وسىعان بايلانىستى اۆستراليا پرەمەر-ءمينيسترى ەنتوني البانيز جاعدايدى «جول بەرۋگە بولمايتىن ارەكەت» دەپ باعالاپ، OpenAI باسشىسى سەم التمانعا قاتتى الاڭدايتىنىن جەتكىزدى.
پرەمەر-ءمينيستردىڭ نارازىلىعىن اسىرەسە OpenAI كومپانياسىنىڭ اۆستراليا بيلىگىنە بۇل جاعداي تۋرالى دەر كەزىندە حابارلاماعانى تۋدىردى. وقيعا ماۋسىم ايىندا بولعانىمەن، ۇكىمەت ونىڭ ءمان-جايىن تەك قىركۇيەكتە بىلگەن. جاساندى ينتەللەكت مەديسينالىق ساقتاندىرۋ جۇيەسىندەگى اشىق ءارى جابىق فايلدارعا قول جەتكىزگەن.
البانيزدىڭ ايتۋىنشا، جەكە دەرەكتەرگە قول سۇعىلماعان جانە ەشكىم زارداپ شەكپەگەن.
OpenAI جاساندى ينتەللەكت باعدارلاماسىن دەنساۋلىق ساقتاۋ سالاسىنا قاتىستى ستاتيستيكانى ىزدەۋگە پايدالانعان. اۆستراليا پرەمەر- ءمينيسترىنىڭ ورىنباسارى ريچارد مارلزدىڭ ايتۋىنشا، جاساندى ينتەللەكت ۇكىمەتتىڭ بىرنەشە سايتىندا كادىمگى قولدانۋشى سەكىلدى ارەكەت ەتكەن. الايدا Medicare پورتالىنان قاجەتتى اقپاراتتى اشىق دەرەككوزدەردەن تابا الماعان سوڭ، جاساندى ينتەللەكت باسقا ءتاسىلدى قولدانعان.
- جاساندى ينتەللەكت بۇعاتتاۋدى اينالىپ ءوتۋدىڭ جولىن تاپقان. ول «جوق» دەگەن جاۋاپقا توقتاعان، - دەدى البانيز.
ازىرگە جاساندى ينتەللەكتىنىڭ قانشا دەرەككە قول جەتكىزگەنى انىقتالىپ جاتىر.
ج ي- ءدىڭ ۇكىمەتتىڭ باسقا سايتتارىنا دا زاڭسىز كىرگەن-كىرمەگەنى بەلگىسىز. OpenAI ىشكى تەكسەرۋ بارىسىندا اۆستراليانىڭ بىرنەشە مەملەكەتتىك سايتىندا جاساندى ينتەللەكتىنىڭ بەلسەندىلىگىن انىقتاعان. ول بۇل رەسۋرستاردان ۇكىمەتتىك ستاتيستيكانى ىزدەگەن.
— الايدا ءبىزدىڭ مودەلدەر ءبىز رۇقسات بەرۋدى جوسپارلاماعان ارەكەتتەردى ورىنداعان، - دەدى OpenAI وكىلى.
بۇعان دەيىن Anthropic باسشىسى جاساندى ينتەللەكتىنىڭ باستى قاۋىپتەرىن اتاعان بولاتىن.