ج ي كەسىرىنەن شىعارماشىلىق ماماندىقتاردىڭ بولاشاعىنا ۇلكەن قاۋىپ ءتوندى

استانا. قازاقپارات - كەيىنگى جىلدارى الەم ەلدەرىندە جاساندى ينتەللەكتىگە قارسى شەرۋلەر مەن نارازىلىق اكسيالارى جيىلەپ بارادى، دەپ حابارلايدى 24kz.

اسىرەسە شىعارماشىلىق سالا ماماندارى اراسىندا. «سەبەبى نەيروندىق جۇيە كەسىرىنەن جۇمىس ورىندارىنىڭ قىسقارۋى، ادام ەڭبەگىنىڭ قۇنسىزدانۋى مەن اۆتورلىق قۇقىقتىڭ ساقتالماۋى بەلەڭ الدى»، - دەيدى ماماندار.

«جاساندى ينتەللەكتىنىڭ پايدا بولۋىمەن شىعارماشىلىق ماماندىقتاردىڭ بولاشاعىنا ۇلكەن قاۋىپ ءتوندى». ونەر ادامدارى وسىلاي دەيدى. وسىعان بايلانىستى كومپوزيتورلار، مۋزىكانتتار، سۋرەتشىلەر، ءتىپتى جازۋشىلاردىڭ ءوزى دابىل قاعىپ، نارازىلىقتارىن بىلدىرۋدە.

2023 -جىلى فرانسيادا ءبىر توپ سۋرەتشى مەن ديزاينەر MidJourney سەكىلدى جۇيەلەردىڭ جۇمىسىنا قارسىلىق ءبىلدىرىپ، كوشەگە شىقتى. شەرۋشىلەر مۇنداي قوسىمشالاردى قولدانۋدى شەكتەپ، ادام شىعارماشىلىعىن قورعاۋعا ارنالعان زاڭداردى كۇشەيتۋدى تالاپ ەتتى. بۇگىندە الەم ەلدەرىندە جاساندى ينتەللەكت نەگىزىندە جاسالعان ونىمدەر بىرەگەي شىعارمالار كۇن وتكەن سايىن كوبەيىپ جاتىر. وسىعان الاڭداعان ونەر ادامدارى شىعارماشىلىق سالانىڭ ءمانى جوعالىپ بارادى دەپ دابىل قاعۋدا.

2021 -جىلى امەريكانىڭ لوس-اندجەلەس قالاسىندا مۋزىكانتتار مەن سۋرەتشىلەر بىرلەسىپ، ەل ۇكىمەتىن جاساندى ينتەللەكتىنىڭ ءان مەن بەينەلەۋ الەمىندەگى ءرولىن شەكتەۋگە شاقىردى. ولاردىڭ ايتۋىنشا، تەحنولوگيا جاقسى دامىعانىمەن، شىعارماشىلىقتى اۆتوماتتاندىرۋعا جول بەرىلمەۋى كەرەك. وعان قارسى ءتيىستى زاڭ قابىلدانۋى ءتيىس.

جاساندى ينتەللەكت كومەگىمەن جاسالعان شىعارمالاردىڭ اۆتورلىق قۇقىقتى ساقتاماۋى دا قازىر وتە وزەكتى ماسەلەلەردىڭ ءبىرى. الەم ەلدەرىندە ول ءالى تولىق رەتتەلمەگەن. نەيروندىق جۇيە كوبىنە بۇعان دەيىن جاسالعان شىعارمالاردى نەگىزگە الا وتىرىپ، جاڭا تۋىندى جاساپ شىعارادى. ياعني جاساندى ينتەللەكت تەك دايىن ۇلگىلەر مەن الگوريتمدەردى نەگىزگە الادى. «ال بۇل ءتۇپنۇسقا تۋىندىعا قولسۇعۋشىلىق»، - دەيدى ونەر يەلەرى.

وسى ولقىلىقتىڭ ورنىن تولتىرۋ ماقساتىندا ەۋرووداق ەلدەرى الەمدە ءبىرىنشى بولىپ، «جاساندى ينتەللەكت تۋرالى زاڭ» قابىلدادى. بۇل زاڭ جاساندى ينتەللەكت جۇيەلەرىنىڭ ءادىل جانە جاۋاپتى قولدانىلۋىن قاداعالايدى. ال ا ق ش-تىڭ كەي شتاتىندا ج ي- ءدى شىعارماشىلىق سالالاردا پايدالانۋعا قاتىستى شەكتەۋ ەنگىزىلدى. ءوز كەزەگىندە كورشى قىتاي ج ي ارقىلى جاسالعان كونتەنتكە بەلگى قويۋدى ەنگىزۋدى تالاپ ەتەتىن زاڭ قابىلدادى.