جاڭا جىلدان باستاپ «Indriver» كولىكتەرىنە تالاپتار كۇشەيەدى

تاراز. KAZINFORM - بيىلعى جىلدىڭ مامىر ايىندا ق ر كولىك جانە ىشكى ىستەر مينيستلىكتەرىمەن جانە «Indriver»، «ياندەكس» تاكسي قوسىمشالارىنىڭ باسشىلىعى اراسىندا ءوزارا مەموراندۋم جاسالعان بولاتىن.

وسى مەموراندۋمعا سايكەس 2025 -جىلدىڭ 1-قاڭتارىنان باستاپ «Indriver» تاكسي قوسىمشاسىنا باسقا مەملەكەتتە تىركەلگەن، باسقارۋ قۇرىلعىلارى وڭ جاقتا ورنالاسقان جانە ق ر زاڭناماسىن ءجيى بۇزاتىن اۆتوكولىكتەرگە تىركەلۋگە شەكتەۋ قويىلادى.

«مۇنىڭ سەبەبى سوڭعى كەزدەرى جۇرگىزۋشىنىڭ تىنىعۋ رەجيمىنىڭ بۇزىلۋى، رەيس الدىندا مەديتسينالىق جانە مەحانيكالىق تەكسەرۋدەن وتپەۋى، مىندەتتى ساقتاندىرۋسىز جولاۋشىلار تاسىمالداۋى سالدارىنان جول اپاتى كوبەيدى. ولاردىڭ ەلەۋلى بولىگى «Indriver»، «ياندەكس» تاكسي جۇرگىزۋشىلەرىمەن ورىن الۋدا. ەلىمىزدە «Indriver»، «ياندەكس» تاكسي باعدارلاماسىن موبيلدى قوسىمشاعا تىركەۋ ارقىلى قانشاما كولىك جولاۋشىلار تاسىمالداۋدا. الايدا ول ازاماتتار ق ر ۇلتتىق ستاندارتىنداعى تاكسي تاسىمالداۋشىلارىنا جانە قىزمەت كورسەتەتىن تاكسي اۆتوكولىكتەرىنە قويىلاتىن تالاپتارىنا سايكەس كەلمەيتىن اۆتوكولىكتەرمەن جولاۋشىلار تاسىمالداۋدا» دەيدى بۇل جونىندە جامبىل وبلىسى اكىمىنىڭ ورىنباسارى قاناتبەك مادىبەك.

ناقتىراق ايتساق، جەرگىلىكتى اتقارۋشى ورگانعا تاكسي قىزمەتىن باستاعانى جونىندە حابارلاما جولداماي، باسقارۋ قۇرىلعىلارى وڭ جاقتا ورنالاسقان، پايدالانۋ مەرزىمى 15 جىلدان اساتىن جانە اۆتوكولىك ءجۇرىسى 500 مىڭ شاقىرىمنان اساتىن، ءتىپتى باسقا مەملەكەتتە تىركەلگەن اۆتوكولىكتەرمەن جولاۋشىلار تاسىمالدانۋدا.

وسى رەتتە جامبىل وبلىسىندا 14 رەيدتىك جۇمىستارى ۇيىمداستىرىلىپ، 128 اۆتوكولىك تەكسەرىلدى. ناتيجەسىندە 385 حاتتاما تولتىرىلىپ، 3,5 ميلليون تەڭگە ايىپپۇل سالىندى.

ايتا كەتسەك، ءبىز بۇعان دەيىن ەلىمىزدە جول اپاتى 90 پايىزعا كوبەيگەنىن جازعان بولاتىنبىز.

اۆتور
ورالحان ءداۋىت