جاڭا جىل قارساڭىندا ازىق-تۇلىك باعاسى وسە مە؟ مينيستر جاۋاپ بەردى

جاڭا جىل قارساڭىندا قازاقستاندا كەيبىر ازىق-تۇلىك تاۋارلارى قىمباتتاۋى ىقتيمال. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ ايتتى.

«بىرىنشىدەن، ەلىمىزدە ازىق-تۇلىك باعاسىنا مونيتورينگتى ۇلتتىق ستاتيستيكا بيۋروسى جۇرگىزەدى. ءبىز بۇل دەرەكتەردى ۇنەمى پايدالانامىز. مەن سىزگە جاڭا دەرەكتەردى ايتايىن. سوڭعى اپتادا الەۋمەتتىك ماڭىزى بار ازىق-تۇلىك تاۋارلارىنىڭ باعاسى وزگەرمەدى. ول 19 پوزيتسيادان تۇرادى، وندا وزگەرىس جوق»، - دەدى مينيستر.

سونداي- اق ارمان شاققاليەۆ الداعى ۋاقىتتا ازىق-تۇلىك باعاسى كوتەرىلۋى مۇمكىن ەكەنىن جەتكىزدى.

«ەكىنشىدەن، جاڭا جىلدا ۇستەلگە قويىلاتىن (ازىق-تۇلىك تاۋارلارىنىڭ) باعاسىندا وزگەرىس بولۋى مۇمكىن. ءبىز 37 پوزيتسيانى الدىق. وندا وزگەرىستەر بار. مىسالى، جۇمساق قاپتاماداعى ءسۇت، ماندارين جانە شامپان.

ەلىمىزدە جىلدىق ينفلياتسيا - شامامەن 10,3 پايىز دەڭگەيىندە. مۇنى ەسكەرسەك، جاڭا جىلدا ۇستەلگە قويىلاتىن (ازىق-تۇلىك تاۋارىنىڭ) سەبەتىندەگى (باعا ءوسىمى) - شامامەن 10-10,7 پايىز. ءيا، وزگەرىس بار. ءبىز ونى جاڭا جىلدا ۇنەمى بايقايمىز. سوندىقتان مەرەكە قارساڭىندا (ازىق-تۇلىك - اۆتور) قىمباتتايدى. ءبىراق (باعا ءوسىمى) يندەكس شەگىندە بولادى»، - دەدى ول.

ءسوز سوڭىندا مينيستر الەۋمەتتىك ماڭىزى بار ازىق-تۇلىك قىمباتتاماۋى ءۇشىن قانداي جۇمىستار ىستەلىپ جاتقانىن ايتتى.

«جىل باسىنان بەرى ولاردىڭ باعاسى 3,4 پايىزعا وزگەردى. جۇمىرتقانىڭ باعاسى ۇنەمى وزگەرەتىنىن ايتامىز. ءبىز ەڭ ءىرى وندىرۋشىلەر جانە ساۋدا جەلىلەرىمەن ساۋدا ۇستەمەسىن ساقتاۋ ءۇشىن مەموراندۋمعا قول قويدىق. وسىلايشا، مۇنىڭ جۇمىس ىستەيتىنىن كوردىك. بۇگىن ءبىز ىشكى قاجەتتىلىكتى تولىق قامتاماسىز ەتىپ وتىرمىز...»، - دەدى ارمان شاققاليەۆ.

Massaget.kz