جاڭا جىل: الماتىنىڭ ارباتى ەرەكشە بەزەندىرىلدى
الماتى. KAZINFORM - الماتىنىڭ ارباتى جاڭا جىلدىق مەرەكەگە وراي لوندوننىڭ ايگىلى كارنابي كوشەسىنەن شابىت العان جارقىن ارت-نىسانعا اينالدى.
تۇرعىنداردىڭ سۇيىكتى جاياۋ جۇرگىنشىلەر كوشەسى مىڭداعان گيرلياند شامى مەن جارىق قوندىرعىلارمەن كومكەرىلىپ، جايلى ءارى سيقىرلى اتموسفەرانى قالىپتاستىردى.
«جاڭا جىلىڭىزبەن»، «باقىتتى بول»، «جۇلدىزىڭ جانسىن» دەگەن جارقىراعان جازۋلار تىلەكتەر ەرەكشە نازار اۋدارتادى. بۇل جۇرەكجاردى لەبىزدەر مۇندا كەلگەن ءاربىر ادامعا ارنالعانداي، مەيىرىم مەن كوتەرىڭكى كوڭىل كۇي سىيلايدى. قالا تۇرعىندارى مەن قوناقتارى ەرەكشە بەزەندىرۋدى جوعارى باعالادى.
- بالالارمەن بىرگە ءبىز دە وتە قۋانىشتىمىز. قانشاما ادەمى سۋرەت ءتۇسىرىپ ۇلگەردىك. ءوزىم دە بالا سياقتى وسى اشەكەيلەرگە قۋانامىن. شىنىمدى ايتسام، قالا ءارقايسىمىزدى قۇشاق جايا قارسى الۋعا دايىندالىپ جاتقانداي كورىنەدى. مۇندا كەرەمەت ادەمى ءارى ءبارى جارقىراپ تۇر، - دەدى الماتىلىق الۋا جومارت.
جىبەك جولى كوشەسىندە دە جارىقتاندىرىلعان اققالا مۇسىندەرى، جارقىراعان جۇلدىزدار جانە ساۋلەلى بۇعىلار ورناتىلعان. ولار بالالار مەن ەرەسەكتەردىڭ جۇزدەرىنە قۋانىش سىيلايدى. مەرەكەلىك بەزەندىرۋدى ساندىك ايۋلار مەن باسقا دا ەلەمەنتتەر تولىقتىرىپ، ارباتتاعى سەرۋەندى ەرەكشە جايلى ەتەدى. ەڭ اسەرلى قوندىرعىنىڭ ءبىرى - «2025» ساندارى بار الىپ جارقىراعان شار.
ارباتتىڭ ورتالىق شىرشاسى ءتۇرلى ءتۇستى شارلارمەن، جارقىراعان شامدارمەن جانە جۇلدىزدارمەن بەزەندىرىلگەن. ونىڭ ەتەگىندە ورنالاسقان الىپ سىيلىق قوراپتارى كەڭىستىككە ەرتەگىدەي ەرەكشە اتموسفەرا بەرەدى.
الماتىدا ءداستۇر بويىنشا جاڭا جىلدىق شىرشا شامى تاۋەلسىزدىك مەرەكەسىنەن كەيىن جاعىلدى. باس شىرشا رەسپۋبليكا سارايى الدىنداعى اباي الاڭىندا ورناتىلدى.
وسىعان دەيىن الماتىدا جاڭا جىل ءتۇنى مەرەكەلىك وتشاشۋ بولاتىنى تۋرالى ايتقان بولاتىنبىز.
بۇدان بولەك، الماتىنى جاڭاجىلدىق بەزەندىرۋگە 800 ميلليون تەڭگە جۇمسالاتىنى تۋرالى جازعان ەدىك.
الما مۇقانوۆا
اۆتور