جاڭا GPT-5 - كەلەشەكتىڭ تەحنولوگياسى ما الدە ادامزاتقا قاۋىپ پە؟
استانا. KAZINFORM - تەحنولوگيا الەمىندە بيىلعى جىلدىڭ ەڭ ايتۋلى وقيعاسى GPT-5 شىعارىلىمى بولۋى مۇمكىن. ونىڭ الدىڭعى نۇسقالارىن پايدالانعاندار بۇل جاڭالىقتى اسىعا كۇتۋدە، دەگەنمەن الەمدەگى ەڭ جەتىلدىرىلگەن جاساندى ينتەللەكت جۇيەلەرىنىڭ ءبىرىنىڭ پايدا بولۋى ساراپشىلار اراسىندا ەكىۇشتى قابىلدانۋدا. GPT-5 دەگەن نە، جاڭا نەيروجەلىنىڭ الەۋەتى مەن مۇمكىندىكتەرى قانداي، ونى ەنگىزۋ نەگە اكەپ سوعاتىنى - Kazinform ءتىلشىسىنىڭ تالدامالىق شولۋىندا.
GPT جاساندى ينتەللەكتى دەگەنىمىز نە
GPT - Generative Pre-trained Transformer، امەريكالىق OpenAI كومپانياسى شىعارعان تابيعي ءتىل وڭدەۋ الگوريتمى. نەيروندىق جەلىنىڭ باستى ەرەكشەلىگى - اقپاراتتى ەستە ساقتاۋ مەن تالداۋ قابىلەتىندە جانە سونىڭ نەگىزىندە جۇيەلى جانە لوگيكالىق ءماتىن قۇرۋىندا.
قۋاتتى تىلدىك مودەلدە جەكە سوزدەر اراسىنداعى بايلانىستاردى تابۋعا جانە سوزدەر مەن سويلەمدەردىڭ ەڭ لوگيكالىق رەتتىلىگىن ەسەپتەۋگە مۇمكىندىك بەرەتىن «ترانسفورماتور» ارحيتەكتۋراسى بار.
جاساندى ينتەللەكت قالاي دامىپ كەلەدى
GPT جانە باسقا دا تىلدىك مودەلدەردىڭ پايدا بولۋى زاماناۋي ادام ومىرىنە جاساندى ينتەللەكت ەنگىزۋ جولىنداعى ماڭىزدى كەزەڭ بولدى. گەنەراتيۆتى نەيروندىق جەلىلەردىڭ مۇمكىندىكتەرى مۇنىمەن توقتاپ قالماس انىق. تاياۋ جىلدارى AI تەحنولوگيالارى ساۋدا، ماركەتينگ، تۇتىنۋشىلارعا قىزمەت كورسەتۋ جانە باسقا دا سالالاردا سۇرانىسقا يە كوپتەگەن ماماندىقتاردى الماستىرىپ، ەڭبەك نارىعىنىڭ وزگەرۋىنە ۇلكەن اسەر ەتۋى مۇمكىن.
2018 -جىلى ازىرلەۋشىلەر GPT-1 اتتى وسى نەيروندىق جەلىنىڭ العاشقى تولىققاندى نۇسقاسىن شىعاردى. العاشقى نۇسقاسى ءساتتى شىققان سوڭ OpenAI ماماندارى GMT-2, GMT-3 جانە ChatGPT ازىرلەپ شىعاردى. ChatGPT - ديالوگ رەجيمىندە جۇمىس ىستەيتىن جاساندى ينتەللەكت چات- بوتى. ول GPT-3.5 تىلدىك مودەلىنىڭ جەتىلدىرىلگەن نۇسقاسىنا نەگىزدەلگەن.
ال GPT-4-تىڭ سوڭعى نۇسقاسى وتكەن جىلدىڭ ناۋرىز ايىندا تانىستىرىلدى. نەيروندىق جەلىنىڭ 4-نۇسقاسىنىڭ ماڭىزدى ارتىقشىلىعى - ونىڭ ءارتۇرلى پاندەر بويىنشا ەمتيحاندار مەن سىناقتاردان ءوتۋ قابىلەتىن جاقسارتۋ بولدى. ول ءبىرقاتار ءپان بويىنشا تاماشا ناتيجەلەر كورسەتتى، ورتاشا ادامنىڭ جەتىستىكتەرىن ايتپاعاندا، ءوزىنىڭ الدىڭعى GPT-3.5 كورسەتكىشتەرىنەن ايتارلىقتاي اسىپ ءتۇستى.
جاڭا بۋىن مودەلى GPT-5 تۋرالى نە بەلگىلى
GPT-4-تەن كەيىنگى كەلەسى OpenAI مودەلى - GPT-5 جاساندى ينتەلەكتىنى جاڭا ءبىر دەڭگەيگە شىعارۋى ابدەن مۇمكىن. جاڭا بۋىن مودەلى الدىڭعى قۋاتتان الدەقايدا جوعارى بولادى دەپ كۇتىلۋدە. بۇل مودەلدىڭ نەگىزگى ماقساتى - ادامزاتتى AGI- گە جاقىنداتۋ، بۇل ادامنىڭ ميى سياقتى ءماتىن جازۋدان باستاپ اقىلدى ءۇيدى باسقارۋعا دەيىنگى كوپتەگەن تاپسىرمالاردى ورىنداي الاتىن اقىلدى ماشينا.
GPT-5 ودان دا جوعارى ساپالى جانە كرەاتيۆتى ماتىندەر شىعارۋعا، تىلدەردى اۋدارۋعا، ءارتۇرلى شىعارماشىلىق ماتىندەر جازۋعا، ءارتۇرلى تاقىرىپتار بويىنشا سۇراقتارعا جاۋاپ بەرۋگە، سونداي- اق تابيعي ءتىلدى وڭدەۋگە قاتىستى كوپتەگەن باسقا تاپسىرمالاردى ورىنداۋعا قابىلەتتى بولادى.
«جەتىلدىرۋ تراەكتورياسىنا قاراساق، GPT-3 جۇيەلەرى شامامەن بالالاردىڭ ينتەللەكت دەڭگەيىندە بولدى. GPT-4 جۇيەلەرى - ورتا مەكتەپ وقۋشىسىنىڭ ينتەللەكتىنە كوبىرەك ۇقسايدى. الداعى ەكى جىلدا ءبىز ناقتى تاپسىرمالاردى ورىنداۋ ءۇشىن PhD ينتەللەكتىنە ۇمتىلاتىن بولامىز. بارلىعى وتە تەز وزگەرىپ، جاقسارىپ كەلەدى»، - دەيدى امەريكالىق OpenAI عىلىمي-زەرتتەۋ ۇيىمىنىڭ تەحنيكالىق ديرەكتورى جانە ChatGPT نەيروجەلىسىن قۇرۋشىلاردىڭ ءبىرى ميرا مۋراتي.
GPT-5 قاشان جارىققا شىعادى
GTP-5-تىڭ ناقتى شىعۋ كۇنى ءالى بەلگىسىز، دەگەنمەن OpenAI بۇل مودەلدى ۇيرەتۋدى باستادى. ادەتتە بۇل پروتسەسس بىرنەشە ايعا سوزىلادى، سونىڭ ىشىندە تەستىلەۋ مەن پىسىقتاۋ جۇمىستارى بار، دەپ حابارلادى كومپانيا.
كوكتەمدە GTP-5 وسى جىلى ىسكە قوسىلادى دەگەن قاۋەسەت تارادى. 2024 -جىلدىڭ ناۋرىزىندا Business Insider وسى جازدا OpenAI رەليز جاساۋى مۇمكىن دەپ جازدى.
ءساۋىر ايىندا Runway نەگىزىن قالاۋشى جانە باس ديرەكتورى سيكي چەن X پلاتفورماسىندا GPT-5 بيىلعى جەلتوقساندا شىعۋى مۇمكىن جانە كۇشتى AI دەڭگەيىنە جەتۋى مۇمكىن دەگەن ينسايدەرلىك اقپارات بەردى.
كەيىنىرەك OpenAI تەحنيكالىق ديرەكتورى ميرا مۋراتتي جاڭا مودەلدى 2025 -جىلدىڭ اياعى، ءتىپتى 2026 -جىلدىڭ باسىنا دەيىن كۇتۋ كەرەك ەكەنىن بولجادى.
GPT-5 شىققان سوڭ نە بولادى
تابىستى ىسكە اسقان جاعدايدا گەنەراتيۆتى ج ي ادامنان اسا ەرەكشەلەنبەۋى مۇمكىن. ياعني، ونىڭ جوعارى دەڭگەيى ادامعا قول جەتىمدى كەز كەلگەن تاپسىرمانى نەمەسە تۇجىرىمدامانى ۇيرەنۋگە، تۇسىنۋگە قابىلەتتى، ول ماشينا بولسا دا، بەلگىلى ءبىر مىندەتتەرمەن نەمەسە فۋنكتسيالارمەن شەكتەلمەيدى.
GPT-5 جارىققا شىققان سوڭ ونى yesAibot قىزمەتىنە قوسۋ حابارلاندى، مۇندا Stable Diffusion, SDXL، سونداي-اق ChatGPT، سونىڭ ىشىندە جاقىندا شىعارىلعان GPT-4 Omni قولجەتىمدى.
autogpt.net تالداۋشىلارى ChatGPT-3 بولسا 2020 -جىلدىڭ ماۋسىمىندا، سودان كەيىن ChatGPT-3.5 - 2022 -جىلدىڭ قاراشاسىندا شىعارىلعانىن اتاپ ءوتتى. ەگەر OpenAI وسىنداي قارقىنمەن جۇرسە، ChatGPT-4 جەلىسى 2023 -جىلدىڭ باسىندا ىسكە قوسىلعانىن ەسكەرە وتىرىپ، ChatGPT-5 بولسا 2024-جىلدىڭ اياعىندا نەمەسە 2025 -جىلدىڭ باسىندا شىعارىلادى دەپ بولجاۋعا بولادى.
Techopedia مالىمەتتەرى بويىنشا، OpenAI ەكى نۇسقانى ۇسىنادى: تەگىن نۇسقا جانە كەڭەيتىلگەن مۇمكىندىكتەرى بار جازىلىم. فلاگماندىق مودەلدى پايدالانۋ ايىنا شامامەن 20 دوللار تۇرادى.
جاڭا نەيروندىق جەلى نۇسقاسى نە ىستەي الادى
ChatGPT-5 ءبىزدىڭ جاساندى ينتەللەكتپەن ءوزارا ارەكەتتەسۋىمىزدى كەلەسى دەڭگەيگە كوتەرەتىن بىرنەشە ريەۆوليۋتسيالىق مۇمكىندىكتەر مەن جاقسارتۋلارعا يە بولادى.
OpenAI باسشىسى سەم التمان بۇعان دەيىن: «ەڭ ماڭىزدى جاقسارتۋلار تالداۋ قابىلەتىنە بايلانىستى بولۋى مۇمكىن» دەپ ايتقان ەدى. ول ج ي مودەلدەرىنىڭ اقپاراتتى ءتۇسىندىرۋ، قورىتىندى جاساۋ جانە قولدا بار دەرەكتەر مەن لوگيكالىق تۇجىرىمداردى قولدانىپ، ماسەلەلەردى شەشۋ قابىلەتىن ايتىپ وتىرعانىن ءتۇسىندىردى.
جاڭا مودەلدە ءبىزدى قانداي مۇمكىندىكتەر كۇتىپ تۇرعانىن كورەيىك. ەڭ الدىمەن GPT-5 ادامنىڭ جازۋىنان اجىراتۋ مۇمكىن ەمەس ماتىندەر جازا الادى.
ەكىنشىدەن، بۇل نۇسقا ادام ءتىلىنىڭ ەرەكشەلىكتەرىن، سونىڭ ىشىندە ساركازم، يرونيا جانە باسقا دا تۇستارىن جاقسى تۇسىنەدى.
ۇشىنشىدەن، GPT-5 عىلىمي ماقالالار نەمەسە باعدارلامالىق كود جازۋ سياقتى پاندىك سالانى تەرەڭ ءتۇسىنۋدى قاجەت ەتەتىن كۇردەلى سۇراقتاردى شەشە الادى.
وعان قوسا، مودەل جاڭا قوسىمشالاردى ازىرلەۋ پروتسەسىن جىلدامداتۋعا مۇمكىندىك بەرەتىن از دەرەكتەر كولەمىن وقي الادى.
ءبىر قىزىعى، GPT-5 باسقا دا جاساندى ينتەللەكت جۇيەلەرىمەن بىرىگە الادى، بۇل اناعۇرلىم كۇردەلى جانە اقىلدى قوسىمشالاردى جاساۋعا مۇمكىندىك بەرەدى.
قانداي سىن-قاتەرلەر ءتونۋى مۇمكىن
GPT-5-تى دامىتۋ مەن AGI جەتىستىكتەرى كوپتەگەن ادامدار ويلاعاننان دا جاقىن بولۋى مۇمكىن. بۇل چاتبوت ءتارىزدى جاساندى ينتەللەكت سالدارىن باقىلاۋ مۇمكىن بولمايتىنداي ۇلكەن كۇشكە يە بولۋى مۇمكىن دەگەن ۇلكەن الاڭداۋشىلىق تۋدىرادى.
مىڭنان استام تەحنولوگيالىق كوشباسشىلار مەن زەرتتەۋشىلەر، سونىڭ ىشىندە يلون ماسك جاساندى ينتەللەكتتى ناسيحاتتاۋ جالعان اقپارات پەن ناسيحاتتىڭ تارالۋىنا ىقپال ەتۋى مۇمكىن ەكەندىگى تۋرالى اشىق حاتقا قول قويدى. ولار بارلىق زەرتحانالاردى GPT-4-تەن كۇشتى ج ي جۇيەلەرىن وقىتۋدى التى ايعا دەرەۋ توقتاتا تۇرۋعا شاقىرۋدا.
وسىنداي اڭگىمەلەر اياسىندا OpenAI ءوز ونىمدەرىنىڭ قاۋىپسىزدىگى ماسەلەسىمەن اينالىستى. New York Times جازعانداي، ChatGPT- ءتى قۇرعان OpenAI كومپانياسىنىڭ نەگىزىن قالاۋشى دجون شۋلمان كەلەشەكتە دە بۇل ماسەلەمەن اينالىساتىن بولادى.
Aل OpenAI قاۋىپسىزدىك جانە قورعانىس كوميتەتى شۋلماننىڭ زەرتتەۋلەرىن باقىلايدى جانە كومپانيانىڭ تەحنولوگيالىق سىن- قاتەردى قالاي شەشەتىنى تۋرالى نۇسقاۋلار بەرىپ وتىرادى.
حالىقارالىق ۆاليۋتا قورىنىڭ مالىمەتىنشە، الەمدەگى جۇمىسپەن قامتىلعان حالىقتىڭ شامامەن @ ى ج ي-مەن بايلانىستى سىن-قاتەرگە ۇشىرايدى. ج ي-دى ەرەكشەلەندىرەتىن اسپەكتىلەردىڭ ءبىرى - ونىڭ جوعارى بىلىكتى جۇمىس ورىندارىنا اسەر ەتۋ قابىلەتى. ناتيجەسىندە ەكونوميكاسى دامىعان ەلدەر نەيروندىق جەلىگە بايلانىستى ۇلكەن تاۋەكەلدەرگە تاپ بولادى.
«5- بۋىنداعى جاساندى ينتەللەكتتىڭ دامۋى، ياعني GPT-5 دەزينفورماتسيا مەن جالعان جاڭالىقتاردىڭ تارالۋىنا اكەلۋى مۇمكىن. تەحنولوگيانى تەرىس پايدالانۋ قوعامدىق پىكىردى باسقارۋعا مۇمكىندىك بەرەدى. سونداي- اق، نەيروجەلى ءوزىنىڭ تەحنيكالىق سيپاتتامالارىنا بايلانىستى ءبىزدىڭ تسيفرلىق دەرەكتەرىمىزدى قۇپيا جانە قاۋىپسىز ساقتاۋ ماسەلەسىندە كوپتەگەن قيىندىقتار تۋعىزاتىنىن اتاپ وتكەن ءجون. وعان قوسا، GPT-5 پروگرەسسى ارقىلى جۇمىس ورىندارىن اۆتوماتتاندىرۋ جۇمىسسىزدىققا جانە الەۋمەتتىك- ەكونوميكالىق جاعدايدىڭ ناشارلاۋىنا اكەلۋى مۇمكىن، - دەيدى Integrated Services كومپانياسىنىڭ IT ساۋلەتشىسى راميز شيرينوۆ.
ساراپشىنىڭ ايتۋىنشا، GPT-5 ەنگىزۋدىڭ وڭ ناتيجەسى رەتىندە عىلىمي- تەحنيكالىق پروگرەستى جەدەلدەتۋدى، جاساندى ينتەللەكت سالاسىندا جاڭا جۇمىس ورىندارىن قۇرۋدى، سونداي- اق كۇندەلىكتى مىندەتتەردى اۆتوماتتاندىرۋدىڭ ارقاسىندا ادامداردىڭ ءومىر ءسۇرۋ ساپاسىن جاقسارتۋدى اتاپ وتكەن ءجون.
«GPT-5-كە قول جەتكىزۋ مۇمكىندىگى الاڭداۋشىلىق تۋعىزسا دا، ج ي كليماتتىڭ وزگەرۋىمەن كۇرەسۋ، جاڭا ءدارى-دارمەكتەر جاساۋ جانە تەحنولوگيالىق يننوۆاتسيالار سياقتى كوپتەگەن كۇردەلى ماسەلەلەردى شەشۋگە پايدالى بولۋى مۇمكىن دەگەن پىكىر بار»، - دەپ تۇيىندەدى ازەربايجان مامانى.
بريكس بايكال ينستيتۋتىنىڭ پروفەسسورى الەكساندر افاناسيەۆتىڭ ايتۋىنشا، ادامزاتقا شابۋىل جاساي الاتىن كۇشتى ج ي تۋرالى ايتۋعا ءالى ەرتە.
«قازىر ادام مەن ج ي-دە مۇددەلەر قاقتىعىسى جوق، ويتكەنى بولاشاقتا جاساندى ينتەللەكتتىڭ دامۋى وزىنە ىڭعايلى بولاتىن عارىشقا باعىتتالادى. وعان قوسا، كۇشتى جاساندى ينتەللەكت ءوز دامۋىنداعى وقىس وقيعالار ءۇشىن ادامزاتتى ساقتاپ قالۋعا مۇددەلى»، - دەيدى عالىم.
بيلىك بۇل تەحنولوگيالاردى ەنگىزۋگە قالاي قارايدى
كوپتەگەن ەلدەر جاساندى ينتەللەكتتىڭ دامۋىنا ۇلكەن قىزىعۋشىلىق تانىتىپ وتىر جانە ونى ەكونوميكالىق ءوسۋ ءۇشىن ۇلكەن الەۋەت دەپ سانايدى. بۇل رەتتە ۇكىمەتتەر وسى تەحنولوگيامەن بايلانىستى سىن-قاتەر بارىن دا جاقسى تۇسىنەدى جانە ءتيىستى رەتتەۋ شارالارىن ازىرلەپ جاتىر.
«دامىعان ەلدەردىڭ كوپشىلىگى جاساندى ينتەللەكتتى دامىتۋ ستراتەگيالارىن ازىرلەۋدە جانە ونى قولدانۋدى رەتتەيتىن زاڭدار قابىلداپ جاتىر. ەتيكا، قاۋىپسىزدىك جانە دەرەكتەردى قورعاۋ ماسەلەلەرىنە ەرەكشە نازار اۋدارىلۋدا. ازەربايجانعا كەلسەك، مۇندا اقپاراتتىق تەحنولوگيالار مەن جاساندى ينتەللەكت سالاسى قارقىندى دامىپ كەلەدى. ۇكىمەت وسى سالاداعى باستامالاردى قولداپ، يننوۆاتسيالاردى دامىتۋ ءۇشىن قولايلى جاعدايلار جاساۋدا. الايدا، ازىرگە نەيروندىق جەلىلەردى قولدانۋدى ارنايى رەتتەيتىن زاڭداردىڭ قابىلدانۋى تۋرالى ناقتى اقپارات جوق»، - دەيدى ر. شيرينوۆ.
ەۋروپارلامەنت ناۋرىز ايىندا جاساندى ينتەللەكت تەحنولوگيالارىن قولداناتىن جۇيەلەر تۋرالى زاڭدى - The EU Artificial Intelligence Act قۇجاتىن قابىلدادى. قۇجات قارقىندى دامىپ كەلە جاتقان سالانى رەتتەيتىن الەمدەگى العاشقى نورماتيۆتىك اكت بولدى.
باستاپقىدا زاڭ جوباسى ەكى سەبەپكە بايلانىستى ويلاستىرىلدى: ە و-عا مۇشە ەلدەردە رەتتەۋدى سينحرونداۋ جانە جاساندى ينتەللەكت ۇعىمىنىڭ نە ەكەنىن ناقتى انىقتاۋ. ءبىراق كەيىنىرەك تەحنولوگيانىڭ دامۋىنا بايلانىستى زاڭنىڭ قولدانىلۋ اياسى ەداۋىر كەڭەيدى.
دۇنيە ءجۇزى بويىنشا قاداعالاۋ ورگاندارى جاساندى ينتەللەكتتى رەتتەۋگە الۋان ءتۇرلى جاۋاپ قاتۋدا. Reuters اگەنتتىگىنىڭ حابارلاۋىنشا، قىتايدا كيبەركەڭىستىك رەتتەۋشىسى كومپانيالاردان قىزمەتتەر كوپشىلىككە قولجەتىمدى بولماي تۇرىپ، بيلىك ورگاندارىنا وسى تەحنولوگيالاردىڭ قاۋىپسىزدىگى تۋرالى اناليتيكالىق قىسقاشا مالىمەت بەرۋدى تالاپ ەتكەن. ال ۇلىبريتانيا ۇكىمەتى ج ي رەتتەيتىن جاڭا ورگان قۇرمايتىنىن مالىمدەدى. اۋستراليادا ۇكىمەت ج ي الەۋەتىنىڭ وسۋىنە قالاي جاۋاپ بەرۋ كەرەكتىگى تۋرالى كەڭەس الۋ ءۇشىن ەلدىڭ باس عىلىمي كونسۋلتاتيۆتىك ورگانىنىڭ ساراپشىلارىنا جۇگىنگەن. ال ا ق ش-تا تۇرعىنداردى ج ي ازىرلەۋشىلەرى ءۇشىن ىقتيمال ەسەپ بەرۋ شارالارى تۋرالى سىن-ەسكەرتپەلەر ايتۋعا شاقىرعان.
بارلىق كەدەرگىلەرگە قاراماستان، OpenAI جاساندى ينتەللەكت سالاسىنداعى كوشباسشى بولىپ قالۋدا. الايدا، كومپانيا وسى سوڭعى قيىندىقتاردى قالاي شەشكەنى جاساندى ينتەللەكتتىڭ بولاشاعىن جانە ونىڭ قوعامعا اسەرىن ايقىندايدى.
جاساندى ينتەللەكت جانە ءبىزدىڭ بولاشاعىمىز
GPT-5 - جاڭا مودەل عانا ەمەس، نەيروندىق جەلى الەمىندەگى ناعىز ريەۆوليۋتسيا. ساراپشىلاردىڭ پىكىرىنشە، GPT-5 ءبىر كەزدەرى عىلىمي فانتاستيكا دەپ سانالعان جاڭا مۇمكىندىكتەردى ۇسىنىپ، ءتۇرلى سالالاردا توڭكەرىس جاساي الادى. ول ادامزاتتى جالپى جاساندى ينتەللەكت قۇرۋعا جاقىنداتادى جانەرتۇرلى سالالاردا ج ي قولدانۋ ءۇشىن جاڭا كوكجيەكتەر اشادى.
GPT-5 لوگيكالىق ويلاۋ مەن ماسەلەلەردى شەشۋدى ايتارلىقتاي جاقسارتادى دەپ كۇتىلۋدە. بۇرىنعىدان ايىرماشىلىعى - بۇرىن كەزدەسپەگەن جۇمباقتار مەن سۇراقتاردى تالداي الادى، اقىلعا قونىمدى پايىمدار، ناقتى بولجامدار مەن جاۋاپتار جاساي الادى.
«2025 -جىلعا قاراي جاساندى ينتەللەكت بارلىق دەرەكتەردىڭ قۇرايدى دەپ بولجانۋدا. الداعى 10 جىلدا ول بيزنەس پەن قوعامعا ەلەۋلى اسەر ەتىپ، الەمدىك ج ءى ءو-نى %7 عا كوتەرەدى»، - دەيدى عالىم الەكساندر افاناسيەۆ.
عالىمنىڭ پايىمداۋىنشا، 2045 -جىلى جەلىلەردە بۇكىل ادامزات سياقتى 7 ميللياردتان استام نەيروندار بولادى. GPT-1-دەن GPT5-كە دەيىنگى جاساندى ينتەللەكت ەۆوليۋتسياسى وسى تەحنولوگيانىڭ دامۋ قارقىنىن ايقىن كورسەتەدى.
اۆتور
ەربول جانات