جاڭا سالىق كودەكسى كەيبىر سالىق تولەۋشىلەردى جەكە كاسىپكەر رەتىندە تىركەلۋدەن بوساتادى

استانا. KAZINFORM - ۇلتتىق ەكونوميكا ۆيتسە-ءمينيسترى ازامات ءامرين «اتامەكەن» ۇلتتىق كاسىپكەرلەر پالاتاسى وتكىزگەن جاڭا سالىق كودەكسىن تانىستىرۋ ءىس-شاراسىندا قولونەرشىلەرگە ارناپ جەكە سالىق رەجيمى جۇمىس ىستەيتىنىن ءمالىم ەتتى.

«بىزدە ارنايى سالىق رەجيمدەرى وتە كوپ ەكەنىن بىلەسىزدەر. بيزنەسپەن سويلەسكەندە، «اتامەكەن» ۇلتتىق كاسىپكەرلەر پالاتاسىنىڭ وكىلدەرىمەن سويلەسكەندە رەجيمدەردىڭ وتە كوپ ەكەنىن، شاتاساتىندارىن ايتتى. وسى كەمشىلىكتەردىڭ ءبارىن جويۋ ءۇشىن رەجيمدەردى بارىنشا قىسقارتتىق. ءبىرىنشى رەجيم - ءوز-ءوزىن جۇمىسپەن قامتۋشىلار رەجيمى. وعان قازىر موبيلدىك قوسىمشا ارقىلى، ينتەرنەت پلاتفورمالار ارقىلى قىزمەت كورسەتۋشىلەر، 34 قىزمەت ءتۇرى بويىنشا پاتەنت ارقىلى جۇمىس ىستەۋشىلەر كىرەدى. بۇل 34 قىزمەت ءتۇرىنىڭ نەگىزگى بولىگى قولونەرشىلەر دەۋگە بولادى»، - دەدى ول.

ۆيتسە-مينيستر اتالعان تۇلعالارعا جەكە كاسىپكەر رەتىندە تىركەلۋدىڭ قاجەت بولمايتىنىن ايتادى.

«بۇل جەردە استىن سىزىپ تۇرىپ ايتاتىن دۇنيە، ولارعا ەندى جەكە كاسىپكەر رەتىندە ەسەپكە تۇرۋدىڭ قاجەتى بولمايدى. ياعني، جەكە كاسىپكەر رەتىندە تىركەلۋى مىندەتتى ەمەس، تابىسى بويىنشا جاي عانا الىم تولەپ وتىرادى. دەمەك، تابىسىنان تولەم جاسايتىن جەكە تۇلعالار بولادى دەگەن ءسوز. نەگە تولەم دەپ وتىرعانىمدى تۇسىندىرەيىن. بىزدە سالىق سالۋ نىسانى ونىڭ تابىسى بولادى. تابىستىڭ سالىق مولشەرلەمەسى 4 پايىز بولادى. ءبىراق بۇل جەردەگى 4 پايىز سالىق تۇرىندە الىنبايدى. ولار ءوزىنىڭ زەينەتاقى جيناعىنا، الەۋمەتتىك ساقتاندىرۋىنا، مەديتسينالىق ساقتاندىرۋىنا عانا جارنا اۋدارادى. بولدى، بۇل جەردە سالىق جوق. بۇل جەردەگى تابىس شەگى 1 ميلليون 250 مىڭ تەڭگە بولادى. ال تابىس كوزى پاتەنت تىزىمدەگى 34 قىزمەت تۇرىمەن، ينتەرنەت پلاتفورمالارى ارقىلى موبيلدىك قوسىمشالار ارقىلى قىزمەت كورسەتۋمەن بايلانىستى بولۋ كەرەك»، - دەدى ازامات ءامرين.

اۆتور

ەسىمجان ناقتىباي