وزبەكستان ءۇش جىلعا جارامدى IT ۆيزا ەنگىزۋدى جوسپارلاپ وتىر
12:51, 22 - ناۋرىز 2022
تاشكەنت. قازاقپارات - وزبەكستان 1- ساۋىردەن باستاپ ينۆەستورلار، IT كومپانيا قۇرىلتايشىلارى، اقپاراتتىق تەحنولوگيا سالاسىنداعى ماماندارعا جانە ولاردىڭ وتباسىنا IT ۆيزا بەرۋدى جوسپارلاپ وتىر، دەپ حابارلايدى قازاقپارات وزبەكستاننىڭ IT- پاركىنە سىلتەمە جاساپ.
IT ۆيزا جەكە تۇلعالارعا ءۇش جىلعا دەيىن بەرىلەدى. اتالعان ۆيزانى العان ازاماتتار ءۇش جىل بويى وزبەكستانعا ەمىن-ەركىن كىرىپ-شىعا الادى، سونىمەن قاتار وزبەكستان ازاماتتارىنا قاراستىرىلعان ءبىلىم جانە مەديتسينا قىزمەتتەرىن الۋعا قۇقىلى.
ودان بولەك، ءۇي ساتىپ العان جاعدايدا، ولار وزبەكستاندا تۇرۋعا ىقتيارحات الادى.
ۆيزا IT- پاركتىڭ ۇسىنىسىمەن بەرىلىپ وتىرادى. ونى الۋ شارتتارى ماقساتىنا قاراي ەرەكشەلەنەدى.
IT- ۆيزاعا بەرىلگەن ءوتىنىش ءۇش جۇمىس كۇنى ىشىندە قاراستىرىلادى. وتباسى مۇشەلەرىنە قوناق ۆيزاسى بەرىلەدى.