جاڭا سالىق كودەكسى پاتەر باعاسىن قىمباتتاتۋى مۇمكىن بە

استانا. KAZINFORM - پرەمەر- مينيستر ولجاس بەكتەنوۆ ۇكىمەتتە وتكەن باسپا ءسوز ءماسليحاتىندا تۇرعىن ءۇي نارىعىنداعى باعا وزگەرىستەرى تۋرالى تىلشىلەر سۇراعىنا جاۋاپ بەردى.

− تۇرعىن ءۇي نارىعىندا كۇردەلى ماسەلە بولادى دەپ كۇتپەيمىن. بۇل نارىق، مۇندا ءبارى سۇرانىس پەن ۇسىنىسقا بايلانىستى. ەگەر ۇسىنىس بولماسا، ياعني ءبىز تۇرعىن ءۇي سالماساق، وندا باعانىڭ ءوسۋى انىق بولار ەدى. ءبىراق ءبىز قۇرىلىستى توقتاتپادىق، بىلتىر شامامەن 18,9 ميلليون شارشى مەتر تۇرعىن ءۇي سالىندى، بۇل بۇرىن- سوڭدى بولماعان كورسەتكىش. بيىل 19 ميلليون شارشى مەتردەن استام تۇرعىن ءۇيدى پايدالانۋعا بەرەمىز. بۇل دا وتە قارقىندى ءوسىم، − دەپ اتاپ ءوتتى ۇكىمەت باسشىسى.

سونىمەن بىرگە، قۇرىلىس سالاسىنداعى سالىققا قاتىستى وزگەرىستەر اسەرىن جۇمسارتاتىن ءبىرقاتار جەڭىلدىكتەر قاراستىرىلعان.

− مۇنىڭ ءبارى تالداۋ نەگىزىندە جاسالىپ وتىر. ءبىز قۇرىلىس كومپانيالارىنىڭ باعا قالىپتاستىرۋ كەزىندە قوسىلعان قۇن سالىعىنان بوساتىلاتىنى، ءتۇرلى جەڭىلدىكتەردى پايدالاناتىنى ەسەپكە الىنباي، ارتىق پايدا تاۋىپ وتىرعانىن كوردىك. سوندىقتان كەلەسى جىلى سالىق كودەكسىنىڭ نورمالارى ەنگىزىلگەن سوڭ تۇرعىن ءۇي باعاسى كۇرت قىمباتتايدى دەپ ويلامايمىز. باعانىڭ الىپساتارلىق جولمەن شارىقتاۋىنا نەمەسە نارىقتاعى كەلىسىلگەن ارەكەتتەر سالدارىنان قىمباتتاۋىنا دا جول بەرمەيمىز. ونداي جاعدايلار ورىن السا، بىزدە زاڭ اياسىندا ءتيىستى شارا قولدانۋعا تولىق مۇمكىندىك بار، − دەيدى و. بەكتەنوۆ.

بۇعان دەيىن ولجاس بەكتەنوۆ جىل باسىنداعى ءىرى كاسىپكەرلەرگە جاساعان ۇندەۋىنەن سوڭ بيۋدجەتكە 47 ميلليارد تەڭگە سالىق تۇسكەنىن ايتقان ەدى. ءىرى قۇرىلىس كومپانيالارى بيزنەستى بولشەكتەۋ سحەماسىن قولدانىپ، جەڭىلدەتىلگەن سالىق رەجيمىندە جۇمىس ىستەپ كەلگەن.