بۇل جونىندە MINEX Kazakhstan فورۋمىندا «گرۋپپا يگت» كومپانياسىنىڭ اتقارۋشى ديرەكتورى دميتري اگاپيتوۆ مالىمدەدى.
ونىڭ سوزىنشە، سالانى تەرەڭ مەڭگەرىپ، كاسىبي مامان بولۋ ءۇشىن قىزمەتكەرلەر 12-15 جىل جۇمىس ىستەپ، مول تاجىريبە جيناۋى كەرەك. سوندىقتان جوبالاردى ج ي- گە باسىبايلى تاپسىرۋ ورىنسىز.
- گەولوگياداعى جوبالارعا ج ي- ءدى ەنگىزۋ جانە دامىتۋ ماسەلەسىمەن 6 جىلدان بەرى اينالىسىپ كەلە جاتىرمىز. ول مامانداردى جۇمىسسىز قالدىرادى دەگەن پىكىردىڭ ماركەتينگتىك داقپىرتى باسىم، - دەدى اگاپيتوۆ.
ايتسە دە، ونىڭ سوزىنشە، الداعى 10-15 جىلدا جاعداي وزگەرۋى دە مۇمكىن.
- مىسالى، قىتايدا اۆتوكولىك قۇراستىراتىن كەي سەحتاردا 2-3 ادام جۇمىس ىستەيدى. ويتكەنى، قۇرىلعىلارعا اۆتوماتتاندىرىلعان جۇيە ەنگىزىلگەن. ال تابيعاتقا مۇنداي ەرەجە جۇرمەيدى. جەر قويناۋى ءار تۇستا ءار الۋان ءارى كۇردەلى. سوندىقتان گەولوگياعا ج ي- ءدى تولىققاندى ەنگىزۋ ازىرگە مۇمكىن ەمەس. ول تەك ءىرى كولەمدەگى اقپاراتتى جيناپ، وڭدەۋگە كومەكتەسە الادى. الايدا 10-15 جىلدان كەيىن تەحنولوگيا قالاي داميتىنىن كورە جاتارمىز، - دەدى اگاپيتوۆ.
سونىمەن بىرگە، قازىر گەولوگيادا ج ي- گە ءتيىستى نۇسقاۋلىقتار بەرىپ، جۇمىسىن تەكسەرىپ، قاجەت بولسا، تۇزەتىپ وتىرۋ قاجەت.
ايتا كەتەيىك، بۇعان دەيىن اتالعان فورۋمدا مەتالداردى قايتا وڭدەۋ ماسەلەسى تالقىلانعانىن جازعانبىز.