ ناتيجەلەرىنە قاراي ناقتىلاناتىن بولادى.
باياندامادا جاڭا فورماتتى ازىرلەۋ ۇدەرىسىنىڭ اشىقتىعىنا دا ەرەكشە نازار اۋدارىلدى. 2026-جىلعى ساۋىردە ۇ ت و مەن ETS بىرلەسىپ، شامامەن 4 مىڭ رەسپوندەنتتىڭ قاتىسۋىمەن زەرتتەۋ جۇرگىزدى. سونىمەن قاتار سەگىز فوكۋس-توپ جانە استانا قالاسىندا ءتورت تەرەڭدەتىلگەن تالقىلاۋ ۇيىمداستىرىلدى. جاڭا قابىلداۋ جۇيەسىن ازىرلەۋ بارىسىندا جوعارى وقۋ ورىندارىنىڭ، وقىتۋشىلاردىڭ جانە ءبىلىم بەرۋ جۇيەسىنىڭ باسقا دا قاتىسۋشىلارىنىڭ پىكىرلەرى ەسكەرىلەدى. بۇل ءارتۇرلى كوزقاراستاردى نازارعا الا وتىرىپ، قابىلداۋ ەمتيحاندارىن باعالاۋدىڭ جاڭا مودەلىن قالىپتاستىرۋعا مۇمكىندىك بەرەدى.
جوبانى ىسكە اسىرۋدىڭ كەلەسى كەزەڭى - AIT تەستىن پيلوتتىق رەجيمدە وتكىزۋ، ول 2027-جىلدىڭ كوكتەمىنە جوسپارلانعان.
وسىعان دەيىن قازاقستاندا ۇ ب ت- عا دايىندىق كۋرسىنىڭ باعاسى قانشا ەكەنىن زەردەلەگەن ەدىك.