ج و و تۇلەكتەرى ديپلوم العاننان كەيىن قاي مەرزىمدە جۇمىس تابادى
استانا. KAZINFORM - جوعارى وقۋ ورنىن ءتامامداعان جاس مامانداردىڭ ءوز كاسىبى بويىنشا جۇمىسقا ورنالاسۋى كورسەتكىشىنە تالداۋ جاسالدى ما؟ بۇل سۇراققا ق ر عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى جاۋاپ بەردى.
«قازىرگى كەزدە وقۋ ورنىن ءتامامداعانداردىڭ جۇمىسقا تۇرۋى مونيتورينگى ق ر ەڭبەك جانە حالىقتى الەۋمەتتىك قورعاۋ مينيسترلىگى ەڭبەك رەسۋرستارىن دامىتۋ ورتالىعىنىڭ زەينەتاقى اۋدارىمدارى نەگىزىندە جۇزەگە اسىرىلادى. سونىمەن قاتار، «اتامەكەن» ۇ ك پ مينيسترلىكتىڭ تاپسىرىسى بويىنشا جىل سايىن جوعارى وقۋ ورىندارىنىڭ 2000 ءبىلىم بەرۋ باعدارلاماسى بويىنشا رەيتينگ جۇرگىزەدى. 2023 -جىلعى رەيتينگتە 2022 -جىلى وقۋدى اياقتاعان تۇلەكتەردىڭ جۇمىسقا ورنالاسۋ بويىنشا دەرەكتەرى تالدانعان. تالداۋ قورىتىندىسىندا ولاردىڭ 83 پايىزى جۇمىسقا ورنالاسقاندىعى انىقتالعان»، - دەلىنگەن ۆەدومستۆونىڭ Kazinform اگەنتتىگىنە بەرگەن جاۋابىندا.
سونىمەن قاتار كوميتەت ج و و تۇلەكتەرى ديپلوم العان سوڭ قاي مەرزىمدە جۇمىس تاباتىنىن ناقتىلادى.
«2023 -جىلى جاسالعان ءبىلىم بەرۋ باعدارلامالارىنىڭ رەيتينگىنىڭ قورىتىندىسى بويىنشا تۇلەكتەردىڭ ديپلوم العاننان كەيىنگى جۇمىسقا ورنالاسۋىنىڭ ورتاشا ۇزاقتىعى 2,5 ايدى قۇراعان»، - دەپ اتالىپ وتكەن ۆەدومستۆو اقپاراتىندا.
اۆتور
رۋسلان عابباسوۆ