جاۋاپكەرشىلىگى جوعارى ينۆەستورلارعا قوسىمشا سالىقتىق جەڭىلدىكتەر بەرىلمەك
استانا. KAZINFORM - ۇلتتىق ەكونوميكا مينيسترلىگى ساپالى ينۆەستيتسيا اكەلەتىن جاۋاپكەرشىلىگى جوعارى ينۆەستورلارعا قوسىمشا قانداي جەڭىلدىكتەر بەرىلۋى مۇمكىن ەكەندىگىن ايتتى.
- بۇگىندە قولدانىستاعى زاڭناما قازاقستان رەسپۋبليكاسىنىڭ كاسىپكەرلىك كودەكسىنە سايكەس ينۆەستيتسيالىق جوبالاردى تابىستى ىسكە اسىرۋ ءۇشىن مەملەكەتتىك قولداۋدىڭ كەڭ سپەكترىن ۇسىنادى. كودەكسكە سايكەس مەملەكەتتىك قولداۋ شارالارى ينۆەستيتسيالىق جوبانى نەمەسە ينۆەستيتسيالىق باسىم جوبانى ىسكە اسىرۋعا ارنالعان ينۆەستيتسيالىق كەلىسىمشارت، ارنايى ينۆەستيتسيالىق كەلىسىمشارت جانە ينۆەستيتسيالار تۋرالى كەلىسىم اياسىندا ۇسىنىلادى، - دەدى ۆەدومستۆودان اگەنتتىك ساۋالىنا وراي.
مينيسترلىكتىڭ اتاپ وتۋىنشە، جوبانىڭ ەرەكشەلىگىنە جانە ينۆەستيتسيالار كولەمىنە بايلانىستى يمپورتقا كەدەندىك باجدار مەن قوسىمشا قۇن سالىعى، كورپوراتيۆتىك تابىس سالىعى، جەر مەن مۇلىككە سالىناتىن سالىقتاردى سالۋدان بوساتۋ، زاڭناما وزگەرگەن كەزدە مەملەكەتتىك زاتتاي گرانتتار مەن تۇراقتىلىق بەرۋ كوزدەلەدى.
- جەر قويناۋىن پايدالانۋ سالاسىنداعى جوبالار ءۇشىن ينۆەستيتسيالىق احۋالدى جاقسارتۋ ماقساتىندا جاڭا تەتىك - جەتىلدىرىلگەن مودەلدىك كەلىسىمشارت قولدانىسقا ەنگىزىلدى. ول تەڭىزدەگى دە، قۇرلىقتاعى دا، ونىڭ ىشىندە گاز جوبالارى ءۇشىن ءبىرقاتار پرەفەرەنتسيا ۇسىنادى. بۇل تەتىك كۇردەلى مۇناي-گاز جوبالارى ءۇشىن رەتتەۋشى جانە فيسكالدىق پرەفەرەنسيالاردى كوزدەيدى. سونداي-اق، ۇكىمەت سالىقتىق شەگەرىمدەر ارقىلى ينفراقۇرىلىم قۇرىلىسىنا ينۆەستوردىڭ شىعىندارىن وتەۋ بويىنشا قولداۋدىڭ جاڭا قۇرالىن پىسىقتاۋدا. بۇگىنگى تاڭدا كاسىپكەرلىك جانە سالىق كودەكستەرىنە ءتيىستى زاڭنامالىق تۇزەتۋلەر ازىرلەندى. تۇزەتۋلەرگە سايكەس ينۆەستيتسيالىق جوبانى ىسكە اسىرۋ ءۇشىن ينفراقۇرىلىم وبەكتىلەرىن سالۋعا جۇمسالاتىن ناقتى شىعىستار سوماسىنان ەسەپتەلگەن ينۆەستيتسيالار تۋرالى كەلىسىم جانە (نەمەسە) ينۆەستيتسيالىق كەلىسىمشارت جاساسقان ينۆەستوردىڭ سالىق مىندەتتەمەلەرى جەڭىلدىكتى سالىق كەزەڭى اياقتالعاننان كەيىن ازايتىلۋى مۇمكىن، - دەدى مينيسترلىكتەن.
ەستەرىڭىزگە سالا كەتسەك، وسى جىلدىڭ قاڭتارىندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ساپالى ينۆەستيتسيا اكەلەتىن جاۋاپكەرشىلىگى جوعارى ينۆەستورلارعا قوسىمشا جەڭىلدىكتەر بەرۋ ماسەلەسىن قاراستىرۋدى تاپسىرعان ەدى.