- بىرىنشىدەن، قازاقستاندا جانار-جاعارماي باعاسى ىشكى سۇرانىس پەن ىشكى ۇسىنىسقا بايلانىستى قالىپتاساتىنىن اتاپ وتكىم كەلەدى. قازىرگى ۋاقىتتا مەملەكەت بۇرىنعىداي كوتەرمە جانە بولشەك ساۋداداعى باعانى رەتتەمەيدى. قاتەلەسپەسەم، بۇل تاجىريبەدەن 2024-جىلعى اقپاندا باس تارتتىق. سودان بەرى بۇگىنگى كۇنگە دەيىن باعا نارىقتىق تەتىك نەگىزىندە قالىپتاسىپ كەلەدى. شىنىمدى ايتسام، باعاعا قاتىستى بولجام جاساۋ وڭاي ەمەس. دەگەنمەن قازىرگى ۋاقىتتا ەلىمىزدەگى بەنزين مەن ديزەل وتىنى باعاسىنىڭ ارالىعىن ايتا الامىن. ودان كەيىن وزدەرىڭىز قورىتىندى جاساي جاتارسىزدار،- دەدى مينيستر ب ا ق وكىلدەرىنىڭ ساۋالىنا وراي.
ونىڭ دەرەگىنشە، ا ي-92 ماركالى بەنزيننىڭ باعاسى 253-271 تەڭگە ارالىعىندا، ال ديزەل وتىنى 356-367 تەڭگە ارالىعىندا ساتىلىپ جاتىر.
- كورىپ وتىرعاندارىڭىزداي، جانارماي قۇيۋ بەكەتتەرىندەگى باعا ايىرماشىلىعى ايتارلىقتاي. مۇنىڭ سەبەبى - كەيبىر جانارماي قۇيۋ بەكەتتەرىنىڭ ءونىمدى وتكىزۋگە جۇمسايتىن شىعىندارى وزگەلەرگە قاراعاندا تومەن بولۋى مۇمكىن. سوندىقتان ءبىر بەكەتتە باعا تومەن بولسا، ەكىنشىسىندە جوعارى. بۇل ەلىمىزدە نارىقتىق جاعداي مەن باسەكەلەستىك بار ەكەنىن كورسەتەدى، ياعني باعا ىشكى سۇرانىس پەن ىشكى ۇسىنىس نەگىزىندە قالىپتاسادى،- دەدى ەرلان اقكەنجەنوۆ.
مينيستر بەنزين مەن ديزەل وتىنىنىڭ باعاسى كۇرت ءوسۋى بايقالعان جاعدايدا مەملەكەت ونى تۇراقتاندىرۋ ءۇشىن بارلىق قاجەتتى شارانى قابىلدايتىنىنا سەندىرەدى. ونىڭ اتاپ وتۋىنشە، ول ءۇشىن قاجەتتى تەتىكتەردىڭ ءبارى بار.
— بىرىنشىدەن، ەلىمىزدە جانار-جاعارماي قورى جەتكىلىكتى. اتاپ ايتقاندا، بەنزين مەن ديزەل وتىنىنىڭ ءارقايسىسىنان 400 مىڭ توننادان استام قور بار. زاۋىتتارىمىز شتاتتىق رەجيمدە جۇمىس ىستەپ، ءونىمدى قالىپتى كولەمدە ءوندىرىپ جاتقانىن اتاپ وتكىم كەلەدى. ءونىمدى قالالارعا جونەلتۋ دە شتاتتىق رەجيمدە جۇزەگە اسىرىلىپ جاتىر. سوندىقتان دۇربەلەڭ تۋعىزىپ، سونىڭ سالدارىنان سۇرانىستىڭ كۇرت ارتۋىنا جانە باعانىڭ شارىقتاۋىنا نەگىز بولاتىن ەشقانداي جاعداي جوق،- دەدى ول.
بۇعان دەيىن ەلىمىزدەگى بەنزين، ديزەل وتىنى جانە اۆتوگاز باعاسىن جازعان ەدىك.