جاڭادان قۇرىلعان حالىقارالىق بوكس فەدەراتسياسى تۋرالى نە بىلەمىز

استانا. KAZINFORM - قازاقستان ۇلتتىق وليمپيادا كوميتەتىنىڭ پرەزيدەنتى گەننادي گولوۆكيننىڭ حالىقارالىق بوكس فەدەراتسياسى (World Boxing) جاڭا وليمپيادا كوميسسياسىنىڭ ءتوراعاسى بولىپ تاعايىندالۋى سپورت الەمىنىڭ باستى جاڭالىعى بولدى.

وسى ورايدا جاڭادان قۇرىلعان حالىقارالىق بوكس فەدەراتسياسى تۋرالى ايتا كەتكەندى ءجون كوردىك.

World Boxing - حالىقارالىق بوكس فەدەراتسياسى 2023-جىلدىڭ ساۋىرىندە قۇرىلىپ، سول جىلى قاراشا ايىندا ءوز جۇمىسىن باستادى. فرانكفۋرتتا (گەرمانيا) وتكەن العاشقى كونگرەستە ۇيىمنىڭ باسشىلىعى جانە كوميتەتتەرى انىقتالىپ، جارعىسى بەكىتىلدى.

قازىرگى تاڭدا ۇيىم قۇرامىنا الەمنىڭ 44 ەلىنىڭ بوكس فەدەراتسياسى مۇشە.

ۇيىمنىڭ العاشقى پرەزيدەنتى بولىپ نيدەرلاندتىق بوريس ۆان دەر ۆورس تاعايىندالسا، رايان و’شي (كانادا)، مەتت حولت (انگليا) جانە دينا گليكيديس (اۆستراليا) ورىنباسارى بولدى.

ۇيىمىنىڭ شتاب-پاتەرى شۆەيتساريانىڭ لوزاننا قالاسىندا ورنالاسقان.

باستى ماقساتى - بوكستى وليمپيادا باعدارلاماسىندا ساقتاپ قالۋ

ۇيىمنىڭ قۇرىلۋىنىڭ باستى سەبەبى - بوكستى وليمپيادالىق سپورت ءتۇرى رەتىندە ساقتاپ قالۋ. 2019-جىلدىڭ شىلدەسىندە حالىقارالىق وليمپيادا كوميتەتى (ح و ك) كوپتەگەن سىبايلاس جەمقورلىق داۋلارىنا بايلانىستى حالىقارالىق بوكس قاۋىمداستىعىمەن (International Boxing Association, IBA) جۇمىسىن توقتاتتى.

سونداي-اق، حالىقارالىق وليمپيادا كوميتەتى ارنايى جۇمىس توبىن قۇرىپ، 2020-جىلعى جانە 2024-جىلعى وليمپيادا ويىندارىنا قاتىساتىن بوكسشىلاردى تەك كوميتەت مويىندالعان تۋرنيرلەر ارقىلى ىرىكتەدى.

2022-جىلدىڭ قازان ايىندا حالىقارالىق بوكس قاۋىمداستىعى رەسەي-ۋكراينا سوعىسىنا بايلانىستى حالىقارالىق وليمپيادا كوميتەتىنىڭ رەسەي مەن بەلارۋس بوكسشىلارىنا سالعان شەكتەۋگە قۇلاق اسپاي، كوپتەگەن ەلدەردىڭ بوكس قاۋىمداستىعىنىڭ بويكوت جاريالاۋىنا سەبەپ بولدى.

2023-جىلدىڭ ماۋسىمىندا حالىقارالىق وليمپيادا كوميتەتى حالىقارالىق بوكس قاۋىمداستىعىن وليمپيادا ويىندارىنان رەسمي تۇردە شىعاردى. داۋىس بەرۋ ناتيجەسىندە 69 ەل قولداپ داۋىس بەرسە، 1 ەل قارسى جانە 10 ەل قالىس قالعان.

قورىتىندىسىندا ا ق ش، ۇلى بريتانيا، گەرمانيا، نيدەرلاند، شۆەتسيا، فيليپپين جانە باسقا ەلدەردىڭ بوكس قاۋىمداستىقتارى ح ب ا- دان شىعىپ، بوكس سپورتىنىڭ 2028-جىلعى لوس-انجەلەس وليمپياداسىنان تىس قالماۋى ءۇشىن حالىقارالىق بوكس فەدەراتسياسى (World Boxing) قۇرىلدى.

ح و ك 2028-جىلى لوس-انجەلەستە وتەتىن جازعى وليمپيادانىڭ بوكس جارىسىن ارنايى جۇمىس توبى وتكىزبەيتىنىن جاريالاپ، وليمپيادا ويىندارىنىڭ باعدارلاماسىنا ازىرگە بوكس سپورتىن قوسقان جوق.

جاڭا قۇرىلعان حالىقارالىق بوكس فەدەراتسياسى 2025-جىلعا دەيىن حالىقارالىق وليمپيادا كوميتەتىنىڭ مۇشەسى اتانىپ، 2028-جىلعى وليمپيادا ويىندارىندا بوكس سپورتىن ساقتاپ قالۋدى جوسپارلاپ وتىر.

قازاقستان بوكس سپورتىنا اسەرى

World Boxing ۇيىمىنىڭ قۇرىلۋى قازاقستان بوكس سپورتىنىڭ دامۋى ءۇشىن جاڭا مۇمكىندىكتەر تۋعىزىپ وتىر. بۇعان دەيىن قازاقستان بوكسشىلارىنىڭ IBA قۇرامىنداعى جەكپە-جەگى كوپتەگەن داۋ-دامايعا قالعان ەدى. وعان ەڭ جارقىن مىسال رەتىندە 2016-جىلعى ريو وليمپياداسىنداعى لەۆيت-تيشەنكو كەزدەسۋىن ايتۋعا بولادى.

بۇل كۇندە قازاقستان ۇلتتىق وليمپيادا كوميتەتى باسشىسى قىزىمەتىن اتقارىپ وتىرعان، الەمگە ايگىلى كاسىپقوي بوكستان الەم چەمپيونى، افينا وليمپياداسىنىڭ كۇمىس جۇلدەگەرى گەننادي گولوۆكين وسى جىلى شىلدەنىڭ باسىندا قازاقستاندى جانە باسقا ەلدەردى جاڭا ۇيىمعا قوسىلۋعا شاقىرعان.

ال بۇگىن عانا ۇيىمنىڭ وليمپيادا كوميسسياسىنىڭ ءتوراعاسى بولىپ تاعايىندالعان گولوۆكين بوكستى وليمپيادالىق سپورت ءتۇرى رەتىندە ساقتاپ قالۋ - جۇمىسىنداعى ەڭ باستى باسىمدىق ەكەنىن ايتتى.

سونداي-اق، قازاقستان بوكس فەدەراتسياسى ىلە-شالا World Boxing ۇيىمىنىڭ قاتارىنا قوسىلۋ ءۇشىن رەسمي ءوتىنىش بەرگەنىن حابارلادى.

ق ر بوكس فەدەراتسياسى بۇل ۇزاق تالقىلاۋلار مەن ساراپتامانىڭ ناتيجەسىندە قابىلدانعان ماڭىزدى شەشىم ەكەنىن جانە ءبىرىنشى كەزەكتە وتاندىق بوكسشىلاردىڭ وليمپيادالىق بولاشاعىنا تىكەلەي بايلانىستى ەكەنىن اتاپ ءوتتى.

«قازىر بوكستىڭ وليمپيادا باعدارلاماسىندا قالۋ ماسەلەسى ح و ك دەڭگەيىندە تالقىلانىپ جاتىر. بوكستى وليمپيادا ويىندارىنىڭ باعدارلاماسىندا ساقتاپ قالۋ ماقساتىندا بارلىق ەلدەرمەن ورتاق جۇمىس جاساۋعا دايىنبىز. بۇل شەشىم بوكستى ودان ءارى دامىتۋعا مۇمكىندىك بەرەدى دەپ سانايمىز. World Boxing وليمپيادالىق كوميسسياسىنىڭ ءتوراعاسى، ۇلتتىق وليمپيادا كوميتەتىنىڭ پرەزيدەنتى گەنناديي گولوۆكينمەن كەزدەسۋ بارىسىندا وتاندىق بوكستىڭ دامۋ جولدارىن تالقىلادىق»، - دەيدى فەدەراتسيا باسشىسى شاحمۇرات ءمۇتالىپ.

ايتا كەتەيىك، 2024-جىلعى پاريج وليمپياداسىندا قازاقستان ەرلەر بوكس قۇراماسى ساپىندا 7 سپورتشى قاتىسىپ، نۇربەك ورالباي عانا كۇمىس مەدال ەنشىلەگەن بولاتىن.

پاريج وليمپياداسىنان كەيىن قازاقستان بوكس فەدەراتسياسى قورىتىندى كەڭەس وتكىزىپ، ناتيجەسىندە بوكستان ەرلەر كومانداسىنىڭ باپكەرلىك قۇرامى تولىعىمەن جۇمىستان شەتتەتىلدى.

ولاردىڭ قاتارىندا باس جاتتىقتىرۋشى مىرزاعالي ايتجانوۆ جانە باپكەرلىك قۇرامداعى 10 مامان، ق ب ف ۆيتسە-پرەزيدەنتى ازيز قوجامبەتوۆ قىزمەتتەن بوساتىلعان ەدى.

قازىرگى ۋاقىتتا ۇلتتىق قۇرامانى قايرات ءساتجان باستاعان جاڭا باپكەرلىك قۇرام جاتتىقتىرىپ جاتىر.

اۆتور مۇحتار قاليموللا ۇلى