- قازىر ومىرىمىزگە جاڭا ەكونوميكالىق جانە سيفرلىق قۇرالدار ەنىپ جاتىر. سوندىقتان ازاماتتاردىڭ قۇقىقتارىن قورعايتىن تەتىكتەر جاڭارۋى قاجەت. بۇل - پرەزيدەنت جولداۋىندا كوتەرىلگەن ماڭىزدى ماسەلەنىڭ ءبىرى، - دەدى سپيكەر Jibek Joly تەلەارناسىنداعى «بۇگىن Live» باعدارلاماسىندا.
ءۇنزيلا شاپاق ازاماتتىق كودەكستىڭ 1990 -جىلداردان بەرى قولدانىلىپ كەلە جاتقانىن اتاپ ءوتتى. وسىعان بايلانىستى جاڭا زاڭناما قازىرگى جاعدايدى ەسكەرىپ، قۇقىقتىق قاتىناستارعا قاتىسۋشىلاردىڭ مۇددەلەرى اراسىنداعى تەپە-تەڭدىكتى قامتاماسىز ەتۋى ءتيىس.
- ازاماتتىق كودەكس جالپى جانە ەرەكشە بولىمدەردەن تۇرادى. مەنىڭ ويىمشا، ەكى ءبولىم دە جاڭادان ازىرلەنەدى. كودەكستى كەلەر جىلدىڭ سوڭىنا دەيىن قابىلداۋ جوسپارلانىپ وتىر، - دەدى ءۇنزيلا شاپاق.
سونىمەن قاتار دەپۋتات مەملەكەتتىك باسقارۋ جۇيەسىنىڭ تيىمدىلىگىنە توقتالىپ، «حالىق ۇنىنە قۇلاق اساتىن مەملەكەت» تۇجىرىمداماسىنىڭ ءىس جۇزىندە جۇزەگە اسۋىنا باعا بەرۋ قاجەتتىگىن ايتتى.
- ءبىز وسى ۋاقىتقا دەيىن «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرىپ كەلەمىز. ءبىراق حالىقتىڭ ءۇنى ەسكەرىلىپ ءجۇر مە؟ ازاماتتار كوتەرگەن ماسەلەلەر مەملەكەتتىك ورگانداردىڭ جۇمىسىنان كورىنىس تاۋىپ جاتىر ما؟ وسى سۇراقتارعا جاۋاپ بەرۋ كەرەك. سەبەبى رەفورمالاردىڭ ناتيجەسى مەملەكەتتىك ورگان جۇمىسىنىڭ تيىمدىلىگىمەن جانە ازاماتتاردىڭ قاجەتتىلىكتەرىنىڭ قانشالىقتى ەسكەرىلەتىنىمەن باعالانۋى ءتيىس، - دەدى دەپۋتات.